Read Ebaibuli 1961 2 Samuel 10 Bible Online

2 Samuel 10 - Ebaibuli 1961 bible

2 Samuel 10

¹ Kosodi kanen akaulo kaŋun, kotwana ekabaka loka idwe luka Amon, kirum Kaŋun okokuke aiboisike.

²Kotema Daudi atiar, “Ketodikini Kaŋun okoku loka Nakas asianut, kwape ketodikinia papake eoŋ asianut.” Kwaŋin kijuka Daudi ikejaanakinakake aitalakar ŋes kanuka papake. Kopotu ikejaanakinak luka Daudi akwap naka idwe luka Amon.

³Konye apotu ikapolok luka idwe luka Amon kotemasi Kaŋun ejakaitikec atiar, “Iwomit ijo ebe eyoŋit Daudi papakon, aijukakini jo lukitalakarete? Mam kereka Daudi kijukakinit jo ikekejaanakinak airere ere, ka airot ŋes, ka amudiar?”

⁴ Koyaŋa do Kaŋun ikejaanakinak luka Daudi, kobaren atutubet naka ipenekakec, kotuboto ikecenapen kokidiŋ, kiton oosikec, kotwara kes.

⁵Kosodi kelimokin Daudi ŋun, kijuka airiamakin kakes; naarai eleicikinito noi ituŋa, Kotema ekabaka atiar, “Kopaikis Yeriko aitodol neecekuniata ipenekakus, kosodete konyet aboŋun.”

⁶ Nakeanyuniata idwe luka Amon ebe arokiata kesi kama kaDaudi, kijukasi idwe luka Amon kiboleikis kIsurian luka Bet-rekob, ka Isurian luka Soba, lualosete kakeje ilukumin akaisaarei, ka ekabaka loka Maaka kaituŋa elukumit, ka ituŋa luka Tob ilukumin itomon ka luarei.

⁷ Kepupu Daudi, kijuka Yoab, ka ajore kere naka ituŋa lukirigin.

⁸Kolomut idwe luka Amon, kiderakinos ejie korute: kejaas Isurian luka Soba, ka luka Rekob, ka ituŋa luka Tob ka Maaka, bonik korony.

⁹Nakeanyunia Yoab ebe ejai ejie kiŋaren kokau da, koseu ituŋa kere luaseunitai koIsirael, kiderak kes aitiji Isurian:

¹⁰Kititiŋ Abisai onaceke ituŋa ice kere, kiderak kes aitiji idwe luka Amon.

¹¹Kotema atiar, “Arai keetelekasi Isurian eoŋ, kosodi ijo aisigalikin eoŋ: konye arai kiitelekasi idwe luka Amon jo, kasodi eoŋ abunore aisigalikin jo.

¹² Kotitiŋior, ketodiasi ekiliokone kanuka ituŋawok, ka ireria luka Edekewok: kiswama EJAKAIT nuitojokit ŋesi.”

¹³Kikunyak do Yoab ka ituŋa lukejaas kaŋes aitiji Isurian: kokerata kakonyeneke.

¹⁴Keanyut idwe luka Amon ebe akerata Isurian, kokerata kesi da kakonyen nuka Abisai, kolomasi ore. Kosodi Yoab aboŋun kama kidwe luka Amon kobu Yerusalem.

¹⁵Keanyut Isurian ebe epikor kes kakonyen nuka Isirael, kotukonokinos.

¹⁶Kijuka Kadadeser, kitolomut Isurian luajaas okekwa juwai kecor; kopotu Kelam, kiŋarenikinite kes Sobak ekapolon loka ajore naka Kadadeser.

¹⁷Kolimokinai Daudi; kotukonok Isirael kere, kodok Yorodan kobu Kelam. Kiderakinos Isurian aitiji Daudi, kojioto kaŋes.

¹⁸Kokerata Isurian kakonyen nuka Isirael; koara Daudi luka Isurian, ituŋa luka agalin akwat akanykaarei, ka ikebwanenok ilukumin akaisaoŋon, kinom Sobak ekapolon loka ajorekec, kotwanik nen.

¹⁹ Keanyutu ikabakan kere luaraas ikejaanakinak luka Kadadeser ebe epikor kes kakonyen nuka Isirael kitutukoto ka Isirael nukainapakin, kijaanakis kes. Kwaŋin kokuriakaros Isurian aisigalikin bobo idwe luka Amon.