Read Termanu SEMUEL SUSULAK-KA ESAN-NA 15 Bible Online

SEMUEL SUSULAK-KA ESAN-NA 15 - Termanu bible

SEMUEL SUSULAK-KA ESAN-NA 15

¹ Nai faik esa boema, Semuel nafa'da Saul nae, “MANETUALAIN nde nadenu au ndo ei Ama Manek da'di manek neu anan Israel. Hu ndia de, ela leo been-na, Ama Manek mamanene MANETUALAIN Fo Manakoasa paletan-na.

² Neukose Ana huku hataholi Amalek-kala, nanahu sila bei-ba'i kain-nala la'ban hataholi Israel-la, nai lelek hataholi Israel-la mai leme Masir mai.

³Da'di, muu leona, fo sapu-ma hataholi Amalek-kala, fo tao makalulutuk hata-heton-nala lala'en-na. Boso ela hata esa boen; taomisa la'iesak touk-kala, inak-kala, ni'iana-la ma ni'iana bongi beuk-kala; boeo sapi, bi'ilopo, onta ma keledei.”

⁴Boema Saul sadia solda'dun-nala, de ana lekes nai Telaim; hapu solda'du lifun natun dua leme Israel mai, ma hataholi lifun sanahulu leme Yudea mai.

⁵Basa ndia boema, Saul no solda'dun-nala leu sama-sama leo kota Amalek-ka leu, de ala sapu-la musu-a nai lee ma'dak esa dalek.

⁶Boeo, ana haitua fe hataholi Keni-la hala nasanene'dak nae, “La'o leona, fo la'oela hataholi Amalek-kala, fo daenga au boso taoisa emi sama-sama moos, nana makahulun-na emi bei-ba'i kaim-mala, tao basa tia-laik loo hataholi Israel-la, nai lelek hataholi Israel-la mai leme Masir mai.” Boema hataholi Keni-la la'oela mamananak ndia.

⁷Basa ndia boema, Saul natee-nata'ti no hataholi Amalek-kala, de ana sengis leme enok maneme Hawila losa Syur, fo nai Masir boboan dulu.

⁸Saul taonisa la'iesak Amalek laun-nala ma solda'dun-nala. Tehu Saul no solda'dun-nala ho'u-la Agag, fo hataholi Amalek-kala manen-na, tehu ala ta taolisa fan, leondiak boe, bi'ilopon-nala ma sapi ao neulaun-nala, sapianan-nala ma bi'ilopoana maaon-nala, ma hata-heto mabelin lala'en-na; ala taolisa ka'da bana-manu nggo'dadui ma beli taak-kala.

¹⁰Boema MANETUALAIN nafa'da Semuel nae,

¹¹“Au asasale dale, so'u Saul da'di manek, nana ana lepos nasadea Au so, ma ana ta nakalala'ok Au paletang-nga fa.” Semuel dalen-na he'dis-sa, de le'odae katemak esa, ana haladoi neu MANETUALAIN.

¹²Balahaa fafaianan-na boema, Semuel sanga neu natongo no Saul. Nana lafa'dan lae, Saul neu leo kota Karmel-la neu, fo napadedeik ndia batu nasanene'dan-na nai naa, basa soona, nakandoo leo Gilgal neu.

¹³Lelek Semuel natongo no Saul boema, Saul nafa'dan nae, “Sa'di leo been-na, MANETUALAIN ba'e-pala Ama! Au akalala'ok basa MANETUALAIN paletan-na so.”

¹⁴Tehu Semuel natane nae, “Metema leondiak soona, tao le'e de, au amanene sapi nangoe, ma bi'ilopo nakamee?”

¹⁵Saul nataa nae, “Bana sila-la, bana kakalok neme hataholi Amalek-kala mai. Laun-nala ho'i-la bi'ilopo ma sapi maao-la, fo ala tunu-hotun da'di leo tutunu-hohotuk neu MANETUALAIN fo o Manetualaim-ma. Tehu ami taomisa la'iesak ala tunu-hotu ela bana-la.”

¹⁶Semuel namanene dede'ak ndia boema, nafa'da nae, “Mahani dei, te au sanga afa'da hata fo le'odaek-ka Manetualain nafa'dan neu au.” Saul nae, “Mafa'dan leona.”

¹⁷Semuel nafa'da nae, “Ade, Ama Manek ta nde da'di mauli-malangan neu leo-leo Israel-la, leomae Ama Manek mafa'da mae Ama Manek ta kandaak fa. MANETUALAIN hele basa Ama Manek da'di manek neu Israel so,

¹⁸bai te, MANETUALAIN nadenu Ama Manek tao namopo-namate hataholi Amalek mangalauk sila-la. Nananadenuk Ama Manek, fo matee-mata'ti la'ban hataholi sila, losa basas la'iesak-kasa.

¹⁹Tao le'e de, Ama Manek ta tunga MANETUALAIN paletan-na fa? Tao le'e de, Ama Manek sama-sama moo laun-na ho'i bua-lo'a kakalok, de no enok leondiak-ka, Ama Manek taom-ma MANETUALAIN dalen-na ba'ihana?”

²⁰Saul nataa nae, “Au tunga MANETUALAIN, paletan-na so, ma au u atee-atati nandaa no hala-hehelun neu au-a; au foo uni Agag fo Amalek manen-na, da'di hataholi nanafook, ma au taoisa la'iesak hataholi Amalek-kala so.

²¹Tehu au solda'dung-ngala ta taolisa la'iesak bana-manu fa; ala hele-la, ala kalo leni bi'ilopo ma sapi neulauk-kala, fo ala tunu-hotus nai Gilgal da'di leo tutunu-hohotuk soaneu MANETUALAIN fo o Manetualaim-ma.”

²²Tehu Semuel nae, “Beek kande, MANETUALAIN nahiik-kana, tunga do fe tutunu-hohotuk? Tunga neu MANETUALAIN, nde mole lena neme tunu-hotu tutunu-hohotuk. Tunga no dale katematuak, malole lena neme bi'ilopo mina mai.

²³Nana la'ban MANETUALAIN soona, mangalaun-na sama leo hataholi manasuangik-ka, ma dale manakoao-ndaeaok-ka, mangalaun-na, sama leo sene-do'ok neu lamatua daebafak-ka. Hu ka nde Ama Manek la'ban basa MANETUALAIN paletan-na so, de MANETUALAIN boeo, ta manaku Ama Manek da'di leo manek so'on.”

²⁴Saul namanene dede'ak ndia boema, ana manaku neu Semuel nae, “Memak au asala-asingo so. Au la'olena MANETUALAIN paletan-na, ma au ta taoafik neu Ama natutu'dun-na fa. Au bii au solda'dung-ngala, boema au tao atetu nonoken-nala.

²⁵Tehu besak ia, au dokodoe neu Ama, fo fe do'o do ampon neu au sala-singong, ma fali sama-sama moo au leo Gilgal teu, fo daenga au hapu sene-do'ok neu MANETUALAIN.”

²⁶Tehu Semuel nataa nae, “Au ta nau fali sama-sama o Ama Manek fa. Ama Manek la'ban basa MANETUALAIN paletan-na so, de besak ia, Ana ta nau manaku Ama Manek da'di leo Israel manen-na so'on.”

²⁷Boema, Semuel sanga lepos fo ana la'o, tehu Saul nakataka nahelen nenik ana hela ba'du manalun-na, nalosa sii heni ba'du manalu ndia.

²⁸Boema Semuel nafa'dan nae, “Nai faik ia, MANETUALAIN sii ba'e nusak Israel-la neme Ama Manek mai, fo Ana fen neu hataholi fe'ek fo malole lena neme Ama Manek mai.

²⁹Israel Manetualain Fo Mandela-masa'ak-ka, Ana ta nau nasapepeko-nasandandali fa, ma Ana ta nau nggati seluk nakeketun-na boen, nanahu hataholi daebafak ta Ndia fa.”

³⁰Saul nataa nae, “Au asala-asingo basa so. Tehu Ama sue-na, fali sama-sama moo au, fo ela au hapu sene-do'ok neu MANETUALAIN fo Ama Manetualain-na. No enok ndia, Ama fe ha'da-holomata neu au, nai basa au mauli-malangan leoina-la matan, ma nai nusak Israel-la lala'en-na.”

³¹Boema, Semuel fali sama-sama non leo Gilgal neu, de Saul sene-do'ok neu MANETUALAIN.

³²Basa boema, Semuel fe paleta nae, “Moo, Manek Agag-ka leo ia mai.” Agag mai no namahehenak nanseli nanahu ana dodoo nae, “Soe mamates-sa seli so.”

³³Boema Semuel nafa'da nae, “Sama leo o tafainam-ma tao namopo inak makadotok anan-nala so, leondiak boe, neukose mopo o inam, anan-na boe.” Boema Semuel tete'te Agag nai mei tunu-hotuk manai Gilgal-la matan.

³⁴Basa ndia boema, Semuel neu leo Rama neu, ma Manek Saul-la fali leo uman-na, nai Gibea.

³⁵Losa mate Semuel, te ta natongo seluk no Saul fa. Tehu Semuel dalen-na he'dis-sa, nanahu MANETUALAIN nasasale dale, Ana so'u basa Saul da'di Israel manen-na so.