Read Termanu SEMUEL SUSULAK-KA ESAN-NA 18 Bible Online

SEMUEL SUSULAK-KA ESAN-NA 18 - Termanu bible

SEMUEL SUSULAK-KA ESAN-NA 18

¹Saul no Dauk beekola basa boema, Saul so'u Dauk da'di ndia hataholi mana'a ngga'din, de mulai faik ndia boema, ana ta po'in fali leo ina-aman uman neu fa. Yonatan, fo Saul anamanen-na, namanene hala-kokolak sila-la. Dalen-na nahiik no Dauk boe, de ana sue-lain, sama leo ana sue-lai aoinan-na.

³Hu ndia de, Yonatan soo, neukose ana tao tia-laik no Dauk losa dodoon-na.

⁴Yonatan o'duheni ba'du manalun-na, de ana fen leo Dauk neu, boeo ana fen bua papake musun-na no tafainan-na, kokoun-na ma kalikeen-na.

⁵Dauk nakalala'ok basa Saul fen bela-ba'uk-ka no malolen-na. Hu ndia de, Saul so'un da'di malanga solda'du matuaina, nai solda'dun-nala dalek, ma basa solda'du anak-kala loo basa Saul malalau-maoonon-nala, ala hii Dauk.

⁶Lelek Dauk sengi basa Goliat fo hataholi Filistin ndia, de ana fali boema, basa solda'du-la la'ok lakadadalak masok leo kota dale leu, boema basa inak manai kota Israel-la kalua, fo ala soluk Manek Saul-la. Lakamee nakamee namahokok-kala, ma ala foti-longe no lakaminak rebana ma kecapi.

⁷ Basa inak-kala foti-longe, ma lakamee lae leo ia, “Saul taonisa musu lifu-lifu-kala, tehu Dauk taonisa musu kefi-kefin.”

⁸Saul namanene boema, namanasa nanseli. Nana, ana dodoo nae, “Lafa'da lae Dauk taonisa musu kefi-kefin, te au soona, ka'da lifu-lifun. Ba'ihanak seluk faa bai te, tao leo bee o, ala taon da'di manek so!”

⁹Mulai faik ndia, nape'da dalek no Dauk.

¹⁰Balahaa, fo lelek Saul bei nai uman dale no ana ho'u teen-na, te no kaiboik duladalek mangalauk fo Manetualain nadenuk-ka, koasan-nan, nalosa natutu-nafepa sama leo hataholi kamulus-sa. Lelek ndia, Dauk bei nakaminak kecapi sama leo mandoo fai-a.

¹¹Saul dodoo nae, “Au tee, tee ia neu Dauk, fo sapi selik-kana losa papala!” Boema ana tee, tee ndia la'i dua leo Dauk neu, tehu Dauk hapu sili henin.

¹²Saul name'da nae MANETUALAIN nasulu-nahapa Dauk, te MANETUALAIN la'oela ndia so. Hu ndia de, ana bii nanseli neu Dauk.

¹³Boema, ana lali heni Dauk neme uma manek-ka mai, de ana so'un da'di malangan neu solda'du lifun esa. Hu ndia de, Dauk nauli-nalanga solda'dun-nala nai musu dale.

¹⁴Nakalala'ok basa bela-ba'un lala'en-na no malole, nana MANETUALAIN tulu-falin.

¹⁵Lelek Saul nita, nae Dauk sengi tataas esa boema, ana boetai bii Dauk.

¹⁶Tehu Israel lala'en-na no Yehuda sue Dauk, nanahu Dauk nde been-na, mauli-malangan fo tatao-nono'i malolen makadotok.

¹⁷Saul tutu'u nai dalen dale, fo ela hataholi Filistin-nala taolisa Dauk nai musu dale, fo daenga boso ndia nde taonisan-nana. Da'di, nai faik esa boema, Saul nafa'da Dauk nae, “Merab, fo au anafe'o ulung-nga, neukose au balabaen no o, sa'di o matu'du o palanim-ma nai natee-natatik dale soaneu MANETUALAIN.”

¹⁸Dauk nataa nae, “Atam ia see, ma au amang teidalen-nala, sosoa-ndandaan beek nai Israel, de nalosa atam-ma da'di Manek-ka manafeun?”

¹⁹Tehu lelek fain-na losa fo sanga tipa lakabubua Merab no Dauk, te se'kona ala tipa lakabubua inaanak ndia no Adriel neme Mehola mai so.

²⁰Mikhal, fo Saul anafe'on esa seluk bai, ana hii Dauk. Lelek Saul namanene dede'ak ndia boema, ana nau boe.

²¹Ana dodoo nai dalen dale nae, “Malole au fe su'dik Mikhal neu Dauk, fo daenga Dauk tu'da leo hihi'ik dale neu, fo hataholi Filistin-nala taolisan.” Da'di, neu ka la'i duan-na, Saul nafa'da Dauk nae, “Besak ia, o bole da'di au manafeung.”

²²Boema, nadenu basa hataholi mana'a ngga'din-nala, fo ela no denge-dengek, lafa'da Dauk lae leo ia, “Ama Manek sue o, ma basa hataholi mana'a ngga'din-nala boeo leondiak; da'di besak ia, fain-na nandaa ba'eneu o, soaneu sao-ma anafe'ona.”

²³Tehu lelek fo landuku-lalosak sila hahapun ndia neu Dauk boema, nataa nae, “Emi maedaenga, mu'dak la'iesak-kana, da'di manek-ka manafeun do? Au ia, hataholi nuu-taa hata-taak, ma ta kalda'dik fa!”

²⁴Basa hataholi mana'a ngga'di sila-la, lafa'da Dauk hala natataan ndia neu Saul,

²⁵boema Saul nadenus fo lafa'da Dauk lae leo ia, “Fo ama manek nahiik belis-sa, nde ka'da hataholi Filistin natun esa mamae pe'dan-na loun-nala, fo da'di leo babalak neu manek-ka musun-na.” (Saul dale tutu'un-na nde ndia, fo taonisa Dauk, tunga hataholi Filistin-nala liman.)

²⁶Basa Saul hataholi mana'a ngga'din-nala, landuku-lalosak hala heheluk ndia neu Dauk, de Dauk sipok manek-ka nonoken-na. Hu ndia de, beita losa fai nakeketuk-ka fa te, Dauk no solda'dun-nala leu leo nusa Filistin-na leu. Dauk taonisa hataholi Filistin natun dua, boema ana kee-na loun-nala, de ana fes leo Saul neu, no ta kulang esa boen. Basa ndia boema, Saul tipa nakabubua Mikhal no Dauk.

²⁸Leondiak, Saul name'da nae MANETUALAIN nasulu-nahapa Dauk, ma anafe'on Mikhal boeo, ana hii Dauk.

²⁹Boema ana boetai bii-namata'u neu Dauk, de nape'da dalek non nai fai maso'dan-na dalek.

³⁰Metema neu faik beek, fo solda'du Filistin-nala mai sapu soona, Dauk nde taonisa solda'du musu ba'uk-ka, nakalena neme basa Saul malanga solda'du matuaina fe'en-nala mai. Boema Dauk boetai nanakoa-nanakiok.