Read Termanu SEMUEL SUSULAK-KA ESAN-NA 25 Bible Online

SEMUEL SUSULAK-KA ESAN-NA 25 - Termanu bible

SEMUEL SUSULAK-KA ESAN-NA 25

¹Basa boema, mate Semuel. Basa hataholi Israel-la lala'en-na, lakabubua fo ala kii-makaleleu. Basa boema, latoin nai uman-na nai Rama. Basa ndia boema, Dauk neu leo moo solokaek Paran-na neu.

²Touk esa nai kota Maon-na, na'de Nabal, ana da'di neme leo-ingu Kaleb-pa mai. Touk ia, nanuu dae soaneu bana-manun-nala. Dae ndia, deka no kota Karmel-la. Touk ia, namasu'i hatu-hatu. Bi'ilopon lifun telu, ma bi'ihiin lifun esa. Saoinan Abigail, dodole maneu ma mata makeek, tehu Nabal ha'da-tataon sela-selak mesan, ma ha'da-paliin mangalauk. Faik esa boema, Nabal nggute bi'ilopon-nala bulun-na, neme Karmel.

⁴Lelek Dauk, fo bei nai moo solokaek-ka, namanene dede'ak ndia,

⁵boema nadenu touanak 10, leu leo Karmel leu,

⁶soaneu latongo loo Nabal, fo landuku-lalosak Dauk nate'an-na neun. Nadenus, fo leu lafa'da Nabal lae leo ia, “So'da-molek soaneu o, ma soaneu o teidalem-mala, boema soaneu o hata-hetom lala'en-na.

⁷Au amanene lae o nggute o bi'ilopom-mala bulun-na. Fo ela o bubuluk leona, te o manafoom manai ami nusam-ma, ami beita taos le'e esa boen, ma nai lelek lai Karmel-la, beita mopo nita, sila hatan esa boen.

⁸So'ba matane mitak-kasa, te tao leo bee-o, neukose ala ta lalelesi dede'ak ndia fa. Hu ndia de, au amahena, fo ela o sipok au solda'dung-ngala no malole nai o umam, nanahu ami mai la'e, fai matua ia. Boeo, fe o atam ia-la, ma au, Dauk fo o tia-lai malolem-ma, su'di beek fo, o mahiik fen tunga o dale hihiim-ma.”

⁹Dauk solda'dun-nala losa Karmel boema, no Dauk na'den-na, landuku-lalosak hala heheluk ndia neu Nabal, boema lahani.

¹⁰Tehu Nabal nataa nae, “Dauk? See ndia? See, Isai ana ndia, see ndia? Au beita amanene ita, la'eneu hataholi ndia fa. Nai fai besak ia, ata ba'uk-ka nai nusak ia, lalai leme tuan-nala mai!

¹¹Masa bole, au ho'i-a au loting, ma au oe nininung, boema au sadia basa paa soaneu au hataholi mananggute bi'i bulung-ngala, fo au fes leo hataholi fo dada'di-momolin ta mangale'dok ndia fa!”

¹²Boema, Dauk solda'dun-nala fali le'us leo Dauk leu, de lafa'da Nabal hala-kokolan sila neu Dauk.

¹³Dauk fe paleta nae, “Esa-esak pa'a tafainan-na neu kale'bon-na!” No lai-laik, Dauk solda'dun-nala, ala tao tunga paleta ndia. Dauk boeo, ana pa'a tafainan-na neu kale'bon-na, de fafa'kama ana la'o no hataholi natun haa, ma ana la'o ela hataholi natun dua, fo lanea bua-lo'as.

¹⁴Ndia te, Nabal malalau-maoonon esa, nafa'da basa Nabal saoinan Abigail nae, “Ina namanene so do beik? Dauk nadenu hataholi de'ubee, leme moo solokaek-ka mai so, fo ala fe nate'ak neu ita tuan-na, tehu tuan dodoki-aalis.

¹⁵Te se'kona, hataholi sila-la, malolen-na seli neu ami. Ala beita tao ami le'e esa boen, ma beita mopo nita ami hatam esa boen, nai lelek ami tao tia-laik moos neme moo solokaek-ka.

¹⁶Lele'do-le'odaen, lasulu-lahapa ami, nai lelek ami foo bi'ihiik, bi'ilopo deka moos.

¹⁷Hu ndia de, tai-dodoo dede'ak ia, fo ho'i nakeketuk tunga hata fo Ina bisa taon. Nana, tao leo bee-o, neukose babalan-na ana mai, soaneu ita tuan-na, ma neu basa teidalen-nala lala'en-na. Ita tuan-na, langa batu nanseli, nalosa ana ta nau ita kokolak too fan!”

¹⁸Boema no lai-laik, Abigail ho'in-na loti biak natun dua, ma alukosu bana louk dua, henuk no angol, paa bi'ilopo lima nanadalak, gandum nanadalak, kilo sanahulu hitu, angol boa tuuk, nggik natun esa, ma kokis kaa boak natun dua. Ana fua basa sila-la, leo keledein-nala lain neu.

¹⁹Boema, nafa'da malalau-maoonon-nala nae, “Emi la'ok makahuluk, fo au tunga emi deam-ma.” Tehu ana ta kokolak no saotoun-na, nae le'e esa boen.

²⁰Abigail sa'e keledein-na, de lelek ala losa eno heheok esa, nai letek-ka boboan-na boema, nandaa no Dauk no solda'dun-nala, ala kona leme letek lain mai, de ala la'ok lasale leo Abigail mai.

²¹Nai hatematak ndia, Dauk dodoo nae, “Palsuma la'iesak-kana, au anea hataholi ndia hata-heton nai moo solokaek-ka! Ta mopo hata-heton esa boen; tehu besak ia, ana balas au dale maloleng-nga nenik mangalauk!

²²Sa'di leo been-na, Manetualain taonisa au, metema, au ta taoisa basa touk manai naa-la fa, te le'do beita tii fa!”

²³Lelek Abigail nita Dauk boema, ana kona lai-lai neme keledein lain mai, de ana senek neu Dauk ein-na,

²⁴boema nafa'dan nae, “Au Tuang-ngonei, sa'di leo been-na, mamanene dei! Nemen-na, fo atam-ma lu'a-lepa aon, salak ndia!

²⁵Au Ama Maneng-nga, boso dudu'a-dodoo Nabal, fo hataholi sosoa-ndandaa tak ndia! Ndia, hataholi nggoak sama leo na'den-na, sosoa-ndandaan. Atam-ma ta nita au Ama Maneng nadenu hataholi sila-la fa.

²⁶Manetualain kena-ka'i basa au Ama Manek, fo boso balas ma taomisa Tuan musun-nala. Ma besak ia, au Tuang-ngonei, au no MANETUALAIN fo maso'dak-ka, atam-ma soo, sa'di leo been-na, au Ama Maneng musun lala'en-na, ma hataholi see fo nahiik tao soe au Ama Maneng ua-nalen, sama-na leo Nabal ua-nalen.

²⁷Sipo-ma, popotik fo atam-ma nenik ia, soaneu au Ama Manek ma soaneu au Tuang-nga solda'dun-nala

²⁸Fe ampon neu atam-ma, salan ia. Tao leo bee-o, neukose MANETUALAIN tao au Ama Maneng, no au Ama Maneng tititi-nonosin, da'di manek neu Israel, nana au Ama Maneng-nga natee-nata'ti soaneu MANETUALAIN; ma nai au Ama Maneng fai maso'dan-na dalek, au Ama Maneng ta tao tatao-nono'i mangalauk fa.

²⁹Leouni'ka, hataholi esa, sapu-na au Ama Maneng, fo ana so'ba taonisa au Ama Maneng soona, tao leo bee-o, neukose MANETUALAIN nasulu-nahapa au Ama Maneng, sama leo hataholi mahata-hetok-ka, nanea hata-heton. Tehu neukose, MANETUALAIN tapa heni au Ama Maneng musun-na, leo dook eli neu, sama leo hataholi manaho'u pipiluk-ka, ana pilu batu-a leo dook eli neu.

³⁰Neukose MANETUALAIN tao basa malole lala'en, fo Ana helun neu au Ama Maneng, de ta dook-ka so'on te, Ana tao au Ama Maneng da'di manek neu Israel.

³¹Nai lelek ndia, neukose au Ama Maneng nafandele nae au Ama Maneng nanisa tunga enon-na, ma naketu-nala'di tunga matetun-na, nalosa au Ama Maneng ta paluu dale he'di, do nasasale dale fa. Ma metema, MANETUALAIN fe au Ama Maneng baba'e-papalak soona, boso mafandele heni au Ama Maneng atan ia.”

³²Boema Dauk nafa'dan nae, “Kokoa-kikiok neu MANETUALAIN, fo Israel Manetualain-na, nadenu o mai matongo moo au, nai faik ia!

³³Kokoa-kikiok neu o manatee-tenom-ma, ma kokoa-kikiok neu o mesam-ma boe, nanahu o kena-ka'i au tao kanisak, ma au aketu-ala'di tunga au dale hihii-nanau mesang-nga.

³⁴MANETUALAIN kena-ka'i basa au, fo au boso tao mangalauk neu o. No MANETUALAIN, fo Israel Manetualain fo maso'dak-ka na'den-na, leouni'ka o ta matongo moo au no lai-laik fa soona, tao leo bee-o, le'do tii mai te, mate la'iesak touk manaleo loo Nabal-la!”

³⁵Basa ndia boema, Dauk sipon-na Abigail neni fen popotik-ka, boema nafa'dan nae, “Fali mu'um-ma leo o umam muu leona, fo boso bii. Te au sipok o nonokem-ma.”

³⁶Lelek Abigail fali ne'un leo Nabal neu, te se'kona hapu feta matua nai uman, sama leo feta manek-ka. Ma hu kande Nabal mafuk ma namahoko-setelee, de le'odaek ndia, saoinan-na, ta kokolak non hata esa boen, losa balahaa.

³⁷Balahaa fafaik, de Nabal langan-na lea boema, saoinan-na tuin basa tatao-nono'i mangalauk sila la lala'en-na. Boema, Nabal hapu he'dis-sa nai bade'en-na, de basa aon-na lala'en-na, da'di lu'uk.

³⁸Fafa'kama, ta'da faik sanahulu boema, MANETUALAIN fe he'dis-sa la'e seluk bade'en-na de maten.

³⁹Dauk namanene Nabal maten boema nafa'da nae, “Koa-kio MANETUALAIN! Nanahu Ana balas Nabal dodoki-aali au, boema Ana kena ka'i au fo ela au boso tao mangalauk. MANETUALAIN huku basa Nabal nanahu tatao-nono'i mangalaun-na.” Basa boema, Dauk nadenu hataholi neu adu-natane Abigail, fo ana taon da'di ndia saoinan.

⁴⁰Boema, Dauk nadenu hataholi-la losa Abigail uman-na nai Karmel, de lafa'dan lae, “Dauk nadenu ami mai leo Ina uman mai, nana nahiik adu-natane Ina, da'di ndia saoinan.”

⁴¹Abigail fo'a napadeik, de ana sene-do'ok ma nafa'da nae, “Au ia, Dauk atan, de au sadia safe basa atan-nala ein-na.”

⁴²Basa boema, naheheleaon no lai-laik. Ana sa'e leo keledein lain neu, de malalau-maoono inaanan lima tungan, de ala la'o sama-sama loo Dauk nadenu hataholi-la, boema no Dauk sao leona.

⁴³Lelek Dauk beita sao Abigail fa, te ana ka'bing basa no Ahinoam, neme Yizreel mai so, de besak ia, Abigail da'di Dauk saoinan boe.

⁴⁴Ndia te, Saul fe anafe'on Mikhal, fo Dauk saon-na leo Palti, fo Lais neme kota Galim-ma, anan-na.