Read Termanu NINITAK 21 Bible Online

NINITAK 21 - Termanu bible

NINITAK 21

¹ Boema au ita lalai beuk ma daebafa beu ka. Lalai makasososa ka ma daebafa makasososa ka mopos ma tasi mopo kana.

² Boema au ita kota malalaok ndia, fo nde Yerusalem beu ka ana kona neme nusa so'da ka, fo neme Manetualain mai. Kota ndia nanasadia basak sama leo penganten inak esa nanapainotek soaneu natongo no penganten tou ka.

³ Boema au amanene hala ka neme kandela manek ndia nalo bou-bou napane'e nae, “Besak ia Manetualain mamana leleo na nde bee na nakabubua no hataholi daebafa ka! Neukose naso'da nos, ma neukose ala da'di Manetualain hataholi kamahehelen. Neukose Manetualain nde leo nos, ma Ana da'di sila Manetualai na.

⁴ Neukose Ana lose nama'da luoe neme mata nala mai. Neukose ta hapu mamates so'on. Dale he'dik, kii-makaleleuk, do he'di-laus boeo neukose ta hapu so'on. Dede'a palaa kala mopos so.”

⁵Boema Ndia fo manamangatuuk nai kandela manek ndia lai na nae, “Besak ia Au tao a basa-basan lala'e na beuk so!” Boeo nafa'da au nae, “Sulak-ma ia, nana dede'a-kokolak ia la tete'e ka ma hapu nananamahelek.”

⁶ Boema Ana kokolak nae, “Basa so! Au nde Alfa ma Omega, fo makassososak ma mate'ek. Au nde Lamatuak neme Makasososak ma Makabuik. Basa hataholi mana maa ma'da kala, neukose Au fes linu hiik neme oe mata fo manafe maso'da ka.

⁷ Hataholi fo manasengi kala, neukose ala sipo basa dede'ak sila la neme Au mai. Neukose Au da'di sila Manetualai na, ma sila da'di Au ana ngala.

⁸Tehu hataholi manabii-mamata'u ka, hataholi kamahehele tak, hataholi mangalauk, kanisa ka, hataholi manasosoa-piao ka, hataholi manapake malela suangi la, manasongo-tango ka, ma basa mana masapepeko-masandandali kala, neukose nanatapak leo tasi ha'i ma belerang manapila lo'a-lo'a ka dalek leu. Ia nde mamate kala'i dua.”

⁹Esa neme ata nusa so'da kahituk fomana ho'u nggalaas fo henuk no susa-soe mate'e kahitu kala, ana mai de nafa'da au nae, “Mai leona! Neukose Au atu'du o Penganten, fo Bi'ilopo Ana saoina na.”

¹⁰ Boema Manetualain Dula Dale na koasa na au, de ata nusa so'dak ndia no au leo lete mademaina esa poi na. Natu'du au kota malalaok Yerusalem, fo ana kona neme nusa so'da ka mai fo neme Manetualain mai,

¹¹no nandela-nasa'an ma Manetualain matua-mademan. Kota ndia mangadilak sama leo batu poemata, sama leo batu baiduri pandan, fo neuanak sama leo titino ka.

¹² Tembo manaokofeo nala nana dema na seli, no lelesuinan sanahulu dua, ma ata nusa so'dak sanahulu dua lanean. Nai lelesuina nala, nanasulak leoina Israe la ma leoana kasanahulu dua nala na'de nala.

¹³Hapu lelesuina telu lasale leo basa mamanak lala'ena; lelesu telu lai boboan dulu, telu lai boboan kona, telu lai boboan kii, ma telu lai boboan muli.

¹⁴Tembo kota ndia nananafofo'ak nai batu netes sanahulu dua lain. Nai batu netes sila la lain, nanasulak Bi'ilopo Ana ndia hataholi nadedenu kasanahulu dua nala na'de nala.

¹⁵ Ata nusa so'dak fo manakokolak no au ndia, nanuu aitete'e uukuk neme lilopila sa mai soaneu ana uku kota ndia lelesu inanala, ma tembo ka.

¹⁶Kota ndia lupa na bala'kak — nanalu na sama no loloa na. Boema ata nusa so'dak ndia uku kota ndia ninik aitete'e uuku na, de ana hapu nanalu na kilometel lifun dua natun ha. Loloa dedeman sama na leo nanalu na.

¹⁷Lelek ata nusa so'dak ndia ana uku tembo ka, boema ana hapu tembo ndia dedema na metel nehulu. Uukuk fo ata nusa so'dak ndia pakek ndia nde bee na uukuk fo hataholi daebafa ka paken.

¹⁸ Tembo kota ndia nanataok neme batu baiduri pandan, tehu kota ndia aoina na nanataok neme lilo isi ka mai de neuanak leo titino ka.

¹⁹Kota ndia batu nete nala nanapainotek ninik batu poemata mata-matak lala'ena. Batu netes makasososa ka, nanataok neme batu baiduri, kadua neme batu nilam, katelu neme batu yakut, ka ha neme batu zamrud,

²⁰kalima neme batu baiduri sepah, ka ne neme batu delima, kahitu neme batu ratna cempaka, kafalu neme batu pirus, kasio neme batu topas, kasanahulu neme batu krisopras, kasanahulu esa neme batu lazuardi, ma kasanahulu dua neme batu kecubu nga.

²¹Lelesuina kasanahulu dua nala, ala taon neme mutiara sanahulu dua, fo lelesu la esa soona, ala tao mutiara esa neu. Enok manai kota ndia nanataok neme lilo isi ka mai de neuanak sama leo titino mangadila ka.

²²Au ta ita Manetualai Uma na nai kota ndia dalek fa, nana Manetualain Uma na nde Lamatua ka mesa kana, Manetualain Fo Mana Koasa, ma Bi'ilopo Ana ndia.

²³ Kota ndia ta paluu hapu mangale'dok neme le'do haa na do bula ka mai fa, nana Manetualain ndela-sa'an, nandela-nasa'a nan ma Bi'ilopo Ana ndia nde bee na kota ndia banu na.

²⁴ Leoina manai daebafa kala, neukose ala la'ok nai ndela-sa'a na dalek, ma mane-mane kala boeo neukose lini su'i-bete nala leo kota ndia dalek neu.

²⁵ Kota ndia lelesuina nala nanasoik tunga faik, de ta nanakenak fa, nana ta hapu le'odaek nai ndia fa.

²⁶Leoina la matua-mademan ma su'i-bete nala, neukose linis leo kota ndia dalek neu.

²⁷ Tehu hataholi fo manatao-no'i dede'a manggenggeo kala, do hataholi masapepeko-masandandali ka, dede'a keke'u na, hata beek boe — metema manggengeok soona, neukose ta masok leo kota ndia dalek makandondook fa. Fo manamaso ka nde ka'da hataholi fo na'de nala nanasulak nai Susula Hataholi Maso'da kala fo nde Bi'ilopo Ana ndia susulan dale.