Read Termanu SEMUEL SUSULAK-KA ESAN-NA 4 Bible Online

SEMUEL SUSULAK-KA ESAN-NA 4 - Termanu bible

SEMUEL SUSULAK-KA ESAN-NA 4

¹Nai lelek ndia, hataholi Filistin-nala hoka la'iesak solda'dun-nala, fo leu latee-lata'ti loo Israel; hu ndia de, solda'du Israel-la tutulumatak leo natee-natatik dale leu; Ala ofu deka loo Eben-Haezer, te solda'du Filistin-nala ofu nai Afek.

²Solda'du Filistin-nala mulai sapu, de latee-lata'ti leni mamate-momopon, boema solda'du Israel-la kala, de mate hataholi, fafa'kama lifun haa nai natee-natatik dale.

³Lelek bei ela solda'du manakala-kala, ala fali leo mamana oofuk-ka, boema basa mauli-malangan Israel-la lafa'da lae, “Tao le'e de, MANETUALAIN po'ilotak hataholi Filistin-nala sengi ita nai faik ia dalen-na.? Mai fo teu ho'i-ta, MANETUALAIN Peti Hehelu-balataan nai Silo, fo tenin leo ia mai, fo ela MANETUALAIN nau tulu-fali ita, fo soi-tefa-na ita teme musu mai.”

⁴ Boema ladenu hataholi neu leo Silo neu, fo neu ho'i MANETUALAIN Peti Hehelu-balataan, fo nalupa MANETUALAIN Fo Manakoasa, kandela manen-na. Eli ana ka duan-nala, fo nde Hofni no Pinehas tunga Peti Hehelu-balataak ndia.

⁵Lelek Peti Hehelu-balataak ndia losa mamana oofuk-ka boema, hataholi Israel-la eki lapane'e, nalosa daebafak-ka dele.

⁶Hataholi Filistin-nala boeo, lamanene eekik ndia, boema lafa'da lae, “Tao le'e de, hataholi Ibrani sila-la eki doto-doto?” Tehu lelek ala bubuluk lae MANETUALAIN, Peti Hehelu-balataan losa nai hataholi Ibrani-la mamana ofun-na so boema,

⁷ala bii ma lafa'da lae, “Hapu lamatua daebafak mai leo hataholi Ibrani-la mamana ofun-na neu! Ita soe! Ita beita la'ola'di tita, manada'dik leo ia-ka fa!

⁸Soe tete'ek-ka! See kande, bisa soi-tefa-na ita teme lamatua daebafak fo mabe'i-balakaik ndia mai? Ade, lamatua daebafak sila-la ta nde makahulun-na, taolisa hataholi Masir-ra neme moo solokaek-ka hetu?

⁹Mapalalani dalem-mala leon, hei hataholi Filistin-nala lemin! Matee-mata'ti sama leo touanak, te metema ta soona, neukose emi da'di hataholi Ibrani sila-la atan, sama leo makahulun-na, sila da'di emi atam. Hu ndia de, matee-mata'ti no napalanik!”

¹⁰Basa boema, hataholi Filistin-nala latee-lata'ti no napalanik, de ala sengi solda'du Israel-la. Hataholi Israel-la lalai fali le'us leo sila esa-esak mamana ofun-na neu. Kakalak ndia, tete'ek-ka ba'un-na seli: de mate solda'du Israel lifun teluhulu.

¹¹Israel musun-nala loso-la Manetualain Peti Hehelu-balataan, ma taolisa Eli ana ka duan-nala fo nde Hofni no Pinehas.

¹²Hataholi esa neme leo Benyamin-na mai, nalai neme natee-natatik dale mai, de neu leo Silo neu, boema ana losa faik ndia boe. Ana sii-sii lulu'i bua papaken-na, ma ana tao dae neu langan lain, fo da'di ta'du-tana manasusak.

¹³Eli fo dalen-na ta tesa-tama no dudu'a-dodoo MANETUALAIN Peti Hehelu-balataan maso'dan-na, bei nangatuuk nai kandela lain, nai enok-ka su'un-na, ma dalen doo-doo. Lelek hataholi ndia neni halak la'eneu Israel kakalan-na boema, laun manai kota lala'en-na, kii-makaleleu no ala dolaheni basa halan-nala.

¹⁴Eli namanene kikii-makaleleuk ndia boema, natane nae, “Nakalupu beek ndia?” Hataholi na'kasa nalai leo Eli neu; lelek ana losa boema, nafa'da halak ta malole ndia.

¹⁵Eli teun siohulu falu, de hihii nae poken so.

¹⁶Hataholi ndia nafa'da Eli nae, “Faik ia, au alai eme natee-natatik dale mai, de besak-ka au losa.” Eli natanen nae, “Leobee, anang-ngo?”

¹⁷Hataholi maneni halak ndia nataa nae, “Israel nalai neme hataholi Filistin-nala mai. Ita kakalan-na, ba'un-na seli. Mate hataholi makadotok; ma mate Ama anan duas, fo Hofni no Pinehas boe. Ma musu loso-na Peti Hehelu-Balataak-ka!”

¹⁸Lelek hataholi ndia nafa'da la'eneu Peti Hehelu-balataak ndia boema, Eli tu'da nalenga neme kandelan lain, nai lelesuina boboan-na. Namalasin nanseli ma naao, de lelek ana tu'da boema, la'di lesuha'in-na de maten. Ana nauli-nalanga Israel, teuk haahulu dalen-na.

¹⁹Nai lelek ndia, Eli manafeun Pinehas saon-na, bobongi dalen, de fai bobongin-na deka so. Lelek namanene lae ala loso-la Manetualain Peti Hehelu-balataan, ma lae mate aliaman-na ma saon-na boema, no kaiboik name'da tein-na he'dis-sa, boema ta dooanak boen te, ana bongi.

²⁰Lelek hihii-nae ketu hahae-na boema, basa inak manatulu-fali-nana, lafa'da lae, “Matetea dalem-ma! Te o anam-ma touanak!” Tehu ta nataa, do taoafik neu fas.

²¹Ana foi ni'iana ndia na'de, Ikabod Nafa'da nae, “Manetualain Fo Mandela-masa'ak-ka, mopo ndela-sa'an neme Israel mai so.” — halan ndia tee tee-tutu'dan nde nae, loso-la Peti Hehelu-balataak-ka so, ma mate aliaman-na ma saon-na so. Hu ndia de, nafa'da nae, “Manetualain Fo Mandela-masa'ak-ka mopo ndela-sa'an neme Israel mai so, nanahu ala loso-la Manetualain Peti Hehelu-balataan so.”