Read Termanu NINITAK 9 Bible Online

NINITAK 9 - Termanu bible

NINITAK 9

¹Boema ata nusa so'da kalima ana puu pupuu na boema, au ita nduuk esa tu'da neme lalai leo daebafa ka mai. Ala fe nduuk ndia faka mamate sa nggoe na.

² Boema nduuk ndia soiheni faka mamates ndia lelesu na de ha'imasu ka kalua neme dalek mai a sama leo ha'imasu ka neme la'o matuaina dale mai. Le'do ma lalai maloa ala da'di makahatuk, hu ka nde ha'imasuk maneme fakak ndia dalek mai.

³ Boema lama kala kalua leme ha'imasuk ndia dalek mai de ala kona leo daebafa ka mai. Ala fe lamak sila la koasa sama na leo ala fen neu kula ka.

⁴ Ala ka'is fo boso tao lalutu na'u do ai la do bubu'u palusa fe'e kala. Sila ka'da bole leu sapu la hataholi fo nai dedei na ta hapu ta'du-tana segel neme Manetualain mai.

⁵Manetualain fes tao lahe'di hataholi daebafa ka nalosa ala doidoso lanseli dodoo na bulak lima, tehu ta bole tao namate fas. Lamak sila la de'de soona he'di na sama leo kula ka de'de.

⁶ Nai bula kalimak sila la dalek, hataholi sila la sanga enok fo mate, tehu ala ta bisa mate fa. Ala hii mate, tehu mamate sa doo ka neme sila mai.

⁷ Lamak sila la lupa na sama leo ndala naheheleaon fo neu natee-natati. Nai langa nala hapu hata esa meten soona, sama leo bulamoli lilopila sa. Mata pana nala sama leo hataholi mata panan.

⁸ Langa doo nala sama leoina kala langa doo na, ma nisi nala sama leo singa nisi na.

⁹ Fana nala nanababaak ninik hata esa sanga nae leo ba'du besi ka. Li'da nala nggu na sama leo ndala manahela kaleta bubuaina esa ngguun fo bei latee-latati nai musu dale.

¹⁰Maiko kala fo lade'de sama leo kula ka. Be'ibalakin nai ikon nala dalek fo ala tao doidoso hataholi a bulak lima dale na.

¹¹Lanuu manek fo ana paletas, ma manek ndia nde ata nusa so'dak manamanea faka mamate sa. Na'de na nai dede'a Ibrani dalek soona, Abadon, ma nai dede'a Yunani dalek soona, Apolion, fo sosoa na nae, “Mana Tao Nakalulutuk”.

¹²Susa soe makasososa ka seli so. Basa ndia soona, hapu susa soe dua seluk muse ala mai.

¹³ Basa boema, ata nusa so'da kane puu pupuu na. Boema au amanene hala ka mai neme mei lilopila tutunu-hohotuk manai Manetualain mata na bu'un has mai.

¹⁴Halak ndia nafa'da ata nusa so'da kane ndia nae, “Se'i-po'i ata nusa so'da kahak fo nanapa'ak nai Lee Efrat ndia leona!”

¹⁵Ata nusa so'da kahak sila la nanase'i-po'ik. Sila nanasadia hehelik ba'eneu li'u, faik, bulak, ma teuk soaneu taolisa hataholi daebafa ka baba'ek esa neme baba'ek telu mai.

¹⁶Lafa'da au lae, solda'du manasa'e ndala sila la dede'u na nde bee soona, hataholi juta natun dua.

¹⁷Ma nai ninitak dale, au ita ndala sila la lo manasa'e nala. Manasa'e nala pake ba'du besi pilas sama leo ha'i a, momo'dok sama leo batu nilam, ma kunik sama leo belerang. Ndala sila la langa nala sama leo singa langa na, ma bafa nala kalua ha'i, ha'imasuk, ma belerang.

¹⁸Ala taolisa hataholi daebafa ka baba'ek esa neme baba'ek telu, hu ka nde susa soe kateluk sila la fo nde: ha'i, ha'imasuk, ma belerang fo manakalua neme ndala sila la bafa na mai.

¹⁹Ndala sila la be'ibalakain nai bafa nala dalek, ma nai iko nala boe. Iko nala sama leo menge malangak. Ndala sila tao doidoso hataholi daebafa ka ninik iko nala.

²⁰ Tehu ela hataholi fo susa soe katelu kala ta taolisa fas ala, ala ta nau hahae tao batu sosongo-tatangok. Ala ta hahae sene-do'ok neu dula dale mangalau kala ma songo-tango lilopilas, lilofulak, liti, batu ma ai, fo ta hapu lita do lamanene, do la'ok boen.

²¹Ala ta tukatei-saledale leme tatao-nono'i mangalau nala fo nde: kanisak, malela suangi, hohonge ma nakoda.