Read Termanu SEMUEL SUSULAK-KA ESAN-NA 20 Bible Online

SEMUEL SUSULAK-KA ESAN-NA 20 - Termanu bible

SEMUEL SUSULAK-KA ESAN-NA 20

¹Boema Dauk nalai neme Nayot fo deka no Rama mai, de neu leo Yonatan neu, boema natanen nae, “Te au sala beek? Au tao tatao-nono'i mangalauk beek so, ma au tao sala-singo beek soaneu o amam, nalosa ana nau taonisa au?”

²Boema Yonatan nataa nae, “Boso kokolak mae leondia! No MANETUALAIN, na'den-na, neukose ana ta taonisa o fa. Au amang nafa'da dale tutu'un lala'en-na neu au tataas esa, nau dede'a matuaina, do dede'a ana boe. Da'di, au amang ta bisa nafuni dale tutu'un ndia neu au fa. Hu ndia de, o hala kokolam ndia ta la'e fan!”

³Boema, Dauk nataa nae, “O amam bubuluk besa-besa nae o sue-lai au. Da'di, tao leo bee-o, ana ta nau nafa'da dede'ak ndia neu o fa, fo ela o dalem-ma boso he'dis-sa. Tao leo beek boeo, no MANETUALAIN fo maso'dak-ka na'den-na, te'e-te'e au so'dang-nga, sama leo manutolo nai kapa susula pe'dan-na!”

⁴Boema, Yonatan nafa'da nae, “O moke su'di beek ndia boe, neukose au tao atetun.”

⁵ Dauk nataa nae, “Leoiak, balahaa nde been-na, Feta Bula Beuk-ka, de au muse u'a sama-sama o Ama Manek. Tehu metema o nau soona, au la'o fo au u ke'ke nai mook-ka, losa binesak le'odae.

⁶Metema, o amam natane nae, tao le'e de, au ta nai ia fa soona, mafa'dan mae au oke basa neme o mai so, fo o fe au loak fali lai-lai leo Betlehem u, nanahu ala tao feta tutunu-hohotu tunga teuk-ka nai naa, ba'eneu au teidaleng-ngala lala'en-na.

⁷Metema, manek-ka nataa nae, ‘Hei,’ soona, au daleng-nga tesa-tama, tehu metema Ama Manek namanasa soona, bubuluk leona te Ama Manek ho'i basa nakeketuk soaneu ana tao soe au.

⁸Au oke tutulu-fafalik neme o mai, nanahu ita tao basa hengenee-balataak nai MANETUALAIN matan so. Tehu, metema au asala soona, taomisa au, tehu boso fe au leo o amam neu.”

⁹Boema, Yonatan nataa nae, “Dalem-ma boso ba'ihana! Metema au bubuluk, tete'ek-ka au amang dalen-na kisak soaneu tao soe o soona, tao leo bee-o, neukose au afa'da o.”

¹⁰Basa boema, Dauk natane nae, “Metema o amam nataa o no nasak soona, see kande, neukose nafa'da au?”

¹¹Boema Yonatan nae, “Mai fo, ata teu leo mook-ka teu.” Boema ala la'o sama-sama leo mook-ka leu.

¹²Boema, Yonatan nafa'da Dauk nae, “Sa'di leo been-na, MANETUALAIN fo Israel Manetualain-na, da'di ita sakasiin-na. Balahaa fafaik do binesak, fafa'kama nai li'u sama-na leo besak ia soona, neukose au sanga enok, fo au bubuluk au amang dale bobongoanan-na leo beek. Metema, heo-hilun malole soaneu o soona, neukose au haitua fe o halak.

¹³Metema nape'da dalek, fo ana tao soe o soona, tao leo bee-o, neukose au afa'da o boe, fo ela o maso'da. Sa'di leo been-na, MANETUALAIN taonisa au, metema au ta tao atetu dede'ak ndia fa. Sa'di leo been-na, MANETUALAIN, tulu-fali o, sama leo makahulun-na, Ana tulu-fali au amang boe!

¹⁴Ma metema, au bei aso'da soona, mafandendelek ita hehelu-balataan neme MANETUALAIN matan, fo lilineka neu au; tehu metema mate au so,

¹⁵ soona matu'du o lilinekam neu au tititi-nonosing losa dodoon-na. Ma metema MANETUALAIN tao namopo-namate la'iesak o musum-mala soona,

¹⁶boso tao ketu ita dua hehelu-balataan. Metema losa ketun soona, Manetualain nde hukuo-a.”

¹⁷Da'di, soaneu ka la'i duan-na, Yonatan nadenu Dauk naheluk nae, neukose ana sue-lai ndia, nana ndia sue-lai Dauk sama leo ndia sue-lai ndia aoinan-na mesak-kana.

¹⁸Basa boema, Yonatan nafa'dan nae, “Balahaa te, Feta Bula Beuk-ka. De tao leo bee-o, neukose ala bubuluk lae o ta nai ndia fa, nana o mamanam nai mei nana'ak-ka, louk;

¹⁹muda hata no binesak bai! Hu ndia de, muu leo o mamana keke'ke makahulun ndia muu, fo mahani nai batu madodouk manai ndia, dean-na.

²⁰Binesak soona, neukose au kou kokouisik telu leo batu ndia neu, nono'kabai, au kou hata esa.

²¹Boema, neukose au adenu au atang-nga, neu hele kokouisik sila-la, fo metema au afa'dan ae, ‘Wei, kokouisik ndia, nde mata ia seluk bai; de ho'i-man leona,’ soona, ndia sosoan-na nae, o ta hata-hata fa, de bole leo deak mai. Au soo unik MANETUALAIN fo maso'dak-ka, na'den-na, ae o ta nai soe dale fa.

²²Tehu metema, au afa'da au atang-nga ae, ‘Wei, kokouisik ndia, nai dook eli seluk bai,’ soona, ndia sosoan-na nae, MANETUALAIN nadenu o la'o; de la'o leona.

²³Sa'di leo been-na, MANETUALAIN nanea ita, fo ela ita dua ho'u tahele ita dua hehelu-balataan losa dodoon-na.”

²⁴Boema Dauk neu ke'ke nai mook-ka. Neu Feta Bula Beuk-ka boema, Mane Saul-la neu leo feta neu.

²⁵Sama leo mandoo fai-a, de nangatuuk deka papala; Yonatan nangatuuk nasasalematak non, ma Abner nai boboan-na, tehu Dauk kandelan-na louk nahele.

²⁶Tehu Saul ta kokolak manada'dik ndia, nai faik ndia fa, ana dodoo nae, “Fafa'kama Dauk la'ola'di manada'dik esa, nalosa ana ta balisi tunga agama nakaneneten-na.”

²⁷Nai fai binesan-na, fo nde Feta Bula Beuk-ka, faik-ka duan-na Dauk kandelan-na bei louk nahele, boema Saul natane Yonatan nae, “Tao le'e de, huas-sa ma faik ia, Dauk ta nai feta ia fa?”

²⁸Boema, Yonatan nataa nae, “Noke au fen loak, fo neu leo Betlehem neu.

²⁹Nafa'da nae, ‘Fe au loak fo au la'o, nanahu au teidaleng-ngala tao feta tutunu-hohotuk nai Betlehem, de au ka'ang naloo au, fo au u. Hu ndia de, metema o fe au loak soona, au u fo, au atongo o au tolanoong-ngala.’ Hu ndia de, ana ta mai leo feta ia mai fa, Ama.”

³⁰Saul namanene dede'ak ndia boema, namanasa nanseli no Yonatan, de nafa'dan nae, “Ni'iana ama taak, ma malela ha'da taak-konei! Besak ia, au bubuluk ae o mook Dauk, de o makamamaek o aoinam-ma, ma o inam!

³¹Ade o ta mame'da, mae nai lelek Dauk bei naso'da, o ta bisa da'di nusak ia manen-na fa? Besak ia, madenu hataholi neu sangan, fo non leo ia mai, nana muse maten!”

³²Boema, Yonatan nataa nae, “Tao le'e de, muse maten? Sala-singon beek?”

³³Saul namanene dede'ak ndia boema, ana tapa teen-na neu Yonatan, fo ana sanga taonisan. Boema Yonatan bubuluk, nae memak tete'ek-ka, aman nape'da dalek sanga taonisa Dauk.

³⁴Yonatan namanasa nanseli, de ana la'oela mei nana'ak-ka, de nai Feta Bula Beuk ndia, fai ka duan-na, ta na'a-ninu hata esa boen. Dalen-na he'dis nanseli, nanahu ana dudu'a-dodoo ka'da neu Dauk, fo aman Saul nakamumulu-nakamamaek-kana ndia.

³⁵Balahaa boema, Yonatan neu leo mook-ka neu, fo natongo no Dauk, sama leo duas tutu'u basak-ka so. Noo ata touanan esa,

³⁶boema nafa'dan nae, “Ayo, muu hele-ma, au sanga kou kokouisik-kala.” Ni'iana ndia bei nalai neu te, Yonatan kou kokouisik esa, seli heni ni'iana ndia.

³⁷Lelek ni'iana ndia losa kokouisik-ka mamana tutu'dan-na boema, Yonatan bou-bou neun ma nae, “Wei, kokouisik ndia, nde dook eli seluk bai!

³⁸Lai-lai fa dei, fo boso mapangamak!” Ni'iana ndia helen-na kokouisik ndia, de ana fali ne'un leo tuan-na neu.

³⁹Ana ta nalelak Yonatan dede'a-kokolan sila-la tetee-tutu'dan leo beek fa, te ka'da Yonatan no Dauk nde bubuluk-kana.

⁴⁰Basa boema, Yonatan fe kokoun-na leo ni'iana ndia neu, de nadenun ana fali ne'un leo kota neu.

⁴¹Ni'iana ndia la'o boema, Dauk kalua neme batu madodouk ndia dean-na mai, boema ana sene-do'ok la'i telu. Boema duas, esa de'i esa de ala kii. Dauk dale he'din-na, ba'u lena heni Yonatan dale he'din-na.

⁴²Basa boema, Yonatan nafa'da Dauk nae, “Sa'di leo been-na, Manetualain tulu-fali o. Neukose MANETUALAIN nai ita dua tala'da, ma nai ita dua tititi-nonosin tala'da, losa dodoon-na.” Basa ndia boema, Dauk la'o leona, ma Yonatan fali ne'un leo kota neu.