Read Termanu SEMUEL SUSULAK-KA ESAN-NA 7 Bible Online

SEMUEL SUSULAK-KA ESAN-NA 7 - Termanu bible

SEMUEL SUSULAK-KA ESAN-NA 7

¹ Boema Kiryat-Yearim laun-nala leu ho'i-la MANETUALAIN Peti Hehelu-balataan ndia, de lenin leo hataholi esa na'de Abinadab uman dale neu; uma ndia nai pupukuk lain. Basa boema ala so'u Eleazar, fo Abinadab anan-na, fo nanea Peti Hehelu-balataak ndia.

²MANETUALAIN Peti Hehelu-balataan ndia nai Kiryat-Yearim dook-ka boe, fafa'kama teuk duahulu. Nai lelek ndia, basa hataholi Israel lala'en-na laloo bou-bou neu MANETUALAIN fo loke tutulu-fafalik.

³Boema, Semuel nafa'da hataholi Israel-lala nae, “Metema, emi sanga fali leo MANETUALAIN meu, fo sene-do'ok-kana no dalek-katematuak soona, emi muse tu'u-tapa heni basa nusa dea-la lamatua daebafan-na, ma lamatua daebafak inak Asytoret-ta dodoki-dudulan. Fe la'iesak emi aoinam-ma neu MANETUALAIN ma ka'da sene-do'ok neun soona, neukose Ana soi-po'i emi neme hataholi Filistin-nala mai.”

⁴Da'di, hataholi Israel-la tu'u-tapa heni Lamatua Daebafak Baal-la dodoki-dudulan ma Lamatua daebafak Inak Asytoret-ta dodoki-dudulan, de lamahele neu ka'da MANETUALAIN mesak-kana.

⁵Basa ndia boema, Semuel nafada nae, “Maloo makabubua basa leoina Israel-la lala'en-na nai Mizpa, soona neukose au hule-haladoi neu MANETUALAIN soaneu emi.”

⁶Boema basa-basas lakabubua lai Mizpa. Ala aso oe boema ala po'a henin fo da'di leo tunu-hotuk neu MANETUALAIN basa boema, nai faik ndia dalen-na, ala oka aon-nala. Lafa'da lae, “Ami masala-masingo basa neu MANETUALAIN so.” (Nai Mizpa ndia nde Semuel mulai da'di mauli-alangan neu hataholi Israel-la.)

⁷Lelek hataholi Filistin-nala lamanene, lae hataholi Israel-la lakabubua lai Mizpa so boema, Filistin manek-ka liman-nala loo solda'dun-nala leu leo naa leu, fo ala sapu-la hataholi Israel-la. Hataholi Israel-la lamanene dede'ak ndia boema, ala bii.

⁸Semuel nafa'das nae, “Boso hahae hule-haladoi neu MANETUALAIN fo ita Manetualain-na, fo ela Ana soi-tefa-na ita teme hataholi Filistin-nala mai.”

⁹Hu ndia de, Semuel do'do bi'ilopoana esa, de ana tunu-hotun da'di leo tutunu-hohotu nanatunuk soaneu MANETUALAIN. Basa ndia boema, ana hule-haladoi, fo daenga MANETUALAIN tulu-fali hataholi Israel-la, boema Manetualain sipok huhule-haladoin ndia.

¹⁰Lelek Semuel bei tunu-hotu tutunu-hohotuk ndia te, hataholi Filistin-nala mulai sapu; tehu nandaa no hatematak ndia boe, MANETUALAIN namansa de halan-na nadodolo neme lalai mai neu hataholi Filistin-nala. Ala tapasasala, boema lalai no lapangamak.

¹¹Solda'du Israel-la kalua leme Mizpa mai, de ala usi hataholi Filistin sila-la, hihii nae losa Bet-Kar, de ala tao lamopo-lamates.

¹²Basa ndia boema, Semuel napadedeik batu esa nai Mizpa no Sen dae toon-na. Nafa'da nae, “Tete'ek-ka MANETUALAIN tulu-fali ita so.” — boema ana foi batu ndia na'de, “Batu Manatulu-manafali.”

¹³Hataholi Filistin-nala kakalan-na leondiak. MANETUALAIN ta fes loak masok Israel nusan-na seluk so'on, nai lelek Semuel bei naso'da.

¹⁴Hataholi Filistin-nala fe falik basa ala loso-la Israel kotan-nala, mulai neme Ekron losa Gat. Da'di Israel hapu falik sila nusan-na lala'en-na. Hataholi Israel-la ma hataholi Amori-la boe, laso'da no mole-dame.

¹⁵Semuel paleta Israel losa maten.

¹⁶Tunga teuk, ana la'ok okofefeo leo Betel, Gilgal, ma Mizpa neu. Ma nai mamanak sila-la ana da'di mauli-malangan.

¹⁷Basa soona, ana fali leo uman-na nai Rama. Nai naa, ana da'di hataholi Israel-la mauli-malangan, ma napadedeik mei tunu-hotuk esa, ba'eneu MANETUALAIN boe.