Read Termanu NINITAK 4 Bible Online

NINITAK 4 - Termanu bible

NINITAK 4

¹Basa ndia boema, au ita seluk ninitak esa. Au ita lelesu esa natahuka nai nusa so'da ka. Basa boema au amanene seluk halak fo nai makasoso na ana kokolak basa no au sama leo pupuu ka lii na. Halak ndia nae, “Mai, kae leoia mai. Neukose Au atu'du o hata fo mahani te neukose ana da'di.”

²Tutika Manetualain Dula Dale na koasa na au. Boema au ita nai nusa so'da ka hapu kandela manek esa, ma hataholi esa nangatuuk nai kandela manek ndia lain.

³ Hataholi ndia mata panan nahaa sama leo poemata baiduri pandan pila momo'dok ma poemata dalima. Elus esa dula zamrud ana feo na kandela manek ndia.

⁴Nai kandela manek ndia boboa kaisun, hapu kandela mane fe'ek duahulu. Lasi kaduahuluha kala langatuuk lai ndia, fo bua-papake nala fulak, ma ala pake bulamoli lilopilas.

⁵ Ndela sa nandela neme kandela manek ndia mai, ma ta'tas a nata'ta nakadedelek. Ma nai kandela manek ndia mata na, hapu obor manapilak hitu; fondia nde Manetualain Dula Dale kahitu nala.

⁶ Nai kandela manek ndia mata na boeo, hapu hata esa meten soona, nono'ka bai de sama leo tasi titino ka, neuanak sama leo titino ka. Nai kandela mane ka boboa kaisun, fo nai boboan esa soona, hapu mahahaek ha. Mahahaek sila la dea-uluk henuk no matak.

⁷Mahahae makasososa ka meten soona, sama leo singa. Kadua, sama leo sapi mane a. Katelu, mata-panan sama leo hataholi a mata panan. Kaha, meten soona sama leo manupui kaka'ka ana bei laa-laa.

⁸ Mahahae kahak sila la esa soona, li'dan ne, boema nai boboa-kaisun ma nai dalek henuk no matak. Lele'do-le'odaen mahahaek sila la ta hahae lakamee lae, “Malalaok, malalaok, Manetualain malalaok, Manetualain Mana Koasa; fo nai ia, nai ia so, ma nai ia losa doo na.”

⁹Mahahae kahak sila la lakamee nakamee kokoa-kikiok, ha'da-holomata, ma makasi neu Ndia fo nangatuuk nai kandela manek ndia lain, fo nde Ndia fo naso'da losa dodoo na. Ma nai lelek mahahaek sila lakamee soona,

¹⁰mauli-malanga kaduahulu hak sila la bala leu Ndia fo nangatuuk nai kandela manek ndia lain mata na, boema ala sene-do'ok neu Ndia fo naso'da losa dodoo na. Basa boema ala tapa sila bulamoli nala neu kandela manek ndia mata na ma lae,

¹¹“Ou, Lamatuak, ou ami Manetualaim! Ka'da O nde mandaa sipo kokoa-kikiok, ha'da-holomata, ma koasa. Nana O nde makadada'dik basa hata lala'ena, ma no O hihii-nanaum boe de basa hata lala'en sila la, ala da'di ma laso'da so.”