Read Termanu NINITAK 2 Bible Online

NINITAK 2 - Termanu bible

NINITAK 2

¹“Neu ata nusa so'dak salanik manai Efesu sala, sulakman leoiak: Ia nde hala heheluk neme Ndia fo manaho'u nduu kahitu kala nai lima kona na, ma manala'ok manai banu ei lilopila kahituk sila la tala'da.

²Au bubuluk hata fo emi taon: Emi maue-male'di puselaipana ma emi makatatakak manseli. Au bubuluk emi ta tao dalek neu hataholi mangalau kala fa. Ma emi boeo so'ba basa hataholi fo manaku aoina na hataholi nadedenuk, te se'ko na ta, nana emi bubuluk mae sila masapepeko kala.

³Emi boeo ta haelai mamanasa ma ta ketu namahehenak, leomae emi doidoso nanahu Au.

⁴Tehu hapu hata esa nai emi dalek fo Au akamu-akadaun: Emi ta sue-lai Au so'on sama leo makasososa na.

⁵Hu ndia de, mafandendelek leona te, emi tu'da meu nai doo ka so! Tukatei-saledale meme emi sala-singo mala ma tao-no'i hata fo makahulu na emi tao-no'in nana. Metema ta soona, neukose Au ne'i fo Au fe'aheni emi banu eim sila la neme mamana nala mai.

⁶Leomae leondiak boe bei hapu hata malole esa nai emi dalek: Emi makamu-makadau Nikolaus ana manatunga nala tatao-nono'in, fo Au akamu-akadaus boe.

⁷ Ba'eneu see fo ana hapu namanene soona, ela leo bee na ana taoafik neu hata fo Manetualain Dula Dale na nafa'dan neu salani nala! Sila fo manasengi kala, neukose Au fes loak la'a ai boak neme ai huu maso'da ka fo ana moli nai Manetualain Osin dale.”

⁸ “Neu ata nusa so'da salanik manai Smirna la, sulakman leoiak: Ia nde hala heheluk neme Ndia fo makasososak ma mate'ek — fo manamate basak ma naso'da falik.

⁹Au bubuluk basa emi toto'a-tataa mala. Au bubuluk emi nuu ta-hata ta kala, tehu tunga doo na emi kamasu'ik! Au bubuluk kalaak pepekoko kala soaneu emi neme hataholi fo ana manaku aoina hataholi Yahudi, te se'ko na ta. Sila nde bee na Nitu hataholi kamahehelen!

¹⁰Boso bii neu doidosok fo ta doo ka soo'on te emi muse la'ola'din. Mafandendelek, te neukose Nitu tao emi nggelok leo bui dale neu soaneu emi nanaso'ba-su'dik. Neukose emi doidoso faik sanahulu dale na. Ela leo bee na emi lilineka neu Au losa mate, soona neukose Au fe emi so'da matetu ka ma manaketu basa ta ka da'dileo bua palsen sesengik.

¹¹ Ba'eneu see fo ana hapu namanene soona, ela leo bee na ana taoafik neu hata fo Manetualain Dula Dale na nafadan neu hataholi kamahehele nala! Sila fo manasengi kala, neukose ala ta doidoso hata-hata makandondook neme mamate kadua mai fa.”

¹²“Neu ata nusa so'da salanik manai Pergamu sala, sulakman leoiak: Ia nde hala heheluk neme Ndia fo manaho'u tafaina matane kadua ka mai.

¹³Au bubuluk emi leo nai bee, fo nde nai mamanak fo Nitu paleta. Tehu emi lilineka mahele neu Au. Nakalenak lelek Antipas, Au sakasiing fo mana lilinekak ndia, nanataonisak nai emi matam nai Nitu mamana leleo na, emi ta malelesi mae emi mamahele neu Au fa.

¹⁴ Leomae leondiak boe, fo Au ta hiin nai emi dalek fa nde: Hapu hataholi nggelok nai emi dalek, ala tunga hata fo Bileam nanoli ka. Bileam nanoli Balak eno na tao leo beek fo tu'u hataholi Israe la leo sala-singo ka dalek leu, fo nde ninik ana fufu'di-oo'dos fo la'a nana'ak fo ala fe basan neu sosongo-tatango ka ma ala tao tatao-nono'i manasosoa-piao kala.

¹⁵Leondiak boe, nai emi dalek bei hapu hataholi fo ala bei ho'u lahele Nikolaus ana manatunga nala nanoli nala.

¹⁶Hu ndia de, tukatei-saledale meme emi sala-singo mala mai leona! Metema ta soona, ba'ihanak seluk fa bai te neukose Au mai neu emi, soaneu Au atati o hataholi sila la ninik tafaina manai Au bafa nga.

¹⁷ Ba'eneu see fo ana hapu namanene soona, ela leo bee na ana taoafik neu hata fo Manetualain Dula Dale na nafa'dan neu hataholi kamahehele nala! Sila fo manasengi kala, neukose Au po'i fes la'a loti manna fo nananafuni ka, ma esa-esak neukose ana sipo batu fulak esa neme Au mai. Nai batu ndia, nanasulak na'de beuk esa fo esa boeo ta bubulu kana fa, ka'da hataholi mana sipo nana.”

¹⁸“Neu ata nusa so'da salanik manai Tiatira la, sulakman leoiak: Ia nde hala heheluk neme Manetualain Anan, fo mata na pila lo'a-lo'a sama leo ha'i a, ma ei na pila lo'a-lo'a sama leo liti nanahotu ka.

¹⁹Au bubuluk basa hata fo emi tao-no'i ka so: Au bubuluk emi sue-lai emi nonoo hataholi ma, emi lilineka, emi maue-male'di, ma emi makatatakak doidosok. Au bubuluk besak ia emi maue-male'di ba'ulena neme makahulu na mai.

²⁰ Tehu Au akamu-akadau hata esa nai emi dalek fo nde: Emi tao dalek neu Izebel, inak fo ana manaku aoina na Manetualain hataholi nadedenun ndia. Ana tipu-dai na Au atang ba'u ka so, ma anolis fo ala hohonge ma la'a nana'ak fo nanafe basak neu sosongo-tatango ka.

²¹Au fe basan fai loak soaneu ana tukatei-saledale neme sala-singo nala mai so, tehu ana ta nau hahae tao-no'i dede'a sosoa-piaok sila la fa.

²²Mafandendelek leona! Te neukose Au balan neu dae losa namahe'di nai pepe'uk lain. Nai ndia, no hataholi manahohonge lo nana, neukose ala doidoso lanseli. Basa sila la neukose Au tao-no'in besak ia, ta'dafe'e metema ala hahae tao-no'i dede'a mangalau kala sama-sama lon.

²³ Neukose Au taoisa la'iesak hataholi manatunga nala boe, fo ela basa salani kala lame'da lae, Au nde Ndia fo manabubuluk hataholi daebafa ka dudu'a-aafin ma dale nala. Neukose Au balas emi tunga emi esa-esak tatao-nono'in.

²⁴Tehu emi hataholim nggelok nai Tiatira ta tunga nanoli mangalauk ndia ma ta lanoli Nitu a malela matuaina nala fa. Au afa'da ae, neukose Au ta fe seluk emi lelepa mabela so'on.

²⁵Tehu mahani te losa faik fo Au mai, ela leo bee na emi tunga mahele hata fo emi manuu basan so.

²⁶ Sila fo manasengi kala, ma losa mate'e na ala tao-no'i lahele hata fo Au ahii kana soona, neukose Au fes koasa fo sama leo Au sipon neme Au Ama nga mai. Neukose ala sipo koasa neme Au mai fo ala paleta leoina la ninik aitete'e besik, ma soaneu tao lakalulutuk leoina sila la sama leo uledae a.

²⁸Neukose ala sipo nduu timu neme Au mai.

²⁹Ba'eneu see fo hapu namanene soona, ela leo bee na ana taoafik neu hata fo Manetualain Dula Dale na nafadan neu hataholi kamahehele nala!”