Read Ebaibuli 1961 Ageun 9 Bible Online

Ageun 9 - Ebaibuli 1961 bible

Ageun 9

¹ Kisirereŋ Edeke Noa ka odweke, kotema kes atiar, “Kouriata, kipuaros, kilelebata akwap.

² Ŋolitiaŋ kere loka akwap, ka ŋinibore kere yeneporitoi kapak kokuriana yes ka etasuro; ka lueliatos kere luka akwap ka lukecor kere ainak akaninikus.

³ Ŋinibore kere yenelosi yenejari kere eraun inyamatakus; kwape ikui kainakis yes kere.

⁴ Konye akiriŋ naejai aijar tomake, kes akeokot, mam inyamenenete.

⁵ Mam kakurwokin aibura akusiwokot, aokot nuka aijarakus, eburai kes kakan naka ŋolitiaŋ; kakan da naka ituŋanan, karaida kakan naka onace loka ŋinituŋanan, eburai eoŋ aijar naka ituŋanan,

⁶ ŋinituŋanan yenebukori aokot nuka ituŋanan, akeokot da ebukorio, kanuka ituŋanan kaŋin: naarai abu Edeke kosub ituŋanan toma aputoke.

⁷ Yes da, kouriata, kipuaros; kilelebata akwap, kiyatanakinos noi kanen.”

⁸Kotema Edeke Noa ka odweke atiar,

⁹“Koany, eoŋ da, etogogoŋi akaitutuket kajo, nepepe ka akusiwur da nakitupanakini yes.

¹⁰ Nepepe ka isubat kere yenejari yenejai nepepe kayes, lueporitos, ka ibaren, ka ŋolitiaŋ loka akwap nepepe kayes; kere luelomunete kataker, ŋolitiaŋ loka akwap.

¹¹ Etogogoŋi eoŋ akaitutuket nepepe kayes, mam bobo amudiari akuan kere kakip nuka akalele; ido mam ejaun bobo akalele amudiar akwap.”

¹² Kotema Edeke atiar, “Na ŋes aanyunet naka aitutuket naetutuki eoŋ kayes, ka ŋinisubat kere yenejari yenejai nepepe kayes aitodol aturio numam edaunos.

¹³Asipokini ekataluka odou, ido eraunun ŋesi aanyunet naka aitutuket kokidiŋikaŋ ka akwap.

¹⁴Kosodi naayaununia eoŋ edou kokuju kakwap etakanununei etaluka kodou.

¹⁵ Eitununei eoŋ da akaitutuket naabu ketutuk eoŋ nepepe kayes, ka ŋinisubat yenejari yenikakuan kere, ido mam bobo akipi eraunos akalele amudiar akuan naka ŋinibore kere.

¹⁶ Ejaununei etaluka odou, anolekini eoŋ ŋes, kasodi akiitun aitutuket namam edaun naabu Edeke kitutuk kaninisubat kere yenejari yenikakuan yenejai kakwap.”

¹⁷Kotema Edeke Noa atiar, “Ŋin ŋes aanyunet naka aitutuket naabu eoŋ ketogogoŋ kokidiŋikon ka ŋinikuan kere naejai kakwap.”

¹⁸ Odwe luka Noa, lualomunete kataker kes Sem, ka Kam, ka Yapet: Kam da ŋes papa loka Kanaan.

¹⁹ Ŋul luuni kes odwe luka Noa: ido ipapaikec kaŋul kes luesiarakinos akwap kere.

²⁰ Kogeu Noa araun ekakorion, kira emusabibu;

²¹ Komat ajon, komerikin, kojai titai kotoma owemake.

²²Koany Kam, papa loka Kanaan, ŋes imujalal, kolimok ikekinacan iarei luajaas kiŋa.

²³ Kolemut Sem ka Yapet elou, kibwaikis okeperinikec kere, koboŋoboŋoto ekaukau, kimukosi papakec kinye amujalal; ido kanueteoto kiŋaren, mam apotu koanyut papakec imujalal.

²⁴Kikua emeret loka Noa, kojenu nuabu okokuke lodidi kiswamak ŋes.

²⁵ Kotema atiar, “Kikenokinoi Kanaan; Korau ebulesit loka ibulesin kama ejaas ikekinacan.”

²⁶ Ido kotema atiar, “Kituritete EJAKAIT, Edeke loka Sem; Korau Kanaan ekebulesit.

²⁷ Kitalal Edeke Yapet, Kiboienenei kotoma oweman luka Sem; Korau Kanaan ekebulesit.”

²⁸Kodau Noa ikar akwat auni ka akaisakany akaulo kakalele.

²⁹ Apaarasia kere nuka Noa kes ikar akwat akanykaoŋon ka akaisakany: kotwani.