Read Termanu NINITAK 19 Bible Online

NINITAK 19 - Termanu bible

NINITAK 19

¹Basa ndia boema, au amanene hata esa sama leo hataholi makadotok hala nala nangguu neme nusa so'da ka mai de lalo bebou lae, “Koa-kio Manetualain leona! Ita Manetualain nde bee na Manetualain fo manasoi-tefa. Ndia Manetualain fo nananamatutua-namadedemak ma manakoasa!

² Nakeketu na tunga ka'da ndo na, ma manatee tenok. Naketu basa huhukuk soaneu manasosoa-piao matuaina, fo manatao nalutu daebafa ka ninik sosoa-piaon. Manetualain huku basa manasosoa-piaok ndia, nana ana taonisa Manetualain ata nala.”

³ Boema hataholi makadotok sila la lalo bebou seluk lae, “Koa-kio Manetualain leona! Te ha'imasuk maneme ha'i fo manahotu naputu kota matuaina ndia, neukose ana ta hahae namasu ka fa!”

⁴Boema lasi-lasi kaduahuluha kala, ma mahahae kahak fo manaokofeo la kandela manek ndia, ala bala leu de ala sene-do'ok neu Manetualain fo nangatuuk nai kandela manek ndia lai na. Lafa'da lae, “Amin! Koa-kio Manetualain leona!”

⁵ Boema au amaneme hala ka neme kandela manek ndia mai nae, “Emi muse koa-kio ita Manetualai na, emi basa-basa mala, ana ma matua, malalau-maoono ma manasene-do'o kana!”

⁶ Boema au amanene hala ka sama leo hataholi makadotok lalo bebou. Halak ndia napane'e nanseli sama leo lii matuaina ngguu na, ma sama leo manggulu ka nanggulu. Au amanene lafa'da lae, “Koa-kio Lamatua ka! Nanahu ita Manetualain Fo Mana Koasa ndia Ana da'di Manek so!

⁷Mai Leona, fo ata tamahoko-setelee, mai fo ata koa-kio matua-mademan! Nana fai na losa so ba'eneu Bi'ilopo Ana ka'bing no penganten ina ka, ma penganten ina ka boeo naheheleaon basa soaneu ana ka'bing non so.

⁸Manetualain fe basan, bua papakek fo nanataok neme tema fula balisi ma mangadilak neu pengante na.” (Tema fula mangadilak ndia nde bee na, ta'du-tana neme Manetualain hihii-nanaun fo hataholi kamahehele nala nde tao nana.)

⁹ Boema ata nusa so'dak ndia nafa'da au nae, “Sulak-ma dede'ak ia la leona: ‘Maua-manalek neu hataholi, fo nanakaik leo Bi'ilopo Ana ndia feta ka'bi nga neu.’ ” Basa boema ata nusa so'dak ndia kokolak selu kana nae, “Ia nde hala tete'ek neme Manetualain mai.”

¹⁰Au bala u ata nusa so'dak ndia mata na, fo au sanga sene-do'o kana, tehu nafa'da au nae, “Bosok! Boso sene-do'ok neu au te sene-do'ok neu Manetualain! Nana au boeo ata sama leo o ma sama leo basa o tolanoom fo manaho'u lahele neu Yesus sakasii na!” Nana Yesus sakasiin ndia fe koasa neu Manetualain hataholi kamahehele nala, fo ala tui-benga Manetualain hala hehelu na.

¹¹ Basa boema, au ita nusa so'da ka natahuka, boema au ita ndala fulak esa. Manasa'e ka na'de, Fo Mana Lilinekak ma Ndoos. Ana tao tunga ndo na, nai naketu huhuku ka dalek ma nai natee-natati ka dalek.

¹² Mata na sama leo ha'i pila ka, ma Ana pake bulamolik makadotok nai langa na. Na'dek esa nanasulak nai aoina na, fo ka'da ndia mesa kana nde nalelak na'dek ndia.

¹³Ana pake ba'du manalu a, nanabolo basak nai daak dale so. Ma loken soona lae, “Manetualain Dede'a-Kokolan.”

¹⁴Solda'du nusa so'da kala tungan no ala sa'e ndala fulak, ma ala pake bua fulak balisi.

¹⁵ Tafaina matane esa kalua neme bafa na mai, ma ninik tafaina ndia de neukose Ana sengi leoina la ma neukose Ana paletas ninik ai tete'e besi. Ana ka'bi ango la nai Manetualain Fo Mana Koasa kaka'bi angol nasa-melu na dalek.

¹⁶Nai ba'du manalu na, ma nai puu na nanasulak na'de ka nde ia, “Manek nai basa manek lala'ena.”

¹⁷ Boema au ita ata nusa so'dak esa napadeik nai le'do lain. Nalo bou-bou napane'e neu basa manupui manalaa nai lalai la nae, “Mai makabubua leona, soaneu tunga feta matua fo Manetualain tao ka!

¹⁸Mai Leona, fo mi'a mane kala ao isi nala, malanga solda'du la ao isi nala, palani tati batu la ao isi nala. Mai leona fo mi'a manasa'e ndala la lo ndala nala ao isi nala, ma basa hataholi daebafak ala, matua ma ana, ata do hataholi ao loa kala ao isi nala!”

¹⁹Basa boema, au ita bana ndia ma mane-mane daebafa kala lo solda'du nala, lakabubua fo latee-latati lo Ndia fo manasa'e ndala fula ka, no solda'du nala.

²⁰ Boema ala ho'u la bana ndia no nabi pepekok fo manatao mada'di beuk manai bana ndia mata na. (No manda'di beuk sila la, de bana ndia ke'dindiu na hataholi manamanuu bana ndia ta'du tana na, ma hataholi fo manasene-do'ok neu bana ndia lupa ao nana doki-dula na.) Boema ala tapa bana ndia ma nabi pepekok sila la no maso'dak leo tasi ha'ik fo manapila lo'a-lo'a ka dalek neu.

²¹Boema ala taolisa sila solda'du nala ninik tafaina manakaluak neme manasa'e ndala fulak ndia bafa na mai. Boema manupui la mai de lamoa hataholi nanataonisa kala ao isi nala.