Read Ebaibuli 1961 Ageun 47 Bible Online

Ageun 47 - Ebaibuli 1961 bible

Ageun 47

¹ Kosodi koloma Yosep kolimok Parao ebe, “Adolu papaka ka ikainacan ka isipaninikec luka amerekekin ka aituk, ka iboro kere luejaatar, epote kakwap nako Kanaan; ido koany, ejaas akwap nako Gosen.”

² Koseu koinacanake ituŋa ikany, koinu Parao.

³ Kobala Parao iinacanake ebe, “Anyoin bo akusiswam?” Kotemasi Parao atiar, “Eraas ibulesinikon ikecokok, isio ka lukapapaakosi da.”

⁴ Kotemasi Parao atiar, “Kiponit aiboi akwap na; naarai emameete inya kanuka ikosisipanin; naarai ededeŋ noi ebeli kakwap nako Kanaan: natikwana, kiŋaiŋait, kisiik ikonibulesin aiboikin akwap nako Gosen.”

⁵Kobala Parao Yosep ebe, “Apotu papakon ka ikoniinacan mama ijai:

⁶Akwap nako Misiri ejai akonyenekon; kisiboik papakon ka iinacanakon neitelekarit ajokis kotoma akwap; aso kiboikinos akwap nako Gosen: ido arai ijeni kakesi luekukuraka kitarau kes lukapolok luka ibareneka.”

⁷ Kitoloma Yosep papake Yakob, kibwaik akonyen nuka Parao; kilipak Yakob Parao asuliany.

⁸Kotema Parao Yakob atiar, “Imwaasi ai apaarasia nuka ikar luka aijarakon?”

⁹ Kobala Yakob Parao ebe, “Apaarasia nuka ikar luka alositeka eraas ikar akwatat ka akaisauni: apaarasia nuka ikar luka aijaraka eraas luikidioko ido lueroko, ido mam edolokinete apaarasia nuka ikar luka aijar naka lukapapaaka kapaarasia nuka alositekec.”

¹⁰ Kilipak Yakob Parao asuliany, koloma kakonyen nuka Parao.

¹¹ Kisiboik Yosep papake ka ikeinacan, koinak aibois kakwap nako Misiri, neetelekarit ajokis kotoma akwap, akwap naka Ramases, kwape kicorakinia Parao.

¹² Kitanenenei Yosep papake ka ikeinacan ka ekal kere loka papake, kinyamat, kwape ajaatar ikecedwe.

¹³ Komamuut inyamat kakwap kere; naarai adedeŋ noi ebeli, kikarakis luka akwap nako Misiri ka luka akwap nako Kanaan, kanuka ebeli.

¹⁴ Kotukonok Yosep apesan kere nuajaas kakwap nako Misiri, kakwap nako Kanaan, naetwegelenenea akima. Koyau Yosep apesan togo loka Parao.

¹⁵ Kedaut apesan kere nuka akwap nako Misiri ka nuka akwap nako Kanaan atukonokinio, kopotu Imisirian kere mama ejai Yosep, kobalas ebe, “Koinakinai sio inyamat: kanukinyo kitwakikinia akonyenekon? Naarai kiwolikis sio apesan.”

¹⁶Kobala Yosep ebe, “Koinakinai ibarenekus; eoŋ da kainanakini itia ibarenekus, arai kiwolikinitos apesan.”

¹⁷Koinutu Yosep ibarenekec: koinak Yosep kes inyamat aisieca ibalasin, ka isipanin luka amerekekin, ka aituk, ka asigirian: kitanyam kes inyamat ekaru ŋol isiecanarete ibarenekec kere.

¹⁸Kedaun ekaru ŋol, kopotu bobo neejai kokaru kalokiareit, kobalas ŋes ebe, “Mam kimunonikini ejakaitikosi kwape adaunotor apesanakosi kere; isipanin da luka ibaren araunos luka ejakaitikosi; mam yenesalit kakonyen nuka ejakaitikosi, dimarai awatekosi ka akwapukosi:

¹⁹Kanukinyo kitwakikinia akonyenekon, isio ka akwapukosi da? kogwelai sio ka akwapukosi kinyamat, kiraun do isio ka akosikwap ibulesin luka Parao; koinakinai sio ikinyom, kajarata kenyeis atwakare, kinyek akwap asilior.”

²⁰Kogwelak kwaŋin Yosep Parao akwap kere nako Misiri; naarai apotu Imisirian kogwelanasi ŋinituŋanan ekemanikor, naarai abu ebeli kodedeijik kes: koraun akwap naka Parao.

²¹Kitubulesenei da ituŋa kwape ajaatar oreriakec ageun koikor loka Misiri neesanit aitodol awasiake ace.

²² Konye mam abu kogwel akwap naka isasedotin; naarai ajaas isasedotin ewai loainanakini Parao, konyamenenete ewaikec loainanakini Parao kes: ŋes mam agwelariata akecekwap.

²³Kosodi kotema Yosep ituŋa atiar, “Koany, agwelak lolo Parao yes ka akusikwap: koany, ikinyomokus lu, koyeata.

²⁴Kosodete naisakeneniata, iinanakinete Parao idiopet kokany, eraunos iwaitin iwoŋon lukus, araun luyean, araun da ikusinyamat, ido luka ikaliakus, inyamat da luka idwekus ludidik.”

²⁵ Kobalas ebe, “Ibu ijo kitajar sio kotoma atwanare: kadumutu asianut kakonyen nuka ejakaitikosi, ido kiraun ibulesin luka Parao.”

²⁶ Kisilak Yosep ekisil ŋol akwap nako Misiri aitodol lolo, ainanakin Parao idiopet kokany; nabarai akwap naka isasedotin bon ŋes mam abu koluor naka Parao.

²⁷ Kiboienenei Isirael kakwap nako Misiri, kakwap nako Gosen; kodumut iborokec kotoma, kouriaros, kipuaros noi noi.

²⁸Kiboikin Yakob kakwap nako Misiri ikar itomon ka lukanykaarei: kwaŋin apaarasia nuka Yakob, ikar luka aijarake, imwaasi ikar akwatat ka akaisaoŋon ka lukanykaarei.

²⁹ Koapu apak naka atwanare naka Isirael: konyarau okokuke Yosep, kotema atiar, “Arai adumunit asianut kakonyenekon, keŋaiŋait, kibwaik akanikon kwap kamurwoka, kikonak kasianut ka abeit; keŋaiŋait, sirikiidaik Misiri:

³⁰ Konye kajotoor nepepe kalukapapaaka, kidakari eoŋ koMisiri, kidaik aibois nakidaanakinakec.” Kotema atiar, “Eswamai kwape kitemaria.”

³¹ Kotema atiar, “Kiyapoikinoi.” Kiyapoik ŋes, Kitulur Isirael akekou koitadake.