Read Ebaibuli 1961 Ageun 15 Bible Online

Ageun 15 - Ebaibuli 1961 bible

Ageun 15

¹ Kokau kaŋun kobu akirot naka EJAKAIT mama ejai Aburam kotoma otapo, kinera ebe, “Sirikiyoŋ, Aburam: Eoŋ ekonibuku ka ekoniropit loepol noi.”

²Kobala Aburam ebe, “Wu EJAKAIT Edeke, kiinakini inyo naarai alosi komamei ikoku, konye loirumi ekatogo ŋes ca Damasek Elieser?”

³Kobala Aburam ebe, “Koany, mam kiinakinit eoŋ aur: ido koany, loaurikinio togoka ŋes ekerumanika,”

⁴ Ido koany, kobu akirot naka EJAKAIT mama ejai ŋesi ebe, “Etuŋanan ŋol mam erauni ekerumanikon, konye loebuni kopikisikon ŋes eraun ekerumanikon.”

⁵ Kitolom kiŋa, kolimok ebe, “Kosesen natikwana akuj, kimar aacer, arai kipedo aimar.” Kotema atiar, “Aurikon da ikwaikini nen.”

⁶ Kiyu ŋesi EJAKAIT; kimarakinai ŋes adolit.

⁷ Kotema atiar, “Arai eoŋ EJAKAIT lokalemuni jo koUr loka Ikaludean, ainakin akwap na airum.”

⁸ Kobala ebe, “Wu EJAKAIT Edeke, inyo bo ketejenikini ebe erumi?”

⁹Kotema atiar, “Kolemikinai akiten naedaunit ikar iuni, ka akinei naedaunit ikar iuni, ka emerekek loedaunit ikar iuni, ka eluke, ka ajele naedit.”

¹⁰Koyaŋa ŋul kere, kotiaka kokidiŋ, kibwaik atutubeta aareiarei kiteteonok; konye mam abu kotiak ikweny.

¹¹Kodooto atarukon toma awat nuka lukatwak, kireŋea Aburam.

¹² Kosodi elomari akoloŋ, kiluranasi Aburam ajo nuipu; ido koany kokurianar ŋesi kanuka amuton naepol.

¹³ Kotema EJAKAIT Aburam atiar, “Kojenu cut ebe erauni aurikon apejonon kakwap namere nakec, ido epote aijaanakin, eponio areit kes ikar akwat aoŋon;

¹⁴ ateker ŋin da naepote kesi aijaanakin, atubokini akiro; kosodete anyoun kojaas kiboro luipu.

¹⁵ Konye ijo da ilosi neejaas lukapapaakon kainapakina; kidaio kidau aibut ejok.

¹⁶ Ido kotoma aturi nakiwoŋonet eboŋunete bobo nee; naarai numam adolit nuka Emorait eroko edolo.”

¹⁷Kosodi kedau akoloŋ alomar, komutonor akwap, koany eupa loepurie ka akalas naesarani kitoroto kidiŋ neajaas iboro ŋul.

¹⁸ Kapaaran kaŋin kitutukis EJAKAIT kAburam kotema atiar, “Ainak akoniwur akwap na, anyoun kocor kaloko Misiri aitodol ocor loepol Eupurat;

¹⁹Ekenit, ka Ekenisit, ka Ekadumonit,

²⁰ka Ekitit, ka Eperisit, ka Erepait,

²¹ka Emorait, ka Ekanaanit, ka Egirugasit, ka Eyebusit.”