Read Termanu SEMUEL SUSULAK-KA ESAN-NA 6 Bible Online

SEMUEL SUSULAK-KA ESAN-NA 6 - Termanu bible

SEMUEL SUSULAK-KA ESAN-NA 6

¹Lelek MANETUALAIN Peti Hehelu-balataan nai Filistin bulak hitu dalen-na boema,

²hataholi Filistin-nala laloo basa imam-mala ma hataholi malelak-kala boema, latane lae, “Ita muse tao Israel MANETUALAIN Peti Hehelu-balataan ndia le'e? Metema ita teni falik-kana leo mamanan-na neu soona, enon-na leo beek?”

³Boema lataa lae, “Emi boso meni falik Israel Manetualain-na Peti Hehelu-balataan ndia, ka'da leondiak mesan, tehu muse menin no bua palsen, fo soi-tefa emi sala-singom. No enok ndia, neukose emi lea-hai, ma neukose emi bubuluk, tao le'e de, Israel Manetualain ndia, huku emi do'e-do'e.”

⁴Hataholi sila-la latane lae, “Ita muse fen, sosoi-tetefak beek-ka?” Basa imam sila-la lataa lae, “Peta-paek lima nanataok neme lilopilas, ma lafo lima nanataok neme lilopilas, fo nandaa no Filistin manen-nala dede'un-na. Ade, soe fo manatunin-nala emi basa-basam-mala, nau laun do manek boe, ta nalupa peta-paek, ma lafo hetu?

⁵Da'di, emi muse nana dulak neme peta-paek ma lafo fo nanataok neme lilopilas, manatao nalutu emi nusam-ma. No enok ndia, emi fe ha'da-holomata neu Israel Manetualain-na. Fafa'kama, neukose Ana hahae huku emi, ma emi lamatua daebafam-mala boema emi daem-ma.

⁶Sosoak hata, emi malanga batu sama leo makahulun-na, mane Masir-ra ma hataholin-nala boe? Boso mafandele heni, tao leo beek de Manetualain tao nakamiminak-kasa, nalosa lame'da he'din-na boema, ala po'i hataholi Israel sila-la, la'oela Masir.

⁷Hu ndia de, sadia-ma nggalobak esa no sapi dua, bei lasu'u anan-nala, ma nanapake beitak, fo ala hela nggalobak-ka. Pa'a sapi ka duak sila-la neu nggalobak-ka, fo foo falik sapiana sila-la leo lalae dale neu.

⁸Basa soona, ho'i-ma MANETUALAIN Peti Hehelu-balataan-na, fo fuan leo nggalobak lain neu, ma pe'da balaka anak-ka neu boboan-na, balaka anak ndia isi-na bua-lo'a lilopilas, fo muse emi tunu-hotu fen, da'di leo soi-tefak neu emi sala-singom. Boso hela nggalobak-ka no sapi sila, nemen-na fo ala la'ok aon.

⁹Taoafik neu lala'on-na; metema neni Peti Hehelu-balataak ndia leo nusan-na neu, fo nde Bet-Semes soona, ndia sosoa-ndandaan nae Israel Manetualain-na, nde fe soe matuaina ndia neu ita. Tehu metema nggalobak ndia ta neu leo naa neu fa soona, neukose ita bubuluk tae soe ndia ta neme Israel Manetualain-na mai fa, te soe manada'di aok ndia.”

¹⁰Hataholi sila-la tunga; ala pa'a-la sapiina dua, bei lasu'u, boema ala pa'an neu nggalobak-ka, te ala kena sapiana-la leo lalae dale neu.

¹¹Boema ala fua Peti Hehelu-balataak ndia, ma balaka anak fo isi-na lafo nanataok neme lilopilas, ma peta-paek salaok ndia leo nggalobak lain neu.

¹²Sapi sila-la la'ok lakandoo leo Bet-Semes leu; bana sila-la langoe sama leo kapa, ma ala la'ok lakandoo, te ala ta heo leo okofoo-a boboa kiin do boboa konan-na leu fa. Filistin manen ka liman sila-la tunga lakandoo, losa Bet-Semes dae toon-na.

¹³Nai lelek ndia, Bet-Semes laun-na ketu-kolu gandum nai bafak dale. Lelek lita Peti Hehelu-balataak ndia boema, leu soluk-kana no namahokok.

¹⁴Nggalobak ndia nate'e deka no batuina esa, nai laun Bet-Semes esa na'de Yosua tinan-na. Kota ndia laun-nala bia nggalobak-ka ai-nala, boema ala ta'ti sapi ka duak sila-la soaneu tutunu-hohotuk nanatunuk fe MANETUALAIN.

¹⁵Basa boema, hataholi Lewi-la lakonaheni MANETUALAIN Peti Hehelu-balataan-na, ma balaka anak fo sina bua-lo'a nanataok neme lilopilas ndia, boema ala pe'dan neu batu matuaina ndia lain. Basa ndia boema, Bet-Semes laun-nala tunu-hotu tutunu-hohotu nanatunuk ma tutunu-hohotu fe'ek fe MANETUALAIN.

¹⁶Filistin manek-ka liman sila-la lita basa sila-la, boema ala fali leo Ekron nai faik ndia dalen-na boe.

¹⁷No enok ndia, hataholi Filistin-nala haitua fe MANETUALAIN tutunu-hohotuk sala-singok nanasoi-tefak soaneu Filistin manek-ka liman fo ala paleta kota ka limak-kala, laun-nala. Kota sila-la nde, Asdod, Gaza, Askelon, Gat ma Ekron. Nai kota sila-la, hapu nggelok lanuu kota musu, ma nggelok ta. Kota sila-la esan-na haitua peta-paek nanataok neme lilopilas esa ma lafo nanataok neme lilopilas esa. Manada'dik ndia buti-na nde batu matuaina, mamanak fo ala pe'da MANETUALAIN Peti Hehelu-balataan. Losa faik ia, batu ndia bei nahele nai Yosua, fo hataholi Bet-Semes ndia, tinan-na.

¹⁹Tehu, hu kande hataholi Bet-Semes sila-la titino leo MANETUALAIN Peti Hehelu-balataan dalek neu, de MANETUALAIN taonisa sila hataholin hituhulu. Boema laun-na falu, nana MANETUALAIN fe soe matuina tuni nalas.

²⁰Boema Bet-Semes laun-nala lafa'da lae, “See kande bisa nakatatakak nai Amak, MANETUALAIN Fo Malalao-malalafuk ndia matan? Ita muse teni peti ndia leo bee neu, fo ela dook-ka neme ita mai?”

²¹Boema ladenu hataholi neu leo Kiryat-Yearim laun-nala no leni hala heheluk-ka nde ia, “Hataholi Filistin-nala leni falik MANETUALAIN Peti Hehelu-balataan so. Mai fo ho'i meni peti ndia leo emi mamanam-ma neu.”