Read Termanu SEMUEL SUSULAK-KA ESAN-NA 3 Bible Online

SEMUEL SUSULAK-KA ESAN-NA 3 - Termanu bible

SEMUEL SUSULAK-KA ESAN-NA 3

¹Ndia te, Semuel fo bei ni'iana ndia, nalalau-naoono MANETUALAIN nai Eli paletan-na dae. Nai tepo-lelek ndia, la'i esa-la'i esa de'i fo, hapu hala heheluk ma ninitak neme MANETUALAIN mai.

²Nai le'odaek esa boema, Eli fo namalasin-nanseli ma hihii nae poken ndia, ana bei sungu nai kaman dale,

³ma Semuel sungu deka no MANETUALAIN, Peti Hehelu-balataan-na, nai Lalaa Temak malalao-malalafuk dale. Lelek beita dulufula, ma banuk-ka bei pila,

⁴MANETUALAIN naloo Semuel, boema Semuel nataa nae, “Ou Ama!”

⁵Basa boema, nalai leo Eli neu, de nafa'dan nae, “Te beek Ama? Tao le'e de, maloo au?” Tehu Eli nataa nae, “Au ta aloo o fa, de muu sungu seluk.” Boema Semuel neu sungu seluk.

⁶Basa boema, MANETUALAIN naloo seluk Semuel, tehu Semuel ta bubuluk nae MANETUALAIN nde manamalook ndia fa, nana MANETUALAIN beita kokolak nita no fan. Hu ndia de, ana fo'a, boema neu leo Eli neu, de natane nae, “Te beek Ama? Tao le'e de, Ama maloo?” Eli nataa nae, “Au ta aloo o fa anang-ngo; muu sungu seluk.”

⁸Soaneu ka la'i telun-na, MANETUALAIN naloo Semuel; boema Semuel fo'a de neu leo Eli neu, de nafa'dan nae, “Te beek Ama? Tao le'e de, Ama naloo?” Nai hatematak ndia nde Elia name'da nae MANETUALAIN nde naloo ni'iana ndia.

⁹Hu ndia de, nafa'da Semuel nae, “Sungu seluk leona, fo metema naloo seluk o soona mafa'da mae, ‘Kokolak leona, MANETUALAIN fo atam-ma namanene.’ ” Boema Semuel fali seluk leo pepe'un-na neu.

¹⁰Basa boema, MANETUALAIN mai, de napadeik neu mamanak ndia, boema naloo seluk nae, “Semuel, Semuel!” Boema Semuel nataa nae, “Kokolak leon MANETUALAIN fo atam-ma namanene.”

¹¹Boema MANETUALAIN nafa'dan nae, “Neukose Au tao hata esa, neni bibii-namata'u matuaina soaneu hataholi Israel-la, nalosa hataholi mananamanenen-nana, neukose napangamak.

¹²Nai faik ndia, neukose Au tao basa hata lala'en, fo Au fe basa nasanene'da mahelek neu Eli teidale-bobongin-nala neme makasososan-na, losa mate'en-na.

¹³Au afa'da basan ae neukose Au huku teidale-bobongin-na losa dodoon-na, nanahu anan-nala lakamumulu-lakamamaek basa Au so. Eli bubuluk sila sala-singon ndia, tehu ta namanasa fas.

¹⁴Hu ndia de, Au soo-supa fe Eli teidale-bobongin-na, ae leomae tutunu-hohotuk do tunu-hotu matak leo beek ndia boeo, neukose ta hapu lose heni sila sala-singo matuainan ndia, losa dodoon-na.”

¹⁵Basa ndia boema, Semuel sungu seluk, de fafaik boema ana fo'a, de ana soi heni MANETUALAIN Uman-na lelesun-nala. Ana bii nafa'da ninitak ndia neu Eli,

¹⁶tehu Eli naloon, de nafa'dan nae, “Semuel, anang-ngonei.” Semuel nataa nae, “Ou Ama.”

¹⁷Eli natane nae, “Ade MANETUALAIN nafa'da o beek-ndia? Tui la'iesak-kana neu au. Metema o ta tui la'iesak-kana fa soona, tao leo bee-o, Manetualain huku o.”

¹⁸Boema Semuel nafa'da la'iesak-kana neu Eli. Ta nafuni dede'ak de'ek esa boen. Basa boema Eli nafa'da nae, “MANETUALAIN nde ndia, de nemen-na, fo Ana tao hata fo Ana meten malole.”

¹⁹Semuel boetai namatua-ka. MANETUALAIN sama-sama non, de Ana tao-na basa hata lala'en-na fo Semuel nafa'dak-ka, tete'ek-ka ana da'di.

²⁰Hu ndia de, basa hataholi Israel fo maleme nusak ndia lala'en-na mai, ala manaku lae Semuel nde been-na, MANETUALAIN nabin. Nai lelek Semuel kokolak soona, basa leoina Israel-la lamanenen. MANETUALAIN bei natu'du nakandoo aoinan-na nai Silo, fo nai bee, soaneu ka la'i makasososan-na, natu'du aoinan-na neu Semuel, de Ana kokolak non.