Read Ebaibuli 1961 Ageun 48 Bible Online

Ageun 48 - Ebaibuli 1961 bible

Ageun 48

¹Kosodi kokau kaŋun, kolimokinai Yosep ebe, “Koany, edek papakon.” Koyaŋa ŋesi odweke luarei, Manase ka Epuraim.

²Kolimokinai Yakob ebe, “Koany, ebunit okokukon Yosep mama ijai.” Kiriun Isirael, koboikin oitada.

³ Kobala Yakob Yosep ebe, “Edeke Lokapedor kere abu ketaanyikin koLus kakwap nako Kanaan, kesireren.

⁴ Kabala ŋesi eoŋ ebe, ‘Koany, kesuuri, kesupui, ketuluori da atukot naka atekerin: ido ainakini aurikon naetupakini akwap na araun airumet naka ikar ka ikar.’

⁵ Kwana da odwekon luarei, luiwurie ijo koMisiri koroko eoŋ kebuno neijai koMisiri eraas lukaŋ; eraunos Epuraim ka Manase idweka kwape ka Reuben ka Simeon.

⁶Aurikon da naiwurienenei kokau kaŋul, eraun nakon, emaanakinio ikiroria luka iinacanakec kotoma airumukec.

⁷ Ka eoŋ da, naanyounio koPadan, nukican kotwana Rakel kakwap nako Kanaan korot, koroko apak es alit epol adolore Epurat, kedaik ŋina orot loebei Epurat (ŋes Bet-lekem).”

⁸Koany Isirael odwe luka Yosep, kobala ebe, “Lukaŋai bo lu?”

⁹ Kotema Yosep papake atiar, “Kes odweka lukainakini Edeke kane.” Kobala ebe, “Kisukuny kes, keŋaiŋait, eoŋ da elipakini kes arereŋ.”

¹⁰ Ido kowariwarete akonye nuka Isirael kanuka amojoŋ, komam epedori asesen. Kisukunyik, kotun, konu.

¹¹ Kobala Isirael Yosep ebe, “Mam abu kaomite ebe aanyuni akonikonyen; ido koany, ketaany da Edeke aurikon.”

¹²Kitonyou Yosep kes kokidiŋ kakuninike; kitulur akekonyen kwap.

¹³Koyaŋau Yosep kes luarei, Epuraim kakanike nakoteten mama ejai akan nakokediany naka Isirael, ka Manese da kakanike nakokediany, mama ejai akan nakoteten naka Isirael, kisukunyik mama ejai.

¹⁴Korio Isirael akekan nakoteten, kidokok akou naka Epuraim, ŋes lodidi, ka akekan nakokediany akou naka Manase, kepelet ailokonyikin akekanin; naarai kerai Manase ekiyai.

¹⁵ Kilipak Yosep arereŋ, kobala ebe, “Edeke loalosenenete lukapapaaka Aburaam ka Isaak kakonyeneke, Edeke loketanyamenenei apaarasiaka kere aitodol lolo.

¹⁶ Emalaika lokalakuni karonis kere, koinak itelepai arereŋ; ekakiror da kolimitere kes, ka ikiroria luka lukapapaaka Aburaam ka Isaak; ido koluoros etuŋat loepol kokidiŋ akwap.”

¹⁷ Keanyu Yosep papake ibwaikini akekan nakoteten akou naka Epuraim kokadak: kodak akan naka papake alemun kakou naka Epuraim aidokokin akou naka Manase.

¹⁸Kotema Yosep papake atiar, “Mam, papa; naarai ŋol ŋes ekiyai, kidokok akanikon nakoteten akouke.”

¹⁹ Kogiri papake kobala ebe, “Ajeni, oko kuka, ajeni: ŋes da eluori ateker, eluori ŋesi da lokapolon; konye onaceke lodidi ŋes itelekari kapolou, eraun da aurike atekerin nuipu.”

²⁰ Kilipak arereŋ kapaaran kaŋin, kobala ebe, “Kamakon ŋes ilipenena Isirael arereŋ; ebe, ‘Edeke kituluo kwape Epuraim ka Manase.’ ” Kibwaik Epuraim ageikin Manase.

²¹ Kotema Isirael Yosep atiar, “Koany, atwani; konye ejaenena Edeke kayes, kinyakari bobo akwap naka lukapapaakus.

²² Ido kainak ewai [34] ediopet aitelekar iinacanakon, naalemuni kakan naka Emorait kekakilen ka akakabwa.”