Read Termanu SEMUEL SUSULAK-KA ESAN-NA 22 Bible Online

SEMUEL SUSULAK-KA ESAN-NA 22 - Termanu bible

SEMUEL SUSULAK-KA ESAN-NA 22

¹ Basa boema, Dauk la'oela kota Gat-ta, de neu ke'ke neme leak manadeka no Adulam-ma. Lelek ka'an-nala, ma basa teidalen-nala lala'en-na, lamanene lae Dauk nai ndia boema, ala mai tungan.

²Boeo hataholi nanatuni-ndenik-kala, hataholi mahuta-bu'uk-kala, ma hataholi manadale-he'dik-kala, basa-basas lakabubua loo Dauk, de Dauk da'di sila mauli-malangan. Hataholi manatunga Dauk-ka, dede'un-nala, fafa'kama hataholi natun haa.

³Dauk la'o neme leak ndia mai, de neu leo Mizpa, fo nai Moab, boema nafa'da nusa Moab-pa manen-na nae, “Fe atam-ma ina-aman loak, fo ala leo loo Tuan, losa atam-ma bubuluk, Manetualain tao atam-ma le'e.”

⁴Basa boema, Dauk noo ina-aman leo nusa Moab-a manen-na neu, fo ala leo lahele leme ndia, nai lelek Dauk bei ke'ke nai leak dale.

⁵Nai faik esa boema, nabi esa na'de Gad, ana mai leo Dauk mai, de nafa'da nae, “Boso leo nai leak ia dalek, te no lai-laik muu leo dae Yehuda muu.” Boema Dauk la'o, de neu leo nula Keret dale neu.

⁶Nai faik esa boema, Saul nangatuuk nai ai tamariska huun-na, fo nai pupukuk esa lain, nai Gibea; ana ho'u teen-na, ma basa malanga solda'du matuainan-nala, lapadeik okofeo-lan. Lelek namanene lae Dauk no solda'dun-nala, mamana nafunin-na nanabuluk so boema,

⁷nafa'da basa malanga solda'du matuainan sila-la nae, “Mamanene leona, hai hataholi Benyamin-nala lemin! Ade, touk fo mana'de Dauk ndia, neukose ana fe emi tina ma osi angol do? Ade, neukose ana so'u emi basa-basam-mala, da'di malanga solda'du matuaina nai solda'dun-nala dalek do?

⁸Hu ka nde ndia de, emi malahalak fo la'ban au, de ta hapu hataholi esa boen, nafa'da au nae, au anang-nga nok touk fo mana'de Dauk ndia so hetu? Ta hapu hataholi esa boen, nai emi dalek, ana dudu'a-dodoo au aoinang-nga, do nafa'da au nae Dauk fo au solda'dung-nga, bei nahani fai loak soaneu ana taonisa au, ma nae au anang Yonatan nde nakatutuluk-kana!”

⁹ Doëg, fo Saul malanga manafoo bana-manun nai ndia boe, no basa Saul malanga solda'du matuainan-nala, boema Doëg nae, “Atam-ma nita Dauk neu leo Ahimelekh, fo Ahitub anan-na, nai Nob.

¹⁰Ahimelekh noke natutu'duk neme MANETUALAIN mai, la'eneu hata fo Dauk muse tao-no'in. Fe'ek neme ndia mai, ana fe Dauk tua-lepa boe, ma ana fe Goliat fo hataholi Filistin ndia, tafainan-na leo Dauk neu.”

¹¹Boema, manek-ka nadenu hataholi neu naloo Imam Ahimelekh-ka, ma basa tolanoo ka'a-fa'din lala'en fo manada'di imam nai Nob; boema basa-basas mai lataa manek-ka.

¹²Saul nafa'da Ahimelekh nae, “Mamanene leon, hai Ahitub anan-na!” Ahimelekh nataa nae, “Hei, Ama Manek.”

¹³Saul natanen nae, “Tao le'e de, o malahalak moo Dauk, fo emi la'ban au? Tao le'e de, o fen tua-lepa ma loti, ma o fen tafaina, boema moke fen natutu'duk neme Manetualain mai? Da'di, besak ia, o la'ban au, de o bei mahani fai loak, fo o taomisa au.”

¹⁴Boema, Ahimelekh nataa nae, “Ade, Dauk ta nde Ama Manek malanga solda'du matuainan, fo manalilinekak nanseli fa do? Dauk nde been-na, Ama Manek manafeun-na, nalanga hataholi manamanea Ama Manek-ka, ma basa hataholi manai Ama Manek uma manen dale, fe ha'da-holomata lanseli neun.

¹⁵Memak atam-ma, noke fen natutu'duk neme Manetualain mai so, tehu ndia ta nde ka la'i makasososan fo atam-ma, tao tataos ndia fa. La'eneu ami malahalak fo la'ban Ama Manek-ka, Ama Manek boso makasasa'ek-kana neu au, do neu hataholi esa boen, nai atam-ma teidalen-na dalek. Atam-ma ta bubuluk hata-hata, la'eneu dede'ak ndia fa!”

¹⁶Tehu manek-ka nae, “Ahimelekh! Muse taonisa o moo o tolanoo ka'a-fa'dim lala'en-na.”

¹⁷Boema, ana paleta basa manamanea fo lapadeik deka loon-nana nae, “Ayo, taomisa MANETUALAIN imam sila-la leona! Lalahalak basa loo Dauk so. Ala bubuluk lae Dauk nalai so, tehu ala ta nau lafa'da au fa.” Tehu basa manamanea sila-la, ala ta nau taolisa MANETUALAIN imam sila-la fa.

¹⁸Hu ndia de, Saul nafa'da Doëg nae, “Ayo, lai-lai leona, O nde taomisa hataholi sila-la!” Boema, Doëg tutulumatak, de ana taonisa imam sila-la. Nai faik ndia dalen-na, ana taonisa imam faluhulu lima, fo imam sila-la hapu hak pake ba'du babaa fanak.

¹⁹Saul boeo, ana paleta fo taolisa laiesak laun Nob, fo imam Ahimelekh-ka kotan-na; muse taonisa la'iesak touk, inak, ni'iana, ni'iana nanabongi beuk, sapi, keledei ma bi'ilopo boe.

²⁰Ka'da Abyatar, fo Ahimelekh anan esa mesak-kana, nala deak. Nalai leo Dauk neu,

²¹boema, nafa'dan nae, Saul taonisa basa MANETUALAIN imam-mala so.

²²Boema Dauk nafa'dan nae, “Lelek fo, faik ndia au ita Doëg nai naa boema, au bubuluk te'e-te'e ae, neukose nafa'da Saul. Da'di, au nde lu'a-lepa o tolanoo ka'a-fa'dim mamaten-na.

²³Leo moo au, fo boso bii. Te Saul nahiik taonisa o, tehu nahiik taonisa au boe. Da'di, neukose o so'da-molek nai au mamanang-nga.”