Read Termanu NINITAK 8 Bible Online

NINITAK 8 - Termanu bible

NINITAK 8

¹Lelek Bi'ilopo Ana ndia siiba'e segel kahitu boema, nusa so'da ka da'di neenee-lino-lino, dodoo na fafa'kama li'u seselik esa.

²Boema au ita ata nusa so'dak hitu lapadeik lai Manetualain mata na de ala sipo pupuuk hitu.

³ Ata nusa so'da fe'ek esa nini mango tutunu boominik lilopilas esa ana mai de napadeik neu mei tutunu-hohotu ka mata na. Ala fen boominik makadotok nanseli fo ana po'an neu basa Manetualain hataholi kamahehele nala huhule-haladoin fo ana tunu-hotus nai mei tutunu-hohotu lilopilas manai kandela mane ka mata na.

⁴Sama-sama no Manetualain hataholi kamahehele nala huhule-haladoin, boominik fo bei manapilak ndia masu na namasu leo lain neme ata nusa so'dak fo manamapadeik nai Manetualain matan ndia, lima na mai.

⁵ Basa boema, ata nusa so'dak ndia ho'i na mango tutunu boominik ndia de, ana ho'i ha'i manai mei tutunu-hohotuk ndia lai na de, ana taon leo dalek neu, boema ana tapan leo daebafa ka neu. Tutika ta'ta sa boeo nata'ta lain, ma ndela sa tuti-nato, boema dae manggengo ka da'di.

⁶Basa ndia boema, ata nusa so'da kahituk manaho'u pupuu kahituk sila la laheheleaon fo ala puu pupuuk sila la.

⁷ Ata nusa so'da makasososa ka ana puu pupuu na boema, u'da eis ma ha'i sese'dok no daak, ala tu'da lakamiu leo daebafa ka mai. Boema ha'i na'a naputu daebafa ka baba'ek esa neme baba'ek telu. Leondiak boe ai la ma na'u manamomo'do kala ha'i na'a naputu baba'ek esa neme baba'ek telu.

⁸Boema ata nusa so'da kadua ana puu pupuu na. Boema hata esa matuaina nanseli, meten soona sama leo lete manapila lo'a-lo'a ka, nanatapak leo tasi dale neu. Boema tasi oe na baba'ek esa neme baba'ek telu nasafali da'di daak,

⁹ma basa mahahaek manai tasi dale la baba'ek esa neme baba'ek telu mate la'iesa kasa. Leondiak boe ofak manai tasi lai la hea nakalulutuk basa baba'ek esa neme baba'ek telu.

¹⁰ Basa boema, ata nusa so'da katelu ana puu pupuu na, boema nduuk matuaina esa pila lo'a-lo'a sama leo obo la, ana tu'da neme lalai mai, boema ana tuni na lee la ma oe mata manai daebafa ka baba'ek esa neme baba'ek telu.

¹¹ (Nduuk ndia na'de, “Makahe'duk”.) Hu ndia de oe ala baba'e esa neme baba'ek telu oe na da'di makahe'duk, de mate basa hataholi makadotok nanahu linu oe fo manada'di makahe'duk ndia.

¹² Ata nusa so'da kaha ana puu pupuu na boema, le'do a, bula ka, nduu kala baba'ek esa neme baba'ek telu nanafapak de nalosa mangale'do nala mopos. No enok ndia, lele'do ka baba'ek esa neme baba'ek telu ta mangale'dok fa, leondiak boe le'odae ka baba'ek esa neme baba'ek telu.

¹³Boema au mete ita manupui kaka'ka esa ana bei laa dema na seli nai lalai, nalo bou-bou nae, “Soe, Soe, Soe ba'eneu basa hataholi manai daebafa ka, metema lamanene ata nusa so'da katelu fe'e kala, mahani te ala puu pupuu nala!”