Read Ebaibuli 1961 Ageun 50 Bible Online

Ageun 50 - Ebaibuli 1961 bible

Ageun 50

¹ Kibirokin Yosep akonyen nuka papake komony, konu.

² Kicorak Yosep ikebulesin luaraas imurwok aitoono papake: kitoonoto imurwok Isirael.

³ Kodautu apaarasia akaisaoŋon itoonete; naarai kwape kwaŋin apaarasia nuka aitoon etia nepenen: kibworoto Imisirian ŋes adaun apaarasia akais akanykaarei.

⁴ Kosodi kedaunos apaarasia nuka aibworo ŋes, kotema Yosep ituŋa luka etogo loka Parao atiar, “Arai adumunit asianut kakonyenekus, keŋaiŋaitos, kinerata kaki nuka Parao atiar.

⁵ Abu papaka kesiyap eoŋ ebe, ‘Koany, atwani: toma ates naabu eoŋ elopet kabok toma akwap nako Kanaan ŋes kidaikini.’ Aso, keŋaiŋait, kalot keda papaka ido aboŋuni.”

⁶Kobala Parao ebe, “Kolot kida papakon kwape kisiyapoo kolo.”

⁷Kolot Yosep aida papake: koloto ikejaanakinak da kere luka Parao nepepe kaŋes, imakio lukotogoke, ka imakio da luka akwap nako Misiri.

⁸Ekal da kere loka Yosep, iinacanake da, ka ekal da loka papake: nabarai ikecedwe ludidik, ka isipaninikec luka amerekekin ka luka aituk, ŋul bonik apotu kesi kinyeis kotoma akwap nako Gosen.

⁹Kolot ŋesi nepepe kagalin ka luebwanenito ibalasin: koraun erioŋet loepol noi.

¹⁰ Kodoloto opejal loka Atad, loejai okekwa loka Yorodan, kokuudianata kaŋina akuudian naepol noi: kodau apaarasia akanykaarei ibworo papake.

¹¹Nakiirasi ŋul lueboienenete kotoma akwap, kes Ikanaanin, aibworo kopejal loka Atad, kobalas ebe, “Epol ca ma aibworo na kama ejaas Imisirian.” Ŋes emaikinere ekekiror Abel-Misiraim, naejai okekwa loka Yorodan.

¹²Kosubakis ŋes odweke kwape kolo ecorakinia kes:

¹³ Naarai apotu odweke kodakasi ŋes toma akwap nako Kanaan, kidaikis toma abua nakotoma emanikor loka Makupela, loitei Mamure, naagweli Aburaam nepepe kemanikor da, araun airumet nakidaanakina, kama ejai Epuron Ekitit.

¹⁴Koboŋo Yosep Misiri, ŋes ka ikeinacan, kere da lualosito kaŋes aida papake; kedau ŋesi aida papake.

¹⁵ Keanyutu iinacan luka Yosep ebe atwana papakec, kobalas ebe, “Elemuni kilai Yosep oni, ka aitokokol da oni cut kanuka aronisio kere nukolo kiswamanakini oni ŋes.”

¹⁶Kiyakikis Yosep, kobalas ebe, “Abu papakon kicorak eroko ketwana ebe,

¹⁷ ‘Ilimokinete do Yosep ebe, Keŋaiŋait, kitim adiakaret naka ikoniinacan, ka aronisikec da, naarai apotu kesi kiswamakis jo nueroko.’ Natikwana da, kiŋaiŋait isio jo, kitim adiakaret naka ibulesin luka Edeke loka papakon.” Komony Yosep naeneratatar kaŋes.

¹⁸ Apotu ikeinacan koloto kokukonokinos kakonyeneke; kobalas ebe, “Koany, kirai isio ikonibulesin.”

¹⁹ Kotema Yosep kes atiar, “Sirikikuriakata: ajai do eoŋ toma aibois naka Edeke?

²⁰ Ipeleikinito yesi aiswamakin eoŋ aronis; konye Edeke epeleikinit aiswamakinia eoŋ ajokis, ka aitodol, kwape ejaar lolo, aitajar ituŋa luipu kinyeis atwakare.

²¹ Aso natikwana sirikikuriakaros; ketanenenei yes ka ikusidwe da ludidik.” Kitalaka kes, kolimonok nuka asianut.

²²Kiboikin Yosep Misiri, ŋes ka ekal da loka papake; kobut Yosep ikar akwatat ka itomon.

²³ Koany Yosep idwe luka Epuraim ka ipapai da; ido aurio idwe luka Makir okoku loka Manase kakuŋin nuka Yosep.

²⁴ Kolimok Yosep ikeinacan ebe, “Atwani: konye mam ekurwokini Edeke aanyanar yes, alemar yes kakwap kana, kinyakari da akwap naeyapoikinit ŋesi Aburaam, ka Isaak, ka Yakob.”

²⁵ Kisiyapo Yosep idwe luka Isirael kobala ebe, “Mam ekurwokini Edeke aanyanar yes, iyaŋaarete da akakojo alemar kakwap kana.”

²⁶Kotwana do Yosep, kodaunite ikar akwatat ka itomon: kitoonoi, kosodete aibwaikin toma asaduku nakidais koMisiri.