Read Termanu RUT 3 Bible Online

RUT 3 - Termanu bible

RUT 3

¹Basa teuk de'ube boema, Naomi nafa'da Rut nae, “Au muse sanga enok, fo ela o hapu mauma-maloo seluk, fo o maua-manale.

²O maue-male'di moo inak-kala, nai Boas tinan hetu? Nah, Boas ndia ita teidalen. Da'di, mamanene ha! Le'odaek ia, neukose neu fepa gandum nai tina.

³Besak ia, muu madiu oe leon, fo pake mina kabomenik ma pake o bua-lo'a neulaum-ma. Soona muu leo mamanak fo, nai bee, Boas fepa gandum. Mahani meme ndia, losa na'a-ninu basa, tehu boso nalosak ana bubuluk o nai ndia.

⁴Taoafik matalololen, neu sungu nai bee. Metema ana sungu soona, muu leo ndia muu leon, fo silu heni ba'du manalun-na, fo sungu deka moo ein-na. Mahani te, neukose nafa'da o, hata fo o muse taon.”

⁵Boema Rut nataa nae, “Hei Ina, neukose au tao basa hata fo Ina nafa'dak-ka.”

⁶Boema, Rut neu leo hataholi-la, mamana fepa gandum-ma neu. Nai ndia, ana tao tunga basa hata fo aliinan-na nadenun ana taon.

⁷Boas na'a-ninu basa boema, ana dodoo-nana, malole-a so, de namahoko nanseli. Boema neu sungu deka no gandum madodouk-kala. No denge-dengek Rut mai, de ana silu heni Boas ba'du manalun-na, basa boema nangape'uk deka no ein-na.

⁸Fatila'da boema, kaiboik Boas fo'a, de nasafafali ao. Nita inak esa sungu deka no ein-na, boema ana nggenge-la.

⁹Boema natanen nae, “See o?” Rut nataa nae, “Au Rut, Ama! Ama nde been-na, ami teidalem, fo muse mete-nakanae au so'dang-nga. Sa'di leo ben-na Ama sipok au da'di Ama saoinan.”

¹⁰Boema Boas nae, “Ela leo been-na, MANETUALAIN ba'e-pala o, anang-ngo. Nakasasamak-kana no hata fo o tao basan neu o aliinam-ma soona, o tatao-nono'i ma besak ia, natu'du susue-lalai matuaina, ba'u lena seluk bai. O bisa sanga saotou muli-soluk nai hataholi kamasu'ik-kala, do hataholi nuu taa-hata taak-kala boe, tehu o ta tao leondiak fa.

¹¹Hu ndia de, o dalem-ma boso ba'ihana, Rut. Neukose au tao atetu o nonokem ndia. Nana basa hataholi manai kota ia bubuluk basa, lae o nde been-na inak esa dale malole.

¹² Memak tete'ek-ka, au muse mete-lakanae o so'dam-ma nana au nde been-na o teidalem. Tehu bei hapu seluk hataholi fe'ek esa, muse ana mete-nakanae o so'dam-ma. Ma hataholi ndia nde been-na, teidalek manadekak lena neme au mai.

¹³Le'odaek ia, sungu meme ia. Fo balahaa fafaik soona, neukose au atane hataholi ndia, ade ana nau mete-nakanae o do ta. Metema anan nau soona, malole so. Tehu, metema ana ta nau fa soona, au aheluk pake Manetualain fo maso'dak-ka na'den-na, neukose au sipok mete-nakanaek ndia. Besak ia sungu meme ia losa balahaa fafaik.”

¹⁴Boema Rut sungu neme ndia, deka no Boas ein-a. Balahaa fafaik, fo bei makahahatu anan-na, te Rut fo'a so, fo sue kande hataholi boso nitan. Nana Boas ta nau hataholi esa boen, bubuluk nae Rut neu leo mamanak ndia neu.

¹⁵Boema, Boas nafa'da Rut nae, “Ho'i-ma o salendam-ma fo belan ma ia.” Boema, Rut ho'i-na salendan-na, de ana belan neu ndia. Boas po'a gandum fafa'ka ma kilo 10, leo salendang ndia dalek neu. Boema ana so'un leo Rut alun lain neu. Basa ndia boema, Boas neu leo kota neu.

¹⁶Rut losa uma boema, aliinan-na natanen nae, “Rut nde o do?” Boema Rut neu deka no Naomi, de ana tuin basa Boas tatao-nono'in neun.

¹⁷Rut tui nakandoo nae, “Ma ndia nde fe au basa gandum ia-la, nana nafa'da nae, au ta bole fali leo uma no lima louk fa.”

¹⁸Boema Naomi nae, “Ka'da mahani anang-ngo, losa o mita dede'ak ia mate'en-na leo beek. Neukose Boas ta denge-denge nahele fa, metema ana beita atol dede'ak ia nai faik ia dalen-na boe.”