Read Termanu SEMUEL SUSULAK-KA ESAN-NA 9 Bible Online

SEMUEL SUSULAK-KA ESAN-NA 9 - Termanu bible

SEMUEL SUSULAK-KA ESAN-NA 9

¹Hapu touk esa, kamasu'ik ma mabafa-manisik neme leo Benyamin-na mai, na'de Kish. Bekhorat teidalen ndia, fo nggitak neme leo Afiah mai. Aman na'de Abiel ma bein na'de Zeror.

²Kish anatoun esa, na'de Saul. Saul ia, ta'eanak esa, mana'ahiik, aon-na makadelek. Ta hapu hataholi esa boen nai Israel, ao makadelen-na leondiak fa. Dedeman-na boeo, ta hapu hataholi dema fan; Hataholi Israel-la basa-basas dedeman-nala losa ka'da alun-na.

³Nai faik esa boema, mopo Kish keledein de'ubee. Hu ndia de Kish nafa'da Saul nae, “Leleko moo malalau-maoono esa, fo meu sanga keledei sila-la.”

⁴Boema Saul no malalau-maoonon-na lapaleleti letelepak Efraim-ma, ma dae Salisa, tehu ala ta hapu bana sila-la fa. Basa boema, ala la'ok lakandoo leo dae Sahalim leu, tehu keledei sila-la ta lai ndia boen. Ala sanga nai Benyamin nusan-na boe, te ta hapu fas.

⁵Lelek ala losa dae Zuf-fa boema, Saul nafa'da malalau-maoonon nae, “Mai fo ata fali, te boso nalosak ama hela-hae no dudu'a-dodoo ita, neme keledei sila-la mai.”

⁶Malalau-maoono ndia nataa nae, “Mahani dei! Te Manetualain atan esa nai kota ia. Hataholi-la fe ha'da-holomata ba'un-na seli neun, nanahu nafa'da beek soona, tete'ek-ka ana da'di. Mai fo ata teu leo naa teu, fo fafa'kama ana hapu nafa'da ita, keledei sila-la lai bee.?”

⁷Saul nafa'dan nae, “Metema ita teu fo tatongo ton soona, ita fen beek? Basa ita teni tua-lepa-la so, de ita ta hapu hata-esa boen, fo fe Manetualain atan ndia fa hetu?”

⁸Malalau-maoono ndia nataa nae, “Sanga tao leo ndia de, au doi fulang bei esa nde ia. Neukose au fen leo Manetualain atan ndia neu, fo daenga ana nau nafa'da ita, keledei sila-la lai bee.”

⁹Saul nataa nae, “Hei! Mai fo ata teu leona.” Boema leu leo kota fo Manetualain atan ndia mamana-na. Lelek fo ala nda'e pupukuk fo leo kota ndia neu boema, latongo loo anafe'oanak de'ubee, sanga leu hela oe nai oedolu dale. Boema latane anafe'oanak sila-la lae, “Ade manasiula-tongonok nai kota do ta?” (Nai tepo-lelek ndia, loke nabi soona, lae manasiula-tongonok, da'di metema hataholi hii natane hata esa neu Manetualain soona, nafa'da nae leo ia, “Mai fo ata teu leo manasiula-tongonok-ka teu.”)

¹²Anafe'oanak sila-la lataa lae, “Hei, hapu, besak-ka neu. Metema emi la'ok lai-lai soona, fafa'kama emi tunga hapun. Besak-ka ana fali ma'in leo kota mai, nanahu faik ia, hapu tunu-hotu fe laun-na tutunu-hohotuk nai mei tunu-hotuk nai pupukuk lain. Metema ana beita mai fa soona, hataholi nanaka'ik-kala beita la'a fa, nanahu muse ana fe nakahuluk baba'e-papalak neu tutunu-hohotuk sila-la dei. Metema emi meu besak ia soona, neukose ana beita nda'e pupukuk-ka fo neu na'a fa te, emi matongo moon so.”

¹⁴Da'di Saul no malalalau-maoonon leu leo kota leu, de lelek ala masok lelesuina bafan-na boema, latongo loo Semuel bei la'o-la'o leo mamana makaluku-makatele-a nai pupukuk lain.

¹⁵Saul beita mai fa te, MANETUALAIN fe Semuel hala-heheluk-ka nae leo ia,

¹⁶“Balahaa fafaik, fafa'kama li'u ba'u ia, neukose Au adenu hataholi esa neme leo Benyamin-na mai, neu natongo no o. So'u hataholi ndia, nenik lose mina neun, fo ana da'di manek neu Au anang Israel. Neukose ana soi-tefa-na Au anang-ngala leme hataholi Filistin-nala mai. Au ita basa Au anang-ngala doi-doson ma kikii-makaleleun loke tutulu-fafalik so.”

¹⁷Lelek Semuel nita Saul boema, MANETUALAIN nafa'dan nae, “Au afa'da o hataholi-a, nde ia. Neukose ana paleta Au anang-ngala.”

¹⁸Ndia te, Saul neu deka no Semuel nai lelesuina, de natane nae, “Boso mamanasa, te manasiula-tongonok ndia, uman-na nai bee?”

¹⁹Semuel nataa nae, “Au nde manasiula-tongonok ndia. Muu makahuluk leo mamana makaluku-makatele-a nai pupukuk lain, nanahu faik ia, emi mi'a sama-sama moo au. Balahaa fafaik soona, neukose au ataa basa o natatanem lala'en-na, fo basa ndia soona, o bole fali.

²⁰Boso bii o keledeim manamopom nai faik telu maneuk-ka ndia, nanahu hapu falik-kasa so. Nakalenak bai, neukose ala fe o moo o amam teidalen-nala.”

²¹Boema, Saul nataa nae, “Au ia, da'di eme leo Benyamin-na mai, fo leoanak nanseli nai Israel, ma bai te, au teidaleng-nga, nanaleke taak nai leo ndia dalek. Da'di, tao le'e de, Ama mafa'da au mae leodia?”

²²Basa boema, Semuel nafa'das Saul no malalau-maoonon leu leo kama matua dale leu, de ana fes mamanak nai hataholi nanaka'ik-kala uluk; hataholi nanaka'ik sila-la dede'un-na, fafa'kama hataholi teluhulu.

²³Basa boema, Semuel nafa'da hataholi manado'de-nasuk-ka nae, “Sadia paa fo na'kasa au fe o pe'dak-ka.”

²⁴Basa boema, manado'de-nasuk ndia, ana ho'i paa bibia nanahelek neme paa sakibolok-ka mai, de ana pe'dan neu Saul matan-na. Semuel nafa'dan nae, “Paa ia, au tao fe'en soaneu o, fo ela o bisa mu'an nai hatematak ia, sama-sama moo fui fe'ek-kala. Mu'a leona.” Boema Saul na'a sama-sama no Semuel.

²⁵Basa boema, ala kona leme mamanak makaluku-makatele ndia mai, de leu leo kota dale leu. Saul hapu mamana susunguk nai uma ta'dak lain,

²⁶de ana sungu. Lelek dulufula boema, Semuel naloo Saul, fo bei nai uma ta'dak lain ndia nae, “Fo'a, mai fo au o, o la'o leona.” Saul fo'a de no Semuel la'o leona.

²⁷Lelek ala losa kota su'un-na boema, Semuel nafa'da Saul nae, “Madenu malalau-maoono ndia la'ok nakahuluk ita.” Boema, malalau-maoono ndia la'o, de Semuel nafa'da seluk nae, “Mate'e meme ndia, doo-doo fa, te au sanga afa'da o, Manetualain hala hehelun-na.”