Read Termanu SEMUEL SUSULAK-KA ESAN-NA 26 Bible Online

SEMUEL SUSULAK-KA ESAN-NA 26 - Termanu bible

SEMUEL SUSULAK-KA ESAN-NA 26

¹ Faik esa boema, hataholi-la, ala mai leme Zif mai leo Saul nai Gibea, fo lafa'dan lae, Dauk bei ke'ke nai Letek Hakhila, nai moo salokaek Yehuda su'un-na.

²Boema, no lai-laik, Saul no solda'du neulauk lifun telu, nai Israel, de leu leo moo solokaek Zif-fa leu, fo ala sanga Dauk.

³Dauk, fo nai moo solokaek-ka, namanene lae Saul tungan losa nai moo solokaek-ka so.

⁴Boema nadenu mata-mata leu meten, de ana bubuluk, tete'ek-ka Saul nai ndia.

⁵Boema, no lai-laik, Dauk neu leo Saul mamana ofun-na neu, de ana hapu Saul ofun na, tehu Saul sungu deka no Abner, fo Ner anan-na. Saul ofun ndia, nai tala'da heon, boema solda'dun-nala ofu okofeo-lan.

⁶Basa boema, Dauk natane Ahimelekh, fo hataholi Het ndia, ma Abisai, fo Yoab tolanoon-na. (Duas inan nde Zeruya), nae, “See napalani masok sama-sama no au, leo Saul ofun dale neu.?” Abisai nataa nae, “Au!”

⁷Boema, nai le'odaek ndia, Dauk no Abisai loi-loi mesan leo mamana ofu ndia dalek leu, de lita Saul bei sungu nai mamana ofu ndia, tala'da heon, ma ana falak teen-na nai dae lain, deka no langan-na Abner no solda'dun-nala sungu okofeo-la Saul.

⁸Boema Abisai nafa'da Dauk nae, “Nai le'odaek ia, Manetualain fe basa o musum-ma neu o so. Fe au loak, fo au ho'i-a teen-na, fo au pau seluk-kana neu aon-na, fo ana tola losa dae lain, au pau isan nenik ka'da paun la'i esa, fo ta paluu la'i dua so'on!”

⁹Tehu Dauk nae, “Boso taon le'e esa boen! Tao leo bee-o, MANETUALAIN huku hataholi fo manatao mangalauk neu manek fo Ana helek-ka.

¹⁰No MANETUALAIN fo maso'dak-ka na'den-na, au bubuluk ae mahani te, neukose MANETUALAIN nde taonisa Saul, metema fai mamaten-na losa so, do metema maten nai natee-natatik dale.

¹¹Sa'di leo been-na, MANETUALAIN kena-ka'i au boso taoisa manek fo, Ana helek-ka. Ka'da ho'i-ma teen-na, ma boto oen-na, fo ata la'o!”

¹²Boema, Dauk ho'in-na Saul teen-na ma boto oen ndia, neme Saul langan-na mai, boema ala la'o leona. Ta hapu hataholi esa boen, nita manada'dik ndia, do ana bubuluk hata da'di so, do ana nggenge boe, nana MANETUALAIN taon-na basa-basas sungu lamanee.

¹³Boema, Dauk lena leo bafak fe'ek su'un-na neu, de ana losa letek-ka poin-na, nalosa dook-ka neme Saul mamana ofun-na mai.

¹⁴Basa boema, Dauk naloo bou-bou neu Abner ma Saul solda'dun-nala nae, “Abner! O mamanene au halang-nga do ta?” Abner boeo, naloo bou-bou nae, “O ia see, fo mananggasi au-auk ndia?”

¹⁵Boema Dauk nataa nae, “Abner, ade o ta nde hataholi palani ta'ti batu nai Israel hetu? Tao le'e de, o ta manea o tuam, fo ama manek fa? Besak-ka, hataholi masok leo o mamana ofum dale neu, fo taonisa o tuam-ma.

¹⁶O ta makalala'ok mabe'i, o bela-ba'um fa, Abner! No MANETUALAIN fo maso'dak-ka na'den-na, emi basa-basam-mala mandaa mate, nanahu emi ta manea emi tuam, fo nde MANETUALAIN hele manek-ka fa. So'ba mete su'dik, manek-ka teen-na nai bee. Boto oe fo, na'kasa neme langan-na boboan-na, nai bee?”

¹⁷Saul nalelak Dauk halan-na, de nafa'da nae, “Dauk, o nde ndia, anang-ngo do?” Dauk nataa nae, “Hei, Ama Manek”

¹⁸Boema, nafa'da seluk nae, “Tao le'e de, Ama Manek bei usi do'e-do'e no atam-ma? Ade atam-ma sala beek?

¹⁹Ama Manek, mamanene atam-ma dokodoen ia. Leounik-ka, MANETUALAIN nde nadenu Ama Manek, fo daenga la'ban atam-ma soona, tunu-hotu tutunu-hohotuk esa, fo neukose ana hapu tao natenak heni nasa-melun neu atam-ma. Tehu, leounik-ka, manamadenu Ama Manek ndia, nde been-na, hataholi daebafak soona, sa'di leo been-na, MANETUALAIN soo-supas! Nanahu no sila tatao-nono'in ndia de, atam-ma nanausi henik neme MANETUALAIN dae-na mai, de no nakasetik, atam-ma muse neu leo mamana fe'ek, fo nai bee, atam-ma muse sene-do'ok neu lamatua daebafak nusa dea-la.

²⁰Boso po'ilotak atam-ma mate nai dae nusa dea, fo dook-ka neme MANETUALAIN mai. Sosoak hata, mane Israel-la mai, ka'da soaneu taonisa utu esa, sama leo atam ia? Sosoak hata, ana sopu atam-ma, sama leo hataholi-a sopu manu fuik-ka?”

²¹Boema, Saul nataa nae, “Au tao salak so. Dauk, anang-ngo, fali leona! Neukose au ta tao mangalauk neu o so'on, nanahu le'odaek-ka, o ta taomisa au fa. Tete'ek-ka, au ha'da-paliing nggoak. Au asala te'e-te'e so!”

²²Tehu Dauk nataa nae, “Ama Manek teen-na nde ia, de Ama Manek madenu Ama Manek solda'dun esa mai leo ia mai, fo ana ho'i-nan.

²³Neukose MANETUALAIN fe baba'e-papalak neu hataholi see fo ana lilineka, ma ana tao tunga matetun-na. Nana, leomae nai faik ia, MANETUALAIN fe Tuan neu au, tehu au ta nau tao mangalauk neu Tuan, fo manek MANETUALAIN helek-ka.

²⁴Da'di, sama leo au po'ilotak Ama Manek nasoda nai faik ia, leondiak boe, sa'di leo been-na, MANETUALAIN nasulu-nahapa au, ma Ana se'i-po'i au eme soe lala'en-na mai!”

²⁵Boema, Saul nafa'da Dauk nae, “MANETUALAIN fe o baba'e-papalak, anang-ngo! Neukose o hapu buna-boak nai basa o ue-le'dim lala'en-na dalek!” Boema, Dauk la'ok nakandoo leleo-lala'on, ma Saul fali ne'un leo uman-na neu.