Read Ebaibuli 1961 Ageun 31 Bible Online

Ageun 31 - Ebaibuli 1961 bible

Ageun 31

¹ Kopup ŋesi akiro nuka odwe luka Laban, ebalas ebe, “Kidema Yakob iboro kere luaraas luka papawok: ido kaŋul luaraas luka papawok kes adumunia abar ŋin kere.”

² Koany Yakob akonyen nuka Laban, ido koany, itegelikina kamakeŋ.

³ Kotema EJAKAIT Yakob atiar, “Koboŋo akwap naka lukapapaakon, mama ejaas iinacanakon, ajaenena eoŋ kajo.”

⁴Kiyakia Yakob konyarau Rakel ka Lea kopotu orony neejai esipan.

⁵ Kotema atiar, “Aany akonyen nuka papakus itegelikina kamaka; konye Edeke loka papaka ejaenena keoŋ.

⁶ Ido ijenete cut ebe abu kejaanak papakus kakagogoŋ kere.

⁷ Ido papakus abu keŋala, kilocenenei ekaropit irwan atomon; konye mam Edeke abu kocamak aiswamakin eoŋ aronis.

⁸ Naetemaria kwana ebe, ‘Numerieik, kes eraunos ekoniropit’; kouri esipan kere numerieik: ido naetemaria ebe, ‘Nupusieik kes eraunos ekoniropit’; kouri esipan kere nupusieik.

⁹ Kwaŋin abu Edeke kodema papakus ikebaren, kainak eoŋ.

¹⁰Kosodi kapaarasia kaŋun, kiwacu esipan, keteluo akakonye, kaany kotoma airuja, ido koany, ikorwa luakwarete esipan araas lupusieik, ka lumerieik, ka lueŋirooko.

¹¹ Emalaika da loka Edeke kalimok kotoma airuja ebe, ‘Yakob’; katema atiar, ‘Eoŋ lo.’

¹² Kotema atiar, ‘Kiteluo kwana akonikonye, koany ikorwa kere luekwarete esipan lupusieik ka lumerieik ka lueŋirooko; naarai aany kere nukiswamanakini Laban.

¹³ Arai Eoŋ Edeke loka Bet-el, nekolo ibukokinia akinyet opir, nekiyapoikinio eoŋ aiyaposit; aso do konyou, kolot kakwap kana, koboŋo akwap nakolo kiwurikinio.’ ”

¹⁴ Koboŋokis ŋes Rakel ka Lea kotemasi atiar, “Eroko bobo isio kija kakorakinet arai airumet kotogo loka papakosi?

¹⁵ Mam kimarakinit ŋesi sio olonwao? Naarai abu kogwela sio, anyamar da cut ikosiboro.

¹⁶Naarai abara kere naademaa Edeke papakosi ŋes nawok, ka naka idwewok: aso do nuadau Edeke alimokin jo, kiswama.”

¹⁷Konyou Yakob, kisibwanenik ikedwe ka akeŋor kuju akaalai;

¹⁸Koyaŋa ibaren kere, ka iboro kere luatukonokinit, ibaren luabu kodumunite, luatukokinit koPadan-Aram, alosit mama ejai Isaak papake akwap naka Kanaan.

¹⁹ Alosit Laban aitub ajul nuka amerekekinike; kokokwa Rakel aputosia nuka idekesio nuka papake.

²⁰Kidadaar Yakob komam Laban Esuriat Ejeni, naarai mam abu kolimok elosi.

²¹ Kwaŋin koker kiboro kere luajaatar; konyou, kikwaŋar kocor, kobea oroŋat loka Gilead.

²²Aponi kolimokinai Laban kapaaran kanakiwuniet ebe asi Yakob.

²³ Kouparos kikeinacan, kibwapak ŋes apaarasia akanykaarei; kodumak oroŋat loka Gilead.

²⁴ Kobu Edeke mama ejai Laban Esuriat kotoma airuja kuare, kotema atiar, “Kocoite, sirikiner kaYakob nuejok karaida nuereko.”

²⁵Kodolok Laban Yakob. Ebubukinit Yakob ekewema oroŋat; Laban da ka ikeinacan kibubukis oroŋat loka Gilead.

²⁶ Kotema Laban Yakob atiar, “Ibu kiswama nyo, aisi komam eoŋ ajeni, kosodi ayaŋaar cut adweka kwape nuunatan kekileŋ?

²⁷Kanukinyo kisia, aidadaar kamaka; komam kilimokinit, tikatwarit kaboliasia ka ikososio ka isiman ka adeudeu?

²⁸ Kwabo mam ibu kisunup eoŋ ainu ikadwe lusap ka lupesur? Iswama do nuka abaŋaanut.

²⁹ Ejai eoŋ apedor aiswamakin jo erono: konye Edeke loka papakon ŋes kinera keoŋ kuare ebe, ‘Kocoite, sirikiner kaYakob nuejok karaida nueroko.’

³⁰ Natikwana da karaida kikoto alosit, naarai kimuit ijo ere loka papakon itia bo inyo kikokwaria ikadekesio?”

³¹Koboŋok Yakob kotema Laban atiar, “Naarai abu-kakurianar, ebe elemuni jo kodema eoŋ adwekon kagogoŋ.

³² Ŋin yenidumuni ijo ejaas kikonidekesio, mam ejari; kotiaka ijo yenikon yenejai keoŋ kakonyen nuka iwokoinacan, koyaŋa.” Naarai mam Yakob kejeni ebe kekokounit Rakel kes.

³³ Koloma Laban owema loka Yakob, owema da loka Lea, owema da loka abulesin aarei, konye mam abu kodum kes. Kolom kowema loka Lea, koloma owema loka Rakel.

³⁴Kwabo kelemarit Rakel aputosia nuka idekesio, kibwaik kes oboro luka akaalai, kiboikin kes, kinanyinany Laban ewema kere, konye mam edumuna kesi.

³⁵ Kotema papake atiar, “Sirikinyunyurikin ejakaitika kanu mam apedoro anyoun kakonyenekon, naarai ebami eoŋ.” Komo, konye mam edumuna aputosia nuka idekesio.

³⁶ Konyunyurikin Yakob, koŋolopata kaLaban: Koboŋok Yakob kotema Laban atiar, “Anibo akaronis? Akadiakaret anyoin, kibwapitor arukitor eoŋ?

³⁷ Naarai inanyinany ikaboro kere, inyo bo idum ijo koboro lukotogokon kere? Kibwaik ne akonyen nuka ikainacan, ka ikoniinacan, kotubokis oni luarei.

³⁸Ikar ŋul akaisaarei kija kajo; amerekekinikon, ka akineikon mam eiecununete ikalei, imaseniko da luka esipan mam eoŋ elilanari.

³⁹ Yenapoopooenenei etiaŋ mam kainununei jo, eoŋ katwanianari ŋin, ibu kitepesenenei eoŋ arai kekokwar paaran, arai kekokwar kuare.

⁴⁰Kajai kwaŋin; paaran kaarite akure noi, ka aterot kuare; kikolerito akakonye.

⁴¹ Ikar ŋul akaisaarei ajai togokon; abu kejaanak ikar itomon ka luoŋon kanuka adwekon, ikar ikanykape da kanuka esipanikon; ibu kilocenenei ekaropit irwan atomon.

⁴² Kedim Edeke loka papaka, Edeke loka Aburaam, ka Aiyoŋ naka Isaak ajaut keoŋ, timam kikurwok aijukar eoŋ kwana titai. Abu Edeke koany akaiticanitoi, ka aitaaritoi naka akaninika, kiretak jo bian kuare.”

⁴³Koboŋok Laban kotema Yakob atiar, “Apesur eraas akapesur, idwe eraas ikadwe, isipanin da ikasipanin, kere luiseseni eraas luka; eswamakini nyo lolo akapesur nu, arai ikecedwe luapotu kouriata?

⁴⁴ Aso do, ketutukot aitutuket, eoŋ ka jo, korai akajenan neajai eoŋ ka jo.”

⁴⁵ Koyaŋa Yakob amoru, kosipok araut epir.

⁴⁶Kotema Yakob ikeinacan atiar, “Kotukokisi amoru.” Koyaata amoru, kotukokisi atukot; konyamata kidunyasi katukot.

⁴⁷Komaik Laban ŋin Yegar-sakaduta; [19] konye komaik Yakob Galeed. [20]

⁴⁸ Kotema Laban atiar, “Atukot na ŋes akajenan neajai eoŋ ka jo lolo.” Ŋes kemaikinere ekekiror Galeed.

⁴⁹ Ka Misupa, [21] naarai kotema atiar, “EJAKAIT kidara eoŋ ka jo, namam kianyununor bobo.

⁵⁰Arai kiŋaru ijo akapesur, arai kimany ijo aceŋor kinye apesuruka, emamei ecetuŋanan kaoni; koany, Edeke ŋes ekajenan neajai eoŋ ka jo.”

⁵¹Kotema Laban Yakob atiar, “Koany atukot na, ido koany epir, luasipok eoŋ kidiŋika ka jo.

⁵²Korau atukot na akajenan, ido epir korau ekajenan, ebe mam atubi eoŋ atukot na abunore mama ijai, ijo da mam itubi atukot na ka epir lo abunore mama ajai, kanuka aronis.

⁵³ Edeke loka Aburaam, ido Edeke loka Nakor, Edeke loka papakec, kotub kokidiniwok.” Kiyapo Yakob kolimite Aiyoŋ naka papake Isaak.

⁵⁴Koinak Yakob asubanit koroŋat, konyarau ikeinacan ainyam atap; konyamata atap, kiboioto akuare kiya koroŋat.

⁵⁵ Kodilok Laban ainu ikedwe lutelepai ka lupesur, kilipak arereŋ; konyou Laban, koboŋo aiboisike.