Read Termanu NINITAK 16 Bible Online

NINITAK 16 - Termanu bible

NINITAK 16

¹Boema au amanene hala matuaina esa neme Manetualain Uman dale mai de nafa'da ata nusa so'da kahituk sila la nae, “Meu leona, fo po'a Manetualain ngala nasa-melun kahitun sila la isi na leo daebafa ka neu!”

² Boema ata nusa so'da makasososa ka neu de ana po'a nggalaa na isi na leo daebafa ka neu. Boema bisungguma matuaina la ala da'di neu basa hataholi manahapu bana ndia ta'du-tanan, ma neu hataholi fo ana sene-do'ok neu bana ndia lupa ao nanadoki dula na.

³Basa ndia boema, ata nusa so'da kadua ana po'a nggalaa na isi na leo tasi dale neu. Boema tasi oe na da'di daak sama leo hataholi manamate kala daa na, de mate basa hata mahahaek fo manamaso'dak nai tasi dale la lala'ena.

⁴ Basa boema, ata nusa so'da katelu po'a nggalaa na isi na leo lee la ma oe mata la dalek neu, boema basa-basas oe nala da'di daak.

⁵Boema au amanene ata nusa so'dak fo manakoasa oe nae, “Huhukuk fo O maketu ka nde bee na tunga ndo na, ou Malalaok, Manetualain fo nai ia, ma nai ia so!

⁶Hataholi daebafak mangalau kala taolisa Manetualain hataholi kamahehele nala ma nabi nala so. Besak ia O fes linu daak. Memak ndia nandaa soaneus!”

⁷Boema au amanene hala ka neme mei tutunu-hohotu ka mai nae, “Lamatuak, Manetualain fo Mana Koasa, O maketu-mala'di huhuku ka ndoos ma tunga ndo na!”

⁸Basa ndia boema, ata nusa so'da kaha ana po'a nggalaa na isi na leo le'do neu, boema le'do hotu naputu hataholi a ninik mahaa matuainan fo sama leo ha'i a ndia.

⁹Hataholi daebafa ka putus, hu ka nde le'do haa na, ma putu sila fo manasupa-soo Manetualain na'de na, Manetualain fo manakoasa susa-soe sila la. Leomae leondiak boe, ala ta nau tukatei-saledale leme sala-singo nala mai, ma ala ta nau koa-kio Manetualain matua-mademan fa.

¹⁰ Boema ata nusa so'da kalima ana po'a nggalaa na isi na leo bana ndia kandela mane na neu. Boema bana ndia nusa na da'di makahatuk ma hataholi daebafa ka ala kaa maa nala, hu ka nde lame'da he'dis.

¹¹Boema ala supa-soo Manetualain nai nusa so'da ka, nanahu lame'da he'dis hu ka nde bisungguma nala. Tehu ala ta nau tukatei-saledale boen neme tatao-nono'i managalau nala mai fa.

¹² Basa ndia boema, ata nusa kane a ana po'a nggalaa na isi na leo Lee Efrat matuaina ndia dalek neu. Boema lee ndia ma'dan, de nalosa mane kala leme dulu mai de ala la'ok tunga dalek.

¹³Boema au ita dula dale mangalauk telu, lupa na leo lo'donggelek-ka. Lo'donggelek sila la esa-esa kalua neme naga bafan dale, neme bana ndia bafan dale, ma neme nabi pepeko kala bafan dale mai.

¹⁴Sila nde bee na dula dale mangalauk, fo manatao manda'di beu kala. Dula dale mangalauk kateluk sila la leu leo basa manek manai daebafa ka lala'ena, de ala tao lakabubuas fo latee-latati nai Faik matuaina, fo nde Manetualain fo Mana Koasa Fai na.

¹⁵ “Mamanene leona! Te Au mai sama leo nako'ka. Maua-manalek neu hataholi fo naheheleaon nahele, ma nanea bua-papake na, nalosa ana ta la'ok no makaholak fo ana mae nai lea matan!”

¹⁶ Basa boema, dula dalek sila tao lakabubua manek sila la, nai mamana ka nai dede'a Ibrani dale soona ala foin na'de, Harmagedon.

¹⁷Basa ndia boema, ata nusa so'da kahitu ana po'a nggala na isi na leo lalai maloa neu. Manetualain kokolak napane'e neme kandela manek manai Uma Malalaok ndia dale ka nae, “Lamadai so.”

¹⁸ Boema ndela sa tuti-nato ma ta'ta sa nata'ta, ma dae nanggengo matuaina. Beita la'iesa fo dae manggengo matak leondia ka ana da'di, mulai neme hataholi daebafa ka nananakadada'di kana. Dae manggengok ia nde bee na dae manggengok matuaina nanseli!

¹⁹ Kota matuaina ndia heaba'en neu baba'ek telu, ma basa nusaina manai daebafa ka, kota nala boeo lakalulutuk. Boema Manetualain nafandele na Babel fo kota matuaina ndia. Manetualain fen ninu angol neme Ndia nggalaa na mai — fo nde angol nasa-melun manalua ponu-ponu na.

²⁰ Basa pulu la mopos, ma basa lete kala boeo mopo kasa.

²¹ U'da eis bubuaina la, fo bubuak esa soona bela na kilo limahulu, ala tu'da leme lalai mai, de lapaluni la hataholi daebafa kala. Boema ala supa-soo Manetualain nanahu susa-soe u'da eis matuaina ndia.