Read Ebaibuli 1961 Ageun 4 Bible Online

Ageun 4 - Ebaibuli 1961 bible

Ageun 4

¹Kojenu Adam akeberu Keba; kopotuu, kouru Kain, kotema atiar, “Kainakin eoŋ ekes kama ejai EJAKAIT.”

²Kouruunai bobo onaceke Abel. Ido koraun Abel ekecokon amerekekin, konye Kain koraun ekakorion alup.

³Kosodi kanen ketuboros apaarasia koyau Kain amio naka alup ainakin EJAKAIT asubanit.

⁴ Koyau Abel da lukiyaik ice lukosipanike, kasiepaikec da. Kocam EJAKAIT Abel ka akesubanit.

⁵ Konye mam abu kocam Kain ka akesubanit. Konyunyurikin noi Kain, konyorididoto akekonyen.

⁶Kotema EJAKAIT Kain atiar, “Inyo bo kitunyunyurik jo? Ido kanukinyo anyorididioto akonikonyen?

⁷Arai iswamaenenei nuejok, mam kereka kicamunio? Arai mam iswamai ejok iboienenei aronis kokirigi; aiŋobeleke da ejaununei mamakon, koyaite ijo da ŋin.”

⁸ Kinerakinos Kain ka onaceke Abel. Kosodi kanen ejaas omanikor, kodakakin Kain onaceke Abel, koar ŋes.

⁹Kotema EJAKAIT Kain atiar, “Ali bo onacekon Abel?” Kotema atiar, “Mam eoŋ aleni: arai do eoŋ ekedaran loka onaceka?”

¹⁰ Kotema ŋes atiar, “Iswama anyoika? Kamonyia eporoto loka aokot nuka onacekon kakwap.

¹¹ Natikwana kikenokin ijo kotoma alup, nuapotu koonata amatar aokot nuka onacekon kakanikon.

¹²Naikorienenoo ijo alup, mam kiinanakinete akecegogoŋ; iraun ekasian epasoit da kakwap.”

¹³Kotema Kain EJAKAIT atiar, “Akaiticanet mam epedor atitiŋikinio.

¹⁴Koany, kireŋe lolo eoŋ kotoma akwap, ido anopikini akonikonyen; araun eoŋ ekasian epasoit da kakwap; ido yenikadumuni eoŋ kaari.”

¹⁵ Kotema EJAKAIT ŋes atiar, “Kanuka ŋun enyaŋi eoŋ Kain irwan akanykaarei kaneejai yeneari ŋes.” Kibwaik EJAKAIT Kain aanyunet, ŋinituŋanan yeneanyuni ŋes kinye aiar.

¹⁶ Konyou Kain kakonyen nuka EJAKAIT. Kiboienenei kakwap naka Nod, kari nakokide naka Eden.

¹⁷ Kojenu Kain akeberu; kopotuu, kouru Enok: koduk ere, komaik ekiror loka okokuke Enok.

¹⁸Kouru Enok Irad: Irad kouru Mekuyael: Mekuyael kouru Metusael; Metusaelkouru Lamek.

¹⁹Komany Lamek aŋor aarei, nasodit ekekiror Ada, nakiareit ekekiror Sila.

²⁰Kouru Ada Yabal: ŋol ŋes papakec kaŋul kalueboienenete koweman, kojaas kibaren.

²¹Ekiror loka onaceke ŋes Yubal: ŋolŋes papakec kaŋul kalueramete adeudeun ka ŋul luekusete alamarun.

²²Sila da, abu kouru Tubal-kain, ekatatan loka ibore kere yenetubi yenikaisinit ka yenikasuat: kinacike ka Tubal-kain ŋes Naama.

²³Kotema Lamek akeŋor atiar, “Ada ka Sila kiirasi ekaporoto; Yes aŋor nuka Lamek, kopuputu akakirot. Naarai abu kaar etuŋanan kanuka aimusuŋ eoŋ, Ekatumunan da kanuka aisen eoŋ:

²⁴Arai inyanio Kain irwan akanykaarei, Inyanio do Lamek irwan akaisakanykaarei ka nukanykaarei.”

²⁵Kojenu bobo Adam akeberu; kouru ikoku yenitelepat, komaik ekekiror Set; kotema atiar, “Naarai abu Edeke kainak eoŋ auruun ice aibois naka Abel; naarai abu Kain koar ŋes.”

²⁶ Ka Set da, kouru okokuke; komaik ekekiror Enos. Kapaarasia kaŋun ŋes ageuniata ituŋa aiwonet ekiror loka EJAKAIT.