Read Ebaibuli 1961 Ageun 42 Bible Online

Ageun 42 - Ebaibuli 1961 bible

Ageun 42

¹ Kosodi kejenu Yakob ebe ejaas akima Misiri, kotema Yakob odweke atiar, “Kanukinyo inolianakinotor?”

² Kotema atiar, “Koany, apup ebe ejaas akima Misiri: aso kijesaros kogwelut kaŋina; kajarata, kenyeis atwakare.”

³Kijesaros iinacan lutomon luka Yosep agwel akima Misiri.

⁴ Konye mam Yakob abu kiyakia Benyamin onace loka Yosep, nepepe kikeinacan; naarai abala ebe, “Elemuni kodoik aronis.”

⁵ Kopotu odwe luka Isirael egwelet nepepe kaŋul kaluaponenenete: naarai ajai ebeli akwap naka Kanaan.

⁶ Kerai Yosep ekayaiton loka akwap; ŋol ŋes loetwegelenenei ituŋa kere luka akwap; kopotu iinacan luka Yosep, kisudedoto kakonyeneke.

⁷Koany Yosep ikeinacan kojen kes, konye kituluor bala lokaceteker kamakec, kisiejanak, kobala kes ebe, “Kipote kai?” Kotemasi ŋes ebe, “Akwap naka Kanaan agwel inyamat.”

⁸Kojen Yosep ikeinacan, konye mam kes apotu kojenutu ŋes.

⁹ Kiitu Yosep airujasia nuerujai kanukec, kotema kes atiar, “Iraas ikarotak: iponito aanyun akwap kwape ilarononor.”

¹⁰Kobalas ebe, “Mam, papa, konye eponitos ikonibulesin egwelet inyamat.

¹¹Isio kere kirai idwe luka ediopetuŋanan; kirai da lukabeit, ikonibulesin mam eraas ikaretak nepetai da.”

¹²Kobala kes ebe, “Mam, konye iponitos aanyun akwap kwape ilarononor.”

¹³ Kobalas ebe, “Mam. Isio ikonibulesin kirai iinacan lutomon kaarei, idwe luka ediopetuŋanan kakwap naka Kanaan; ido koany, ikosiŋoorit ejai nepepe kapapakosi kiton lolo, idiopet da emamei.”

¹⁴Kobala Yosep kes ebe, “Ŋes ŋipeŋin nakabalar eoŋ yes ebe ‘Iraas ikarotak’;

¹⁵ Mere ber kigimoroi akusikirot. Madi Parao, mam inyounete kane dimikito kebu ikusinoorit da nepene.

¹⁶Kiyakiasi aupakus ediopet, koom onacekus, ka yes da kienio, tetere igimorio akusikiro, arai ejai abeit mamakus; arai mere kwaŋin, madi Parao, abeit iraas ikarotak.”

¹⁷Kibwaik kes kere nepepe aidaris apaarasia auni.

¹⁸ Kobala Yosep kes kapaaran kanakiwuniet ebe, “Kiswamata kwanata, tetere ijarete: naarai ayoŋit eoŋ Edeke.

¹⁹Arai teni iraas lukabeit, koenai cani ediopet koinacanakus kaidarisikus; konye kolototo luce, koyaŋaasi akima nuka eteŋei lokokalekus;

²⁰ ido koinuniata inooritikus; kosodete akirokus aitogogoŋio, yes da mam itwakete.” Kiswamata kwaŋin.

²¹ Kotemanaros bonik ebe, “Abeit kidiakarit kanuka onacewok, naarai kipou kaanyutu eketau kwape eticanitor, kwape kinainaitor, oni da kipou kagiro apupun; ŋes kidoikinioto ican lu.”

²² Koboŋok Reuben kes ebe, “Mam eoŋ abu kalimok yes ebe, ‘Sirikidiakata nuka ikoku’; kosodete yes aigir apupun? Ŋes kitepesenitotor oni akeokot.”

²³Mam apotu kojenut ebe ejeni Yosep akecekiro; naarai ajai ekejulan kidiŋike kakes.

²⁴Kiboŋok kes epur, komony akiyo; koboŋo bobo mama ejaas, kiner kakes, kocupo Simeon kokidiŋikec, koen kakonyekec.

²⁵ Kosodi Yosep aicorakin ailelebanar iborokec akima, ainyakakin da ŋolituŋanan akepesan opukoke, ainanakin da inyamat luka erot: kiswamanakinai kwaŋin.

²⁶Kisibwoka asigiriakec akima, kolototo.

²⁷ Naalaearia aupakec ediopet epukoke aitanyam akesigiria kaibois naaperete, koturiaikin akepesan; ido koany, kejaas aituk naka epukoke.

²⁸Kotema ikeinacan atiar, “Kenyakakin akapesan; ido koany, ejaas opukoka.” Kodusaununos itauonokec, kibelonokinos komaranete, kobalas ebe, “Inyo bo lolo yenikisubak oni Edeke?”

²⁹Kopotu neejai papakec Yakob akwap naka Kanaan, kolimonokis kere nuapotu kodoikis kes; ebe,

³⁰ “Etuŋanan, ekapolon loka akwap, abu kisiejanak sio, koomite ebe kirai isio ikarotak akwap.

³¹Katemasi atiar, ‘Kirai lukabeit; mam kirai ikarotak;

³²Kirai iinacan lutomon ka luarei, odwe luka papakosi; idiopet emamei, ikosiŋoorit da ejai kapapakosi kiton lolo kakwap naka Kanaan.’

³³ Etuŋanan, ekapolon loka akwap, kotema sio atiar, ‘Kwanata ŋes ajenunia ebe iraas lukabeit; kinyeinere ediopet koinacanakus, koyaŋaasi akima kanuka eteŋei lokokaliakus, koloto.

³⁴ Koinut ikusinoorit; kasodi kajen ebe mam cut iraas ikarotak, konye iraas lukabeit; kalaeakinete do onacekus, yes da igwelenenete do kakwap kana.’ ”

³⁵ Kosodi ebukete iboro lukotoma opukoikec, koany, eriagi loka apesan loka ŋolituŋanan kojai opukoke: keanyutu kesi ka papakec iriaginikec luka apesan, kokuriakaros.

³⁶ Kobala papakec Yakob kes ebe, “Kidemasi eoŋ ikadwe: Yosep emamei, Simeon da emamei, ido bobo kikotos ademar Benyamin da; ŋun kere kalanirikinitos.”

³⁷Kotema Reuben papake ebe, “Iari ijo odweka luarei, arai mam enyakunit mamakon; koinakinai akanika, enyakuni eoŋ ŋes bobo mamakon.”

³⁸ Kobala ebe, “Mam ikakoku elosi nepepe kayes; naarai abu onaceke kotwana, ŋes da asalaki bon; kedoiki aronis korot kaloitorete, itolomarete akakorwo toma okatwak kanuka aiturur.”