Read Ebaibuli 1961 Ageun 37 Bible Online

Ageun 37 - Ebaibuli 1961 bible

Ageun 37

¹ Kiboiei Yakob kakwap nakolo kiboionono papake, akwap naka Kanaan.

² Na ŋes aur naka Yakob. Nakeraar Yosep loka ikar itomon ka lukanykaarei, ecokienenei esipan nepepe kikeinacan; kojaenena etelepat nepepe kodwe luka Bilika, ka odwe luka Silupa, aŋor nuka papake; kideideonokini Yosep papakec akirokec nueroko.

³ Ido amina Isirael Yosep aitelekarit idweke kere, naarai ŋes loaurie kamoionuke; kodonyok ekooti loka acerieik nuipu.

⁴ Koanyut ikeinacan ebe amina papakec ŋes aitelekarit ikeinacan kere; apotu kolaata, komam bobo ineras kaŋes ejok, dimarai nupeken Uŋet bon.

⁵Abu Yosep kiruja airujasit, kolimok ikeinacan: kiyatakis bobo aila ŋes.

⁶Kobala kes ebe, “Keŋaiŋaitos, kopupokisi airujasit na naabu keruja:

⁷ Naarai, koany, bala kieni oni ikes komana, ido koany, konyou ekesitika, kosipokin; ido koany, kopotu ikesikus kirimosi, kokukonokinos ekakesit.”

⁸Kobalas ikeinacan ŋes ebe, “Ipedori kereka ijo airum sio? arai ipedori teni ijo ayait sio?” Kiyatakis bobo aila ŋes kanuka airujasiake ka akekiro da.

⁹ Kiruja bobo aceirujasit, kolimok ikeinacan kobala ebe, “Koany, eruja aceirujasit; ido koany, bala akoloŋ ka elap ka aacer atomon kanadiop kakukonokinos eoŋ.”

¹⁰ Kolimok ŋesi papake ka ikeinacan; kitoron papake ŋes, kobala ebe, “Nanyoin bo airujasit na nairujat ijo? Eoŋ ka totokon ka ikoniinacan kiponi aisudedeonokin jo?”

¹¹ Kirum ikeinacan ekokote kanukeŋ; konye koric papake akirot ŋin kotauke.

¹²Koloto ikeinacan acok esipan loka papakec Sekem.

¹³Kobala Isirael Yosep ebe, “Mere icokiete ikoniinacan esipan Sekem? Bia keyakia mama ejaas.” Kobala ŋesi ebe, “Eoŋ lo.”

¹⁴ Kobala ŋesi ebe, “Aso kolot, koany ikoniinacan, arai ejaas ejok, ka esipan da arai ejai ejok; kinyak akiro.” Kwaŋin kiyakia ŋes anyoun kaditot naka Keburon, kodol Sekem.

¹⁵Kodum etuŋanan ŋes, ido koany, etubitoi kokitwi; kiŋit etuŋanan ŋol ŋes ebe, “Imoot bo inyo?”

¹⁶ Kotema atiar, “Amoot ikainacan; kolimokinai, keŋaiŋait, neicokiorito esipan.”

¹⁷ Kolimok etuŋanan ŋes ebe, “Anyout kesi kane; naarai abu kapup ebalas ebe, ‘Kaloto Dotan.’ ” Kibwapa Yosep ikeinacan, kodumak kes Dotan.

¹⁸ Kiteluosi ŋes eroko elwana, ido eroko keekuna die kinerut aiar ŋes.

¹⁹Kotemanaros atiar, “Koany, abu ca etikerujat je.

²⁰ Aso do kopotu kaarata, kacakakisi toma adiopet kapanya, kitemari oni da ebe, ‘Etiaŋ lokadedeŋan ŋes kenyami’; kasodete kaanyutu kwape ejauniata rwaru airujasiake.”

²¹ Kopup Reuben akirot ŋin kitajar kakanikec; kobala ebe, “Kenyekisi aiar.”

²²Kotema Reuben kes atiar, “Sirikibukosi aokot; kocakakisi aipany na naejai modiŋ, konye sirikidokokis akan,” tetere itajari ŋes kakanikec, ainyakakin papake.

²³Kosodi kanen, kedolu Yosep mama ejaas ikeinacan, kolacut ekootike loka acerieik nuipu loanapit;

²⁴Koyaŋaasi ŋes, kocakakis aipany: aonit da aipany komameete akip.

²⁵ Kiboikinos ainyam atap; kiteluosi akecekonye, kosesenata, ido koany, idiai erioŋet loka Isimaelin loabuni koGilead, ka akaalaikec nuebwokitos luesaete ka emina ka akinyet, idiaete ayaŋaar Misiri.

²⁶ Kotema Yuda ikeinacan ebe, “Ajokis anyoin nakidumuni oni aiar onacewok ka aimunonoor akeokot?

²⁷ Aso, ketwegelata Isimaelin, kwabo kenyekisi aidokokin awokokan mamakeŋ; naarai ŋes onacewok, ŋes awokokuan.” Kopuput ikeinacan ŋes.

²⁸ Kitorut nen Imidianin, ikagwelanarak; kibwosut ikeinacan Yosep alemun kaipany, kitwegelata Isimaelin atutubeta akaisaarei nuka epuesa. Koyaŋaasi Yosep Misiri.

²⁹ Koboŋ Reuben aipany; ido koany, komamei Yosep kaipany; kocil ikenapen.

³⁰ Koboŋo mama ejaas ikeinacan kobala ebe, “Emamei ikoku; okwe, abei eoŋ ai?”

³¹Kolemut ekooti loka Yosep, koarata ekoroi lomasenik, kidomakis ekooti aokot;

³² Koyaŋaasi ekooti loka acerieik nuipu, koinut papakec; kobalas ebe, “Kipou kadumutu lo: aso kojen arai ŋes eko oti loka ikokukon arai mere ŋes.”

³³ Kojen, kobala ebe, “Ŋes ekooti loka ikakoku; kenyam ŋes etiaŋ loerono: komamei abuonokin keponi Yosep kopoopoai.”

³⁴ Kocil Yakob ikenapen, kenap epuko kaŋabet, kokuudian ikekoku apaarasia nuipu.

³⁵ Konyout ikedwe kere lusap ka lupesur aitalakar ŋes; konye kogir aitalakario; kobala ebe, “Alomari okatwak mama ejai ikakoku aroko amonyi.” Komony papake akiyo kanukeŋ.

³⁶ Kitwegelata ŋes Imidianin Potipar koMisiri, ŋes ejakait loka Parao, ekapolon loka iserikalen.