Read Termanu SEMUEL SUSULAK-KA ESAN-NA 30 Bible Online

SEMUEL SUSULAK-KA ESAN-NA 30 - Termanu bible

SEMUEL SUSULAK-KA ESAN-NA 30

¹ Basa faik dua boema, Dauk no solda'dun-nala fali le'us leo Ziklag leu. Lelek ala losa naa boema, ala hapu halak lae hataholi Amalek-kala, sapu-la nusa Yehuda boboan kona, ma ala sapu-la Ziklag boe. Ala ta taolisa hataholi esa boen. Tehu ala hotu heni kota ndia, de ala la'ok lakandoo sila leleo-lala'on, no loo inak-kala, ni'iana-la, ma laun fe'e-fe'ek-kala. Ala foo leni Dauk no solda'dun-nala teidalen-nala boe, fo Dauk saoinan duas, fo nde Ahinoam ma Abigail, lai dalek boe. Dauk no solda'dun-nala dalen-nala he'dis nanseli, nalosa ala ta hahae kikii-makaleleuk-ka fa, losa ala sota-mangu lanseli.

⁶Dauk solda'dun-nala, susa lanseli, nanahu mopo sila sao-anan-nala. Hu ndia de, ala sanga tapa Dauk nenik batu. Da'di, Dauk nai toto'a-sosota matua dale, tehu MANETUALAIN fo ndia Manetualain-na, natetea-nahehele seluk dalen-na.

⁷ Boema, Dauk nafa'da Imam Abyatar, fo Ahimelekh anan-na nae, “Meni ba'du babaa fanak ndia, leo ia mai!” Boema, Abyatar neni fen ba'du babaa fanak ndia.

⁸Basa boema, Dauk natane MANETUALAIN nae, “Au nuse u usi musu manasapuk sila-la do? Au usi tungas fo au hapus do ta?” Boema, MANETUALAIN nataa nae, “Hei, usis leona; neukose o hapus, fo o moo falik basa hataholi nanafook-kala.”

⁹Boema, Dauk la'o sama-sama no solda'du natu ka neen-nala, Lelek ala losa Lee Besor-ra boema, Dauk la'o nakandoo leleo-lala'on, sama-sama no hataholi natun haa, ma ana la'oela hataholi-hataholi natun dua leme ndia, nanahu ala sota-mangu lanseli so, de ala ta lena labe'i Lee Besor-ra so'on.

¹¹Nai leleo-lala'ok ndia dalek, Dauk solda'dun-nala latongo loo ni'iana touana Masir esa, neme mook-ka mai, boema loon leo Dauk neu. Ala fen na'a-ninu,

¹²ala fen kokis kaa boak, ma angol boa tuuk nggik dua boe. Na'a basa boema, be'i-balakain fali ma'in; te se'kona ta na'a-ninu faik telu dalen-na so!

¹³Basa boema, Dauk natanen nae, “O tuam-ma nde see, ma o meme bee mai?” Ni'iana ndia nataa nae, “Au hataholi Masir, fo hataholi Amalek esa, atan au. Au tuang-nga la'oela au ndek faik telu maneuk-ka so, nanahu au amahe'di.

¹⁴Ami sapu-ma hataholi Kreti-la nusan-na, nai Yehuda boboan kona, ma leo-ingu Kaleb-pa nusan-na, ma ami hotu heni kota Ziklag-ka so boe.”

¹⁵Boema, Dauk natanen nae, “Ade, o nau moo au leo solda'du sila-la mamanan-na neu do?” Boema, ni'iana ndia nataa nae, “Au nau, sa'di Tuan naheluk no au nenik Manetualain na'den-na, mae Tuan ta taonisa au, do Tuan fe falik au leo au tuang-nga liman neu.”

¹⁶Boema, nos leo solda'du sila-la mamanan-na neu. Nai lelek ndia, solda'du sila-la lapanggela lai basa mamanak ndia lala'en-na, boema la'a-linu ma ala feta-dote, nanahu ala kalo leni bua-lo'a kakalok makadotok leme nusa Filistin ma Yehuda mai.

¹⁷Nai lelek neu fai balahaan-na, dulufula boema, Dauk sapu-nalas, de natee-natatik-ka losa le'odae. Musu-a hataholin esa boen, ta hapu nala deak fa, de maso'dak ka'da ta'eanak natun haa, nana ala sa'e onta de lalai.

¹⁸Dauk hapu ho'i neni falik basa hataholi Amalek-kala kalo leni basa hata lala'en-na, ma saoinan duas boe;

¹⁹ta mopo hata esa boen. Basa ni'iana touana-inaanak boema basa bua-lo'a kakalok lalaen fo hataholi Amalek-kala ho'i laa-ka, Dauk ho'i falik-kasa.

²⁰Fe'ek neme ndia mai, Dauk boeo, ana kalo neni la'iesak bi'ilopo-la ma bana-manu. Dauk solda'dun-nala foo bana sila-la lai uluk te ta lakabubua loo bua-lo'a kakalo fe'ek-kala fa, boema lafa'da lae, “Dauk baba'en-na nde ia!”

²¹Basa ndia boema, Dauk fali leo hataholi natu ka duak fo ala ta tungan nanahu ala sota-mangu, de ana la'o elas leme Lee Besor-ra su'un-na. Ala soluk Dauk no solda'dun-nala, de Dauk nate'as.

²²Tehu nai Dauk solda'du manatunga sama-sama loon-na dalek, hapu nggelok dalen-nala mangalauk, ma tenepetak. Lafa'da lae, “Hataholi ia-la ta tunga fa; da'di, sila ta lanuu hak, hapu hata esa boen neme bua-lo'a kakalok sila-la mai fa. Ka'da sila bole ho'i-la falik sila sao-anan, fo ala fali le'us.”

²³Tehu Dauk nataa nae, “Au tolanoong-ngala lemin, emi boso tao leondiak neu hata fo MANETUALAIN fen neu ita so! Ade, Ana ta nasulu-nahapa ita fa, ma Ana ta fe ita sengi solda'du nakodaa sila-la fa do?

²⁴Da'di, hataholi esa boen, ta bole sipok hala nonokek ndia fa! Basa-basan muse hapu baba'ek beke dede'uk; Hataholi manamanea bua-lo'as-sala, muse hapu baba'ek sama, sama leo hataholi manaleu latee-lata'ti boe.”

²⁵Basa boema, Dauk tao dede'ak ndia, da'di neu nakanenetek esa, de ala tungan nai Israel, losa besak ia.

²⁶Lelek Dauk fali ne'un leo Ziglak neu boema, ana haitua bua-lo'a kakalok sila-la seli leo basa kota Yehuda mauli-malangan fo manatia-toban-nana, de nafa'da nae, “Bua palsen ia-la, neme bua-lo'a kakalok fo ami kalon neme MANETUALAIN musun-nala mai, de ami fen neu emi.”

²⁷Kota sila-la nde, Betel ma Rama nai Yehuda boboan kona, Yatir, Aroer, Sifmot, Estemoa, Rakhal, hataholi Yerahmeel-la kotan-nala, hataholi Keni-la kotan-nala, Horma, Bor-Asan, Atakh ma Hebron. Ana haitua bua palsen sila-la, neu basa kota fo nai bee, Dauk no solda'dun-nala, laleu-lalaak hai leme ndia so.