Read Termanu SEMUEL SUSULAK-KA ESAN-NA 8 Bible Online

SEMUEL SUSULAK-KA ESAN-NA 8 - Termanu bible

SEMUEL SUSULAK-KA ESAN-NA 8

¹Lelek Semuel namalasi boema, ana so'u anan-nala da'di manek nai Israel.

²Ana ulun-na na'de Yoel, ma ka dua na'de Abia. Ala da'di manakee-manafula nai Bersyeba.

³Tehu ala ta tunga sila aman ha'da-tataon fa, te ala sanga ka'da nanalak soaneu sila aoinan-na mesak-kana. Ala sipo doi sosolo dalek, ma laketu-lala'di laun-na dede'an-nala ta tunga eno-dalak matetun-na fa.

⁴Hu ndia de, basa mauli-malangan Israel-la lakabubua, boema leu latongo lo Semuel nai Rama,

⁵ de lafa'dan lae, “Mamanene leon Ama, Ama namalasi so, te Ama anan-nala ta ta'bu tunga Ama ei tata'bun-na fa. Da'di, Ama so'u fe ami manek esa, fo daenga ami manuu manek sama-na leo leoina fe'ek-kala boe.”

⁶Tehu Semuel dalen-na nape'da dale nasak no sila hala nonoken ndia fa. Boema ana hule-haladoi neu MANETUALAIN,

⁷de MANETUALAIN nafa'da nae, “Sipok la'iesak leoina ndia nonoken neu o-a. Nana ala ta tipa o nde ndia fa, te Au dei. Ala ta lahiik Au da'di sila manen so'ok.

⁸Neme Au os kalua leme Masir mai-a, ala lepos lasadea Au, de ala sene-do'ok neu lamatua daebafak-kala, ma hata fo besak ia, ala taon neu o ndia nde ala taon neu Au boe.

⁹Hu ndia de, sipok sila nonoken-na leona; tehu fes nasanene'ak mahelek, ma mafa'das la'eneu, manek fo neukose ana paleta sila, hak-ka leo beek.”

¹⁰Semuel nanduku-nalosak MANETUALAIN hala-kokolan sila-la lala'en-na, neu hataholi mananoken fen manek esa ndia, nae,

¹¹“Mahani te, emi manem-ma neukose ana paleta leoiak neu emi,” boema Semuel nafa'da mangalele'don nae, “Neukose nakaseti emi anam-mala da'di solda'du; nggelok da'di solda'du manasa'e kaleta, nggelok da'di solda'du manasa'e ndala, ma nggelok da'di solda'du manala'o eik.

¹²Ana so'u nggelok da'di malanga solda'du matuaina neu solda'du lifun esa, ma nggelok nalanga solda'du limahulu. Neukose manek ndia nakaseti emi foi-fala tinan-na, pe'da-fua ndia keketu-kokolun buna-boan, tao tafa-sisilo ma kaleta musun-nala taka-besin.

¹³Neukose nadenu emi anainam-mala tao fen mina kaboomenik, ma ala da'di ndia tuka do'de-nasun ma tuka loti.

¹⁴Neukose ana ho'in-na emi tinam-mala, emi osi angol-la, ma emi osi setum neulaum-mala fo ana fes leo ndia hataholi mana'a ngga'din-nala neu.

¹⁵Neukose ana puku fe emi tinam, ma emi osi angom-mala bea-nala baba'un-na neme buna-boan mai, fo susu'dik sanahulu soona, fe susu'dik esa, fo ana fes leo ndia malanga solda'du matuainan-nala, ma basa ndia hataholi mana'a ngga'din-nala.

¹⁶Neukose ana ho'in-na emi atam-mala, emi bana-manu neu laum-mala, ma emi keledeim-mala fo ana pakes soaneu ndia bela-ba'un.

¹⁷Ma metema, emi bi'ihii bi'ilopom sanahulu soona, neukose ana ho'i-na esa. Ma neukose ana tao emi da'di ndia atan.”

¹⁸Metema tepo-lelek ndia losa soona, neukose emi haladoi, hu kande manek fo emi helen ndia, tehu MANETUALAIN ta nau namanene emi haladoim ndia fa.

¹⁹Tehu leoina ndia, ta nau taoafik neu Semuel hala-kokolan fa, lena-lenak lafa'da lae, “Nemen-na! Leomae leo beek boe, ami mahiik hapu manek.

²⁰Ami dale hii-hiim-ma, sama leo leoina fe'ek-kala, fo ami manem-ma muse ana paleta ami, ma nauli-nalanga ami nai natee-natatik dale.”

²¹Semuel namanene basa sila dede'a-kokolan sila-la lala'en-na boema, nanduku-nalosak-kana neu MANETUALAIN.

²²MANETUALAIN nataa nae, “Ka'da tunga sila nanaun-na, fo so'u fes manek esa.” Basa boema, Semuel nadenu hataholi Israel sila-la, esa-esak fali ne'un leo ndia uman neu.