Read Termanu SEMUEL SUSULAK-KA ESAN-NA 13 Bible Online

SEMUEL SUSULAK-KA ESAN-NA 13 - Termanu bible

SEMUEL SUSULAK-KA ESAN-NA 13

¹Nai faik esa, fo lelek Saul da'di manek so boema,

²ana hele hataholi Israel lifun telu; nai hataholi sila-la dalek, hataholi lifun dua loo Saul nai Mikhmas, ma nai Betel dae letelepan-na, ma lifun esa loo anamanen Yonatan leu leo Gibea, fo nai leo Benyamin-na nusan-na. Ana po'i laun bei elak-kala fo ala fali le'us leo esa-esak uman neu.

³Basa boema, Yonatan taonisa Filistin malanga solda'du matuainan manai Geba, de leoina Filistin-na lamanene la'eneu manada'dik ndia. Boema Saul nadenu hataholi-la puu pupuuk-ka nai nusak-ka lala'en-na, fo laloo hataholi Ibrani-la, fo ala tutulumatak soaneu latee-lata'ti.

⁴Basa leoina Israel-la lala'en-na hapu halak, lae Saul taonisa Filistin malanga solda'du matuainan ndia, ma lae hataholi Filistin-nala ta hii hataholi Israel-la lanseli fa. Hu ndia de, laun-na tunga hala nalolook-ka, de lakabubua loo Saul nai Gilgal.

⁵Ndia te, hataholi Filistin-nala boeo lakabubua basa fo sapu-la hataholi Israel-la; sila solda'dun manasa'e kaleta lifun teluhulu solda'du manasa'e ndala lifun nee, ma solda'du-anak de'u solokaek manai tasi su'un-na. Ala ofu nai Mikhmas, fo nai Bet-Awen boboan dulu.

⁶Basa boema, ala sapu-la hataholi Israel-la, nalosa lakahapi-la hataholi Israel-la. Hataholi Israel bubuak esa ke'ke nai leak-kala dalek, ma bolo-bolok manai letek-kala, do nai batu piak-kala lelan-nala, do nai oedolu-la dalek ma bolo dae-la dalek,

⁷Nggelok lena Lee Yarden-na boe, de leu leo Gat no Gilead nusan-dale leu. Saul bei nai Gilgal, ma laun manatungan-nana, ala dele bengge'be no bibii-ka.

⁸ Saul nahani Semuel, faik hitu dalen-na, nandaa no Semuel helu neun, tehu Semuel beita losa Gilgal boen te, laun-na mulai la'oela Saul so.

⁹Hu ndia de, nafa'das nae, “Meni tutunu-hohotu nanatunuk ma tutunu-hohotu mole-dame leo ia mai.” Boema ndia mesak-kana tunu-hotu tutunu-hohotu nanatunuk ndia.

¹⁰Tehu besak-ka ana tunu-hotu basa tutunu-hohotuk sila-la tu'tik-ka, Semuel mai. Saul soluk-kana fo sanga nate'an,

¹¹tehu Semuel natane nae, “Ama Manek tao hata so?” Saul nataa nae, “Au ita laun-na, mulai la'oela au, te Ama mai ta nandaa no li'u fo Ama naketu-ka fa. Bai te, hataholi Filistin-nala lakabubua nai Mikhmas so.

¹²Boema au dodoo, boso nalosak ba'ihanak seluk fa bai te, solda'du Filistin-nala sapu-la au nai Gilgal ia, te se'kona au beita dokodoe MANETUALAIN dale susuen-na fa. Hu ndia de, au ho'i nakeketuk, fo tunu-hotu tutunu-hohotuk sila-la.”

¹³Semuel namanene dede'ak ndia boema, nafa'da Saul nae, “Ama Manek tataon ndia, tatao-nono'i nggoak nanseli. Leounik-ka Ama Manek tunga MANETUALAIN paletan neu Ama Manek-ka soona, tao leo bee o, neukose MANETUALAIN fe nakeketuk, fo Ama Manek ma Ama Manek tititi-nonosin da'di manek Israel losa dodoon-na.

¹⁴ Tehu besak ia, Ama Manek paletan-na, neukose ta nakatatakak fa. Nanahu Ama Manek ta tunga MANETUALAIN paletan-na fa, de MANETUALAIN hele basa hataholi fe'ek fo nahiik-kana, fo Ana so'un da'di manek neu anan-nala.”

¹⁵Basa boema, Semuel la'oela Gilgal, de ana la'ok nakandoo leo Gibea, nai Benyamin nusan-na. Ndia te, Saul palisak solda'dun-nala, de dede'un-na, fafa'kama hataholi natun nee.

¹⁶Saul no anamanen Yonatan, boema solda'dun-nala ofu nai Geba, fo Benyamin nusan-na; ma hataholi Filistin-nala ofu nai Mikhmas.

¹⁷Nai lelek ndia boe, hataholi Filistin nakodaa bubuak telu, leme Filistin mamana ofun-na mai fo lamanako; bubuak ka esa, neu leo Ofra, fo nai Syual nusan-na,

¹⁸ma bubuak ka dua, neu leo Bet-Horon neu, ma bubuak ka telu neu leo dae too fo nasasalematak no Bafak Zeboim-ma, ma moo solokaek-ka.

¹⁹Ta hapu tuka besi nai Israel-lala'en-na fa, nanahu hataholi Filistin-nala ta fe hataholi Ibrani-la loak tao tafaina ma tee-dongi fa.

²⁰Da'di, hataholi Israel-la muse leu leo hataholi Filistin-nala leu, metema ala sanga fofola lamatane sila luku-na, tatatin-nala, takan-nala ma besi lukun-na;

²¹metema fofola taka ma tao nahii ai manai sapi botoliin-na soona, baba'en-na doi anak esa, metema fofola namatane luku do tatatis soona, baba'en-na, doi anak dua.

²²Hu ndia de, nai faik fo natee-natatik-ka nai Mikhmas ndia, ta hapu laun esa boen nai Israel, nanuu tafaina do tee fa, ka'da Saul ma anamanen Yonatan mesak-kasa manuuk.

²³Hataholi Filistin-nala lapadedeik-la uman-naneak esa, fo lanea lahele lete lelak esa nai Mikhmas.