Read Termanu SEMUEL SUSULAK-KA ESAN-NA 12 Bible Online

SEMUEL SUSULAK-KA ESAN-NA 12 - Termanu bible

SEMUEL SUSULAK-KA ESAN-NA 12

¹Boema Semuel nafa'da leoina Israel-la lala'en-na nae, “Au tao atetu emi nonokem lala'en-na, ma au so'u fe emi manek esa so.

²Mulai besak ia, ndia nde neukose nauli-nalanga emi. Mitak au ia amalasi ma mofa so Au auli-alanga emi doon-na seli so — mulai neme tepo-lelek au bei muli-solung-nga, losa besak ia. Buti-na nde, au anang-ngala matuaina-la so.

³Besak ia, au apadeik nai emi matam! Metema au tao salak soona, kalaak au nai MANETUALAIN matan, ma nai Ana hele manek-ka matan. Au ho'i hai hataholi fe'ek sapin do keledein so do beik? Au tipu-dai hai, do tuni-ndeni hai, do sipo doi sosolo dalek hai so do beik? Mafa'da leona, fo au ho'i-a su'di beek-ka soona, au fe falik-kana.”

⁴Hataholi sila-la lataa lae, “Ta, beita la'iesa fo Ama tipu-dai do tuni-ndeni ami fa; beita la'iesa fo, Ama ho'i su'di see hata-heton fa.”

⁵Boema, Semuel nafa'da nae, “Nai faik ia, MANETUALAIN ma Ana hele manek-ka, da'di sakasii, lae se'kona au ta tao salak faaanak boen.” Boema, lataa lae, “Hei, tete'ek-ka, MANETUALAIN da'di ita sakasiin.”

⁶ Boema, Semuel nafa'da seluk nae, “MANETUALAIN nde hele Musa no Harun, ma Ndia nde no emi bei-ba'i kaim-mala kalua leme Masir mai.

⁷Besak ia, boso la'o dei. Neukose au kalaak emi nai MANETUALAIN matan. Mafandendelek leon neu MANETUALAIN dale malolen lala'en fo natu'dun neu emi, ma neu emi bei-ba'i kaim-mala so.

⁸ Lelek Yakob no teidalen-nala mai lo Masir mai, ma hataholi Masir-ra tuni-ndenis-sala, emi bei-ba'i kaim-mala dokodoe tutulu-fafalik neu MANETUALAIN, boema MANETUALAIN nadenu Musa no Harun. Hataholi ka duak sila-la loo emi bei-ba'i kaim-mala kalua leme Masir mai, de ala tulu-falis fo ala leo lahele nai nusak ia.

⁹ Tehu basa boema, lafandeleheni MANETUALAIN, fo sila Manetualain-na, hu ndia de, Ana po'ilotak Sisera, fo malanga solda'du matuaina nai Hazor, ma hataholi Filistin-nala boema Moab manen-na, sapu-lalas de ala kala.

¹⁰ Basa boema, ala hule-haladoi neu MANETUALAIN ma ala manaku sila sala-singon-nala; lafa'da lae, ‘Ami masala-masingo basa so, nanahu ami lepos masadea O, ou MANETUALAIN, ma ami sene-do'ok neu Lamatua daebafak Baal ma Asytoret, dodoki-dudulan-nala. Tehu besak ia, soi-tefa-mala ami neme ami musum-ma mai, soona neukose ami sene-do'ok neu O!’

¹¹ Basa boema, MANETUALAIN nadenu Gideon, de basa boema Barak, de basa ndia boema, Yefta, ma mate'en-na au. Ami esa-esak soi-po'i emi neme emi musum-ma mai so, nalosa emi hapu maso'da no tetu-temak.

¹² Tehu lelek emi mita Nahas, fo Amon manen-na, sanga sapu-na emi boema, emi ta sipok MANETUALAIN da'di emi manem fa, de emi mafa'da au mae, ‘Ami hii manek esa paleta ami.’ ”

¹³“Besak ia, mitak, emi hele manek-ka nde ndia. Emi moke basa so, de MANETUALAIN fen neu emi.

¹⁴Maua-manalek neu emi, metema emi fe ha'da-holomata neu MANETUALAIN ma makaluku-makatele neun, nakalenak lilineka mahele neu MANETUALAIN fo emi Manetualaim-ma.

¹⁵Nasafalin-na, metema emi ta mamanene MANETUALAIN fa, lena-lenak emi la'ban paletan-na soona, tao leo bee o, MANETUALAIN la'ban emi ma emi manem-ma.

¹⁶Besak ia, mamanene seluk! Taoafik neu manada'di beuk matuaina, fo neukose MANETUALAIN taon nai emi matam.

¹⁷Neukose au aloo bou-bou neu MANETUALAIN, fo leomae besak ia, fai hanas, tehu neukose MANETUALAIN fe mangguluk-ka ma u'dan-na mai, fo da'di leo natataak neu au huhule-haladoing. Nai hatematak ndia, neukose emi mame'da, emi sala-singom ba'un-na seli soaneu MANETUALAIN nanahu emi moke manek esa.”

¹⁸Boema Semuel hule-haladoi, de nai faik ndia boe, MANETUALAIN fe mangguluk-ka ma u'dan-na mai. Basa leoina ndia lala'en-na, bii-lamata'u neu MANETUALAIN ma Semuel.

¹⁹Boema, lafa'da Semuel lae, “Fali-ma, ami dei Ama, hule-haladoi neu MANETUALAIN fo o Manetualaim-ma, fo ela boso mate ami. Besak ia, ami mame'da mae fe'ek neme ami sala-singom makahulun-na mai, ami masala-masingo seluk, nanahu ami moke manek esa.”

²⁰Semuel nataa nae, “Boso bii, leomae emi tao basa tatao-nono'i mangalauk ndia so, te boso fali deak neme MANETUALAIN mai, tehu mamahele mahele neun, no emi dalek-katema tuam-ma.

²¹Boso tunga lamatua daebafak-kala, fo ala ta hapu tulu-fali emi ma soi-tefa emi fa, nanahu tunga ndoon-na, lamatua daebafak ta.

²²MANETUALAIN soo-supa basa, nae neukose Ana ta la'oela emi fa, nanahu naketu basa soaneu Ana tao emi da'di Ndia anan so

²³La'eneu au soona, sa'di leo been-na, boso nalosak au asala-asingo neu MANETUALAIN nanahu au ta hule-haladoi fe emi fa. Nasafalin-na, neukose au boeo, au anoli akandoo emi nanolik malole ma ndoos.

²⁴Fe ha'da-holomata neu MANETUALAIN ma mamahele neun no lilinekak, ma no emi dale katematuam-ma. Mafandendelek tatao-nono'i matuaina fo Ana tao basan ba'eneu emi so.

²⁵Tehu, metema emi tao mahele sala-singok soona, neukose mopo-mate emi ma emi manem-ma.”