Read Termanu SEMUEL SUSULAK-KA ESAN-NA 24 Bible Online

SEMUEL SUSULAK-KA ESAN-NA 24 - Termanu bible

SEMUEL SUSULAK-KA ESAN-NA 24

¹Dauk la'o neme ndia mai, de neu leo nusak En-Gedi neu, de ana ke'ke neme leak-kala dalek.

²Lelek Saul besak-ka fali ma'in neme natee-natatik no hataholi Filistin-nala mai, te ana hapu halak, nae Dauk nai moo solokaek manadeka no En-Gedi.

³ Boema no lai-laik, Saul hele-na solda'du neulaun lifun telu, neme Israel lala'en-na mai, de leu sanga Dauk no solda'dun-nala, nai Lete Batu Bi'ihii Fuik-ka boboan dulu.

⁴Boema Saul losa bi'i lalae de'ubee, nai enok-ka su'un-na. Leak esa nai ndia boe, de Saul neu leo dalek neu fo nangadeak. Ndia te, Dauk no solda'dun-nala ke'ke nai leak ndia dalek boe, tehu lai leak-ka buin-na.

⁵Boema Dauk solda'dun-nala lafa'dan lae, “Ama hapu fai lelak malole ia so! Ade, MANETUALAIN, ta nafa'da basa Ama nae leo ia, ‘Neukose, Au fe o musu noom-ma leo o limam dale neu, fo o taon su'di bebe'ik-ka hetu!’ ” Basa boema, Dauk danga-danga mesan leo Saul neu, de ana ke'di-na Saul ba'du manalun-na, su'udoon faaanak.

⁶Tehu basa ndia boema, Dauk name'da nasala, nanahu ana tao tataos ndia so.

⁷Boema nafa'da solda'dun-nala nae, “Sa'di leo been-na, MANETUALAIN nanea au, fo au boso nalosak au tao mangalauk neu au maneng fo MANETUALAIN, hele basan so. Au ta bole tao ahe'din faa anak boen, nanahu MANETUALAIN mane hehelen ndia!”

⁸Dauk natetesa-natatama solda'dun-nala dalen-na nae leondia, ma ana ta fe solda'dun-nala loak fo sapu-la Saul fa. Saul fo'a napadeik boema, ana la'oela leak ndia, de ana la'ok nakandoo leleo-lala'on.

⁹Dauk boeo, kalua neme leak ndia dalek mai, de naloo bou-bou neme Saul dean-na mai nae, “Ama Manek!”

¹⁰Saul lipa leo dea neu te, Dauk senek no ha'da-holomata, boema nafa'da nae: “Tao le'e de, Ama Manek mamanene hataholi-la kokolak lae, atam-ma sanga tao soe Ama Manek?

¹¹Besak ia, Ama Manek mita matam, na'kasa neme leak dale ndia, MANETUALAIN, fe basa Ama Manek neu au so. Hataholi esa fufu'di-oodok basa atam-ma, fo taoisa Ama Manek, tehu atam-ma ta nau fa. Atam-ma nataa nae, atam-ma tau nau tao nahe'di atam-ma manen fo MANETUALAIN helek-ka fa.

¹²Au amang mete leona! Mitak au ho'u Ama Manek ba'du manalun-na, bibian-na nde ia. Tunga ndoon-na, atam-ma bisa taonisa Ama Manek dei, tehu atam-ma ka'da ke'di-na Ama Manek ba'du manalun-na, su'udoon faaanak. Da'di, tete'ek-ka, atam-ma ta nanuu dudu'a mangalauk, do nalelesi Ama Manek fa. Ama Manek usi atam-ma do'e-do'e, fo taonisa atam-ma, leomae atam-ma ta nasala Ama Manek faa anak boen.

¹³Sa'di leo been-na, MANETUALAIN nde naketu ita dua, se kande nasala! Sa'di leo been-na, MANETUALAIN nde balas Ama Manek tatao-nono'in la'eneu atam-ma, tehu neukose atam-ma, ta tao nahe'di Ama Manek faa anak boen

¹⁴Ama Manek nalelak dede'a bini makahulun eli esa, nde ia nae, ‘Ka'da hataholi mangalauk-ka nde, tao tatao-nono'i mangalauk-ka.’ Hu ndia de, neukose atam-ma ta tao nahe'di Ama Manek fa.

¹⁵Taoafik neu atam, fo mane Israel-la sanga taonisan ia. Mete atam fo nanausi do'e-do'ek ia! Atam-ma, ka'da busa mates esa, ma utu esa mesak-kana.

¹⁶Neukose, MANETUALAIN da'di manakee-manafula neu ita dua. Sa'di leo been-na, Ana palisak dede'ak ia, fo nasala'e atam-ma, boema Ana soi-tefa-na atam-ma neme Ama Manek mai.”

¹⁷Dauk kokolak basa dede'ak sila-la boema, Saul nafa'da nae, “Hai Dauk anang-ngonei, o nde ndia do?” Boema ana kii.

¹⁸Boema nafa'da Dauk nae, “O nde la'en-na, te au nde sala.

¹⁹Au tatao-nono'ing mangalaun neu o-a, o balas-sana nenik malole so. Nai faik ia, o matu'du basa mae, o manuu dudu'a malole soaneu au, hu ndia de, o ta taomisa au fa, leomae MANETUALAIN fe basa au neu o so.

²⁰Kikisak-ka de fo besak-ka hapu, hataholi esa natongo no musu noon-na, tehu ana ta taonisa musu noon ndia fa! Da'di, sa'di leo been-na, MANETUALAIN ba'e-pala o, hu kande o tatao-nono'i malolem soaneu au, nai faik ia!

²¹Besak ia, au amahele te'e-te'e ae, neukose o da'di manek neu Israel, ma ae neukose nusa Israel-la natea-nahele nakandoo nai o paletam dae.

²²Besak ia maheluk mo Au mae no MANETUALAIN neukose o ta taomisa au tititi-nonosin, boema neukose o ta tao mamopo au teidale bobongin na'den-na!”

²³Boema Dauk ana soo nae neukose au tao tunga hata fo o moken. Basa boema Saul fali leo uman-na neu, ma Dauk no solda'dun-nala fali leo mamanak keke'ken-na neu.