Read Ebaibuli 1961 Ageun 40 Bible Online

Ageun 40 - Ebaibuli 1961 bible

Ageun 40

¹ Kosodi kokau kaŋun, kodiakasi ekawokon loka ekabaka loka Misiri, ka ekepoonike da kama ejai ejakaitikec ekabaka loka Misiri.

² Konyunyurik Parao ikekeswamak kere, ekapolon loka ikawokok, ka ekapolon loka ikepook da.

³ Koenik kes togo loka ekapolon loka iserikalen, toma aidaris, aibois naeenitere Yosep.

⁴Abu ekapolon loka iserikalen kititiŋ kes Yosep, kijaanak kes. Kodaut kanen apak.

⁵Kirujata luarei, ŋinituŋanan akeirujasit, kotoma akuare adiopet, ŋinituŋanan kwape ejaar apolou naka airujasitike, ekawokon ka ekepoon loka ekabaka loka Misiri, luaenitai kotoma aidaris.

⁶Koloma Yosep neajaas kesi tupuruc, koanyu kes, ido koany, akadakinito.

⁷Kiŋit ikeswamak luka Parao luaenitai nenipe kaŋes kotoma togo loka ejakaitike, ebe, “Inyo itakaniata ikadakinito lolo?”

⁸ Kotemasi ŋes atiar, “Kiruja isio airujasit; konye emamei yenepedori aitejenun apolouke.” Kotema kes Yosep atiar, “Mam kereka aitejenun apolou erai naka Edeke? Kolimokinai cani, keŋaiŋaitos.”

⁹Kolimok ekawokon lokapolon Yosep akeirujasit, kotema ŋes atiar, “Toma airujasitika, koany, bala ajai emusabibu akonyeneka;

¹⁰Omusabibu da ajaas atenuna auni: kosubite bala elibi, kituro atur; aibunetake da koraata araito nuekokito.

¹¹Kojai da aikopo naka Parao akanika; kalem araito, kacuanak toma aikopo naka Parao, kainak aikopo akan naka Parao.”

¹² Kotema Yosep ŋes atiar, “Na ŋes akepolou: atenuna auni kes apaarasia auni:

¹³ Akaulo kapaarasia auni itonyouni Parao akonikou, kosodi ainyakar toma aswamukon: ido ijaanakini aikopo akan naka Parao, kwape ajaar lem epone iriŋa irai ekawokonike.

¹⁴ Konye kiitununei eoŋ da naidumunia ajokis, kitodik eoŋ asianut, keŋaiŋait, kolimonori eoŋ kama ka Parao, kolem eoŋ kotogo kalo.

¹⁵ Naarai abeit kakokounio kakwap naka Iburanian; kane da mam eswamat adiokirot natikebwaikiniata eoŋ aidaris.”

¹⁶Keanyu ekepoon lokapolon ebe ejok apolou naka akiro, kotema ŋesi Yosep atiar, “Eoŋ da ajai akairujasit, ido koany, bala ebwokit ibukito iuni luajaas imugatin luekwanak;

¹⁷Obukit da lokokuju ajaas iponesio kere luka inyamat luepee luka Parao; konyamakis akweny obukit kokuju akouka.”

¹⁸Koboŋok Yosep atiar, “Na ŋes akepolou, ibukito iuni kes apaarasia auni;

¹⁹Akaulo kapaarasia auni itonyouni Parao akonikou anyoun kama ijai, kikajakini jo okitoi; akweny da enyamete akonikiriŋ alemunun kamakon.”

²⁰ Kosodi kapaaran kanakiwuniet, apaaran nakewuriere Parao, kipoik ikekejaanakinak kere inyamat luipu; kitonyou akou naka ekawokon lokapolon, akou da naka ekepoon lokapolon kokejaanakinakake.

²¹ Kinyaku bobo ekawokon lokapolon toma aiwokoke; kijaanak aikopo akan naka Parao;

²² Konye kikajak ekepoon lokapolon: kwape etejenunitor kes Yosep apolou.

²³ Konye mam ekawokon lokapolon abu kiitu Yosep, konye abu kimurwok.