Read Termanu RUT 1 Bible Online

RUT 1 - Termanu bible

RUT 1

¹Nai tepo-lelek makahulun eli, Israel beita nanuu manek esa boen, te la'a-ndoes nai Kanaan. Nai lelek ndia, hapu touk esa na'de Elimelekh, neme leo-ingu Efrata mai, de ana leo nai kota Betlehem-ma, nai nusa Yehuda. Hu kande la'a-ndoes ndia, de no saoinan Naomi, ma ana toun duas, fo nde Mahlon ma Kilyon leu leo nusa Moab-pa leu. Boema ala leo leme naa. Lelek ala lei lai naa boema,

³mate Elimelekh. De ela ka'da Naomi no anan duas.

⁴Boema, ana ka duan sila-la ka'bing loo anafe'oana Moab, esa na'de Orpa ma esa na'de Rut. Basa teuk 10 boema,

⁵mate Naomi ana tou ka duan sila-la boe, nalosa Naomi namopo nau saon-na, do anatou ka dua-nala boe.

⁶Basa teuk de'ubee boema, Naomi namanene, lae MANETUALAIN ba'e-pala hataholi Israel-la, nenik Ana fe dae-oen labuna-laboa malole. Hu ndia de, Naomi no manafeun duas lafafa'u bua-lo'an-nala fo ala fali le'us leo Yehuda leu.

⁷Basa-basas, fali le'us leo Yehuda leu. Ala losa eno tala'dak boema,

⁸Naomi nafa'da manafeu ka duan sila nae, “Duam-ma fali me'um-ma leo emi ina-amam uman meu. Sa'di leo been-na, MANETUALAIN malole soaneu emi, sama leo emi boeo, malole soaneu au, ma soaneu sila fo manamate basak-kala so.

⁹Sa'di leo been-na, MANETUALAIN fe emi 2 saoana, fo daenga emi mauma-maloo seluk.” Naomi nafa'da basa nae leondia boema nate'as, ma ana de'is. Tehu Orpa ma Rut dola heni halan-nala,

¹⁰ma lafa'da Naomi lae, “Ta, Ina! Ami tunga moo Ina, fali leo Ina nusa-namon meu.”

¹¹Boema, Naomi nataa nae, “Bosok anang-ngala lemin! Malole lenak fali me'um-ma. Sosoak hata, emi tunga au? Ade au ta bisa bongi seluk anak, fo ana da'di emi saotoum so'on hetu?

¹²Fali leon ana-ngala lemin, nana au amalasi anseli de au ka'bing seluk fa. Ma leouni'ka, bei hapu namahehenak ba'eneu au, fo au ka'bing le'odaek ia boe, boema au bongi anatouk,

¹³ade, emi nau mahani losa lamatua do? Masa bole, hu kande dede'ak ndia, de emi ta nau ka'bing mo hataholi fe'ek so'on. Ta, ana-ngala lemin, boso tao leondiak! Au daleng-nga he'dis soaneu hata fo emi muse la'ola'din, nanahu MANETUALAIN huhukun soaneu au-a.”

¹⁴Rut ma Orpa dola lapane'e seluk, basa boema Orpa nate'a, ma ana de'i aliinan-na, de ana fali ne'un. Tehu Rut ta nau nasi'da-naba'e neme aliinan ndia mai fa.

¹⁵Boema, Naomi nafa'dan nae, “Rut, mitak o palam-ma fali ne'un leo leoinan-na, ma lamatua daebafan-nala neu so. O boeo, muu leon anango, tungan, fo fali leona!”

¹⁶Tehu Rut nataa nae, “Ina, Ina boso madenu au fali u'ung-nga, fo au la'oela Ina! Au nau tunga o Ina. Ina leo bee neu soona, au u leo ndia u. Ina leo nai bee soona, au leo nai ndia boe. Ina leoinan-na, au leoinang boe. Ina sene-do'ok neu Manetualain-na, neukose au sene-do'ok-kana boe.

¹⁷Mate Ina nai bee soona, au nau mate nai ndia boe, fo natoi au nai ndia boe. Sa'di leo been-na, MANETUALAIN huku au belak-ka, metema au nau asi'da-aba'e eme Ina mai, ela ka'da mamates-sa ta'da ita!”

¹⁸Naomi nita Rut natea nahele fo ana tungan, da'di ana ta kokolak hata-hata so'on.

¹⁹Boema ala la'ok lakandoo, de ala losa Betlehem. Nai lelek ala losa naa, tutik-ka basa hataholi manai kota ndia lala'en-na, ala nggenge-la. Basa inak manai naa-la, lafa'da lae, “Tete'ek-ka, Naomi nde ndia do?”

²⁰Boema Naomi nae, “Boso maloo au mae Naomi, te maloo au mae Mara, nana Manetualain Fo Manakoasa po'ilotak au so'dang-nga, henuk no makahe'duk.

²¹Lelek au la'o eme ia mai-a, au limang-nga maisik, tehu besak ia, MANETUALAIN no falik au no lima louk. Hu ndia de, emi boso maloo au mae, Naomi bai, nanahu MANETUALAIN Fo Manakoasa, Ana huku basa au nenik doidosok ba'uk-ka so!”

²²Tutuik la'eneu tao leo beek de Naomi no manafeun Rut, fo hataholi Moab ndia, ala fali leme Moab mai a, leondiak. Ala losa Betlehem, la'e besak-ka fai keketu kokoluk.