Read Ebaibuli 1961 Ageun 30 Bible Online

Ageun 30 - Ebaibuli 1961 bible

Ageun 30

¹ Keanyu Rakel ebe mam eurikinit Yakob idwe, kirum Rakel ekokote kanuka inacike; kolimok Yakob atiar, “Koinakinai idwe, arai mam kiinakin atwani.”

² Kinep anyunyura naka Yakob, kotema Rakel atiar, “Ajai eoŋ aibois naka Edeke, loimikit akonikoik aur?”

³ Kotema atiar, “Koany abulesitika Bilika, koloma neejai; tetere idoikini akuninika, kadum eoŋ da idwe kamake.”

⁴ Koinak Bilika abulesitike araun akeberu; koloma Yakob neejai.

⁵Kopotuu Bilika, kourik Yakob ikoku yenitelepat.

⁶ Kotema Rakel atiar, “Katuboki Edeke akirot, eira eporotoka, kainaki da eoŋ ikoku yenitelepat.” Ŋes kemaikinere ekekiror Dan.

⁷Kopotuu bobo Bilika abulesit naka Rakel, kourik Yakob ikoku yenitelepat yenikiareit.

⁸ Kotema Rakel atiar, “Kiwuta kinacika, auta nakagogoŋ, ido epiko.” Komaik ekekiror Naputali.

⁹Keanyu Lea ebe enyeki kwaŋin aur, koyaŋau abulesitike Silupa koinak Yakob araun akeberu.

¹⁰Kourik Silupa abulesit naka Lea Yakob ikoku yenitelepat.

¹¹Kotema Lea atiar, “Kekemer!” Komaik ekekiror Gad.[18]

¹²Kourik Silupa abulesit naka Lea Yakob ikoku yenitelepat yenikiareit.

¹³ Kotema Lea atiar, “Alakara! Naarai kanyaraenenete apesur nalakara.” Komaik ekekiror Aser.

¹⁴ Kolot Reuben kapaarasia nuasakere akima, koany aiduduma kotoma omanikor, koinu totoke Lea. Kosodi Rakel kotema Lea atiar, “Keŋaiŋait, koinakinai aiduduma nuka okokukon.”

¹⁵ Kolimok ŋes ebe, “Erai akirot naedit jo ademar eoŋ okilenika, ikoto da ademar eoŋ aiduduma nuka ikakoku?” Kotema Rakel atiar, “Ŋes eperio kajo akuare na kanuka aiduduma nuka okokukon.”

¹⁶Kobu Yakob kotoma omanikor eboŋ, koloma Lea aisiriam, kobala ebe, “Kibusakinit alomun mama ajai; naarai abeit kagwelit jo kaiduduina nuka ikakoku.” Kopero kaŋes kakuare kaŋin.

¹⁷Kiira Edeke Lea, kopotuu, kourik Yakob ikoku yenikikanyet yenitelepat.

¹⁸Kotema Lea atiar, “Kainaki Edeke eropitika, naarai abu kainak okilenika abulesitika.” Komaik ekekiror Isakar.

¹⁹Kopotuu bobo Lea, kourik Yakob ikoku yenitelepar yenikikanyetekape.

²⁰Kiner Lea ebe, “Kainakinit Edeke ainakinet naejok naka adukokinika; natikwana iboienenei do okilenika keoŋ, naarai aurik ŋes idwe lutelepai ikanykape.” Komaik ekekiror Sebulun.

²¹Kokau kouru ikoku yenipese, komaik ekekiror Dina.

²² Kiitu Edeke Rakel, kiira ŋes Edeke kopuko akoikike.

²³ Kopotuu, kouru ikoku yenitelepat: kobala ebe, “Kalema Edeke amorositika.”

²⁴ Komaik ekekiror Yosep, kobala ebe, “Keyatak Edeke ikoku ice yenitelepat.”

²⁵ Kosodi kedau Rakel aurun Yosep, kotema Yakob Laban atiar, “Kotwarai eoŋ, kalot aiboisika, bukosi.

²⁶ Koinakinai akaŋor ka ikadwe, luabu kejaanakinia jo, kalot; naarai ijeni aijaanakin naabu kejaanak jo.”

²⁷ Kotema Laban ŋes atiar, “Arai ca adumunit asianut kakonyenekon, kopaik ber; naarai aomoom eoŋ ebe abu EJAKAIT kesireren kanukon.”

²⁸ Kotema ŋes atiar, “Kolimokinai ekoniropit, kainak.”

²⁹ Kotema atiar, “Tieni kwape kejaanakinia jo, kwape ajaatar da ikonibaren keoŋ.

³⁰ Naarai ekidioko luajaas kajo eroko eoŋ kebuno, kwana eyatakinos epuaros; abu EJAKAIT kisirereŋ jo kama ameanari eoŋ kere: aso wori bo adumunia eoŋ da lukokaleka?”

³¹Kotema atiar, “Kainak inyo?” Kotema Yakob atiar, “Sirikiinak imodiobore; konye arai kiisubak na, ecokienenei bobo ekonisipan ka aidar da.

³² Etori eoŋ lolo osipanikon kere, kalemanari kanen numerieik kere ka nukomolik, ka nukirionok kere kotoma amerekekin, ka nukomolik, ka numerieik kotoma akinei: ŋun eraunos ekaropit.

³³ Kwaŋin itejenun akadolit kanukaŋ kokau, kibu ijo kanuka eropitika loejai kakonyenekon; ŋin kere yenimere yenimeri ka yenikomol yenikotoma akinei, ka lukirionok lukotoma omerekekin, arai kidum kamaka imari ŋin araun ikokwara.”

³⁴Kotema Laban atiar, “Koany, akoto kwape ejaar akonikirot.”

³⁵Kapaaran kaŋin kogelana ikorwa lupusieik ka lukomolik, ka akinei kere numerieik ka nukomolik; ŋinidiopet kere yenikapel, ka lukirionok lukotoma omerekekin, koinak kes akanin nuka ikedwe;

³⁶Kitooto kes aleŋitoit naka apaarasia auni kidiŋike ka Yakob: kicokienenei Yakob luedeunos kosipanin luka Laban.

³⁷ Kolem Yakob asiepen ka atopocono ka aparisia; kolinilin akito, tetere etakanuni akwaŋis naejai toma akito.

³⁸Kosipok akito nuabu koliŋilig akonyen nuka isipanin toma alelesia nuka ataparin neamasenenete isipanin; kiwacunete kesi kepotu aimat.

³⁹Kiwacanakis isipanin akonyen nuka akito, kouriata isipanin ŋul ipusieik, imerieik, ka ikomolik.

⁴⁰Kotiak Yakob komerekekin ludidik, kitesesen isipanin mama ejaas ipusieik, ka lukiriokok kere lukotoma osipan loka Laban; kogela isipaninike awai, mam abu kimorikik osipan leka Laban.

⁴¹Kosodi naewacununiata nukatumak kosipan, kibwaik Yakob akito akonyen nuka esipan kotoma alelesia, tetere iwacunete kaneajaas akito;

⁴²Konye arai esenyit esipan, mam ebwaanakini: kwaŋin luasenyito araas luka Laban, luatumito da araas luka Yakob.

⁴³ Konyanyaar etuŋanan noi noi, kojaas kisipanin luepolok, ka abulesin ka ibulesin, ka akaalai ka asigiria.