Read Ebaibuli 1961 Ageun 49 Bible Online

Ageun 49 - Ebaibuli 1961 bible

Ageun 49

¹ Konyarau Yakob odweke, kotema kes atiar: “Kotukonokinos nepepe kalimokis nukidoikinete yes kapaarasia nuepote.

² Kotukonokinos bonik, kiirasi, yes odwe luka Yakob: Kopupokisi Isirael papakus.

³ Reuben, irai ijo ekiyaika, akagogoŋ, ka ageunet naka akagogoŋ; Loitelekarit kapolou, ido loitelekarit kagogoŋ.

⁴ Ilelei bala akipi, kikurwokini aitelekar; Naarai ibu kodoka oitada loka papakon: Kosodi komunau; abu kolot aperitika.

⁵ Simeon ka Lebi kes iinacan; Lujiis luka adedeŋ kes ikecekileŋa.

⁶ Wu ekatau, sirikiloma mama ejai ainerunikec; Akaibuses, mam imorikikin mama ejai atukokinikec; Naarai kanuka anyunyurakec apotu koarata etuŋanan, Kanuka elepakec da apotu kojepata emoŋ.

⁷ Kikenokinai akecenyunyura, naarai kepol; Ka aisiopokec, naarai kerai naka ameŋeranut: Atiakari kes kotoma Yakob, Ido esiarakini kes koIsirael.

⁸Yuda, kiturenenete jo ikoniinacan: Akonikan ejaun omurisiŋa luka lukasurupokon: Ekukonokinos odwe luka papakon kakonyenekon.

⁹ Yuda ŋes okoku loka eŋatuny: Okokuka, idoka anyoun kama kalumeian; Abu kokukum, kidipidipakin bala eŋatuny, Ido bala aŋatuny: iŋai itonyouni ŋes?

¹⁰ Mam ebela loka ajakanut enyouni koYuda, Karaida ebela loka ekayaiton kokidiŋ kakejeneke, Aitodol neebunio Silo. Ido erimarete ŋes ituŋa.

¹¹Eenikini ikoku yenika ebalasitike omusabibu, Ikoku yenika asigiriake omusabibu loejok; Abu kilosia ebino ikegoen, Ka aokot da nuka emusabibu abu kilosia anapitoke:

¹²Ereneunete akonyeneke kanuka ebino, Ekwanunete ikekela da kanuka akile.

¹³ Sebulun iboienenei kodoket loka aŋolol: Korai edoket kanuka imerin; Eikoruke da ŋes Sidon.

¹⁴Isakar ŋes asigma nakagogoŋ; Naidipidipitoi kokidiŋ kaujoi nuka amerekekin;

¹⁵Koany ŋesi aibois naka aibworar ebe ejok, Ka akwap da ebe erai naisiyalamikinit; Kokukum aidak kokeperike, Korau ebulesit lokeswaman nukailolitoi.

¹⁶ Dan etubonokini iketuŋa, Kwape ediopet loka atekerin nuka Isirael.

¹⁷ Dan eraun emun korot, Asigirikoloŋ kotoma osokot, Naekonyi atitiban nuka ebalasit, Kolatun loibwanenit kau.

¹⁸ Edarit akoniitajar, wu EJAKAIT.

¹⁹ Gad, icikakinete ikaŋatak lueŋasete; Konye ŋes da icikakini akecetitibat.

²⁰Aser, eburior akeimuj kotomake, Einakini idiasio luibusakinito ekabaka.

²¹Naputali ŋes amori naelapadai; Einakini akiro nukajijimak.

²²Yosep ŋes atenu naerai, Atenu naerai eapie kaleles; Ilanyito atenunake arwatat.

²³ Eticanata ikagumak ŋes noi, Egumete ŋes, imanito ŋes:

²⁴ Konye kicat akekabwa kagogoŋ, Kitogogoŋai akekanin, Kakanin nuka Ekagogoŋon loka Yakob. (Kanen ŋes Ekecokon, amoru naka Isirael,)

²⁵ Kanuka Edeke loka papakon, lokiŋarakini, Ido kanuka Lokapedor kere, lokisirereŋi, Arereŋesio nuepote kakuj nakokuju, Arereŋesio da nuepote kaidules naka akwap, Arereŋesio da nukokisin, ka nuka akoik.

²⁶Arereŋesio da nuka papakon Etelekasi cut arereŋesio nuka lukapapaaka Anatar eikoru lokosaŋe loka iukon lumam edaunos: Ebeete akou naka Yosep, Ido osiaduk loka akou naka ŋol kaloetiakunitai koinacanake.

²⁷ Benyamin ŋes epeet loegwaragwarai; Tupuruc enyamenenei lumejauna, Eboŋ da ekorenenei luŋatuna.”

²⁸Ŋun kere kes atekerin atomon ka nuarei nuka Isirael: ŋun da kes nuabu papakec kolimonok kes ilipakini arereŋ; abu kilipak ŋolituŋanan kwape ajaar akerereŋ.

²⁹ Kicorak kes kotema atiar, “Kayaŋaario neejaas ikatuŋa: kidaikis eoŋ neidaikinitai lukapapaaka toma abua naejai omanikor loka Epuron Ekitit.

³⁰ Toma abua naejai omanikor loka Makupela, loitei Mamure kakwap nako Kanaan, naabu Aburaam kogwel ka emanikor da kaneejai Epuron Ekitit araun airumet nakidaanakina:

³¹ Ŋes neaponi kidaikinai Aburaam ka Sara akeberu; ŋina da edaikinio Isaak ka Rebeka akeberu; ŋipoŋina da abu kedaik Lea:

³²Emanikor ka abua naejai toma, loagwelio kaneejaas idwe luka Ket.”

³³Kedau Yakob aicor odweke, kosukok akekejen koitada, kojal aijar, koyaŋaarai mama ejaas iketuŋa.