Read Termanu NINITAK 13 Bible Online

NINITAK 13 - Termanu bible

NINITAK 13

¹ Basa boema, au ita bana esa kalua neme tasi dale mai. Bana ndia susulan sanahulu, ma langan hitu. Susulan esa soona, hapu bulamolik esa, ma nai langan sila la esa-esak, nanasulak na'de nakamumulu-nakamamaek esa soaneu Manetualain.

² Bana fo au itak ndia, lupa na sama leo meoasu kokoto ka, ma ei na sama leo bana esa na'de beruang ei na, ma nggonggolo na sama leo singa nggonggolo na. Boema naga fe balakai na, kandela mane na, ma koasa matuaina na, neu bana ndia.

³Langak esa neme bana ndia langa kahitu nala, meten soona nono'ka bai bisu mana aa'do ka, tehu bisu ndia ana hai so. Basa daebafa ka lala'ena tunga bana ndia no bafa nala bee poo.

⁴Sila basa-basas lamatutua-lamadedema naga ndia, nanahu ana fe basa be'ibalakain neu bana ndia so. Ala sene do'ok neu bana ndia boema lae, “Ta hapu mabe'i-balakaik sama leo bana ndia fa. Ta hapu esa boen bisa sengi fan!”

⁵ Bana ndia sipo hak fo koao-ndaeao de nalosa nakamumulu-nakamamaek Manetualain. Manetualain fen koasa bulak hahulu dua dale na.

⁶Boema ana mulai nakamumulu-nakamamaek Manetualain ma Manetualain na'de na, leondiak boe Manetualain mamana leleo na, ma basa manaleo nai nusa so'da ka boeo, nakamumulu-nakamamae kasa.

⁷ Ala fen loak fo laban Manetualain hataholi kamahehele nala boe, boema ana sengis. Ma ala fen koasa basa leoana kala, nusaina la, dede'a kala, ma leoina la.

⁸ Basa hataholi manaleo nai daebafak ia poi na, neukose ala sene do'ok bana ndia, ta'da fe'e hataholi fo nanuu so'da matetu ka ma hataholi fo na'de na Manetualain sula kana nai buku esa dalek te daebafa ka beita nananakadada'dik fa. Bi'ilopo Ana fo hataholi la do'dolisa nana, susulan ndia.

⁹Hu ndia de metema see hapu namanene soona, namanene hala ka nde ia nae:

¹⁰ “Hataholi fo muse nanatahan soona, tao leo beeo neukose nanatahan. Ma hataholi fo muse nanataonisak ninik tafaina soona, tao leo beeo neukose nanataonisak ninik tafaina. Hu ndia de, Manetualain hataholi kamahehele nala muse lakatatakak ma lilineka.”

¹¹Boema au ita bana fe'ek esa ana kalua neme daebafa ka bui na mai. Bana ndia susulan dua sama leo bi'ilopo ana susula na. Ma hala na sama leo naga hala na.

¹²Nai bana makasososak ndia mata na, ana pake koasa matuaina fo ana hapun neme bana ndia mai boe. Ana lakanakaseti daebafa ka lala'ena, ma basa hata fo manaleo nai daebafa ka poi na, fo ala sene-do'ok neu bana makasososak fo bisu mana aa'do na ana hai ndia so.

¹³Bana kadua ndia tao manda'di beu matuaina la. Nai basa hataholi la matan, ana tao ha'i a kona neme lalai leo daebafa ka mai.

¹⁴Basa hataholi fo laso'da nai daebafa ka, bana ndia ke'dindiu nalas ninik manda'di beuk fo ana taon nai bana makasososak ndia mata na. Ma nadenu basa-basas fo lapadedeik la ai batu nanadokik esa neme bana nanatati nahinak ninik tafaina so, tehu naso'da nahele ndia.

¹⁵Manetualain fe bana kadua tao naso'da bana makasososa ka lupa ao nanadoki dula na, nalosa lupa aok nanadoki dulak ndia kokolak nalelak de nadenu fo tao lisa hataholi fo ana ta nau sene-do'o kana.

¹⁶Basa hataholi matua ma ana, kamasu'ik ma nuu tak, ata ma hataholi ao loak, bana ndia nakasetis fo ala tao ta'du-tana neu lima kona na, do neu dedei na.

¹⁷Hataholi esa boen ta hapu asa do nase'o hata esa boen, metema ana ta nanuu ta'du-tana ndia, fo nde bana ndia na'de na, do nafa'da na'dek ndia.

¹⁸Nai ia paluu ka nde malelak. Hataholi manatee teno kala hapu leke la bana ndia na'de na sosoa-ndandaan, nana na'dek ndia nde bee na hataholi daebafak esa na'den ndia. Na'dek ndia nde: natun ne, ne hulune.