Read Ebaibuli 1961 2 Samuel 11 Bible Online

2 Samuel 11 - Ebaibuli 1961 bible

2 Samuel 11

¹ Kosodi kanen, kedolu ekaru, kapak naalomariata ikabakan ejie, kijuka Daudi Yoab, ka ikekejaanakinak nepepe kaŋes, ka Isirael kere; komudiasi kesi idwe luka Amon, kirigaut Raba. Konye kosalak Daudi Yerusalem.

² Kosodi kanen eboŋ, konyou Daudi kaperitike, kosakasak koswi loapadalal loka etogo loka ekabaka: koswi koany aberu iloŋi; ajokuna noi aberu asesen.

³ Kijuka Daudi kiŋit nuka aberu. Kolimokinai ebe, “Mere ŋin Bat-seba, akoku naka Eliam, aberu naka Uria Ekitit?”

⁴ Kijuka Daudi ikiyakia, koyaŋa ŋes; kolom ŋin mama ejai ŋesi, kopero kaŋes; (naarai aponi kitesegaarai ŋin kanumam alauniteke;) koboŋo togoke.

⁵ Kopotuu aberu; kijuka alimokin Daudi, kotema atiar, “Kija eoŋ kakoik.”

⁶Kijuka Daudi mama ejai Yoab ebe, “Kijukakinai eoŋ Uria Ekitit.” Kijuka Yoab Uria mama ejai Daudi.

⁷Kedolu Uria neejai ŋesi, kiŋit Daudi ŋes kwape ajaar Yoab, ka ituŋa, ido kwape ajaar ejie.

⁸ Kotema Daudi Uria atiar, “Kolot togokon, kilota akonikeje.” Konyou Uria kotogo loka ekabaka, kotupitere ŋes akorakinet naka inyamat luainakini ekabaka ŋes.

⁹ Konye koper Uria okek loka etogo loka ekabaka nepepe kikejaanakinak kere luka ejakaitike, mam abu kolot togoke.

¹⁰Kelimokin Daudi ebe, “Mam Uria abu kolot togoke.” Kotema Daudi Uria atiar, “Mam jo ibonunit kalosit? Inyo bo mam jo ilosio togokon?”

¹¹ Kotema Uria Daudi atiar, “Iboie asaduku, ka Isirael, ka Yuda koswamin; idukurito ejakaitika Yoab, ka ikejaanakinak luka ejakaitika ais; alomari kereka eoŋ togoka ainyam, ka aimat, ka apero kaberuka? Kwape ijaria ijo, kwape eiariaekonitau da, mam eswamai kwaŋin.”

¹² Kotema Daudi Uria atiar, “Kosalak ne lolo da, katwari jo moi.” Kwaŋin kiboi Uria koYerusalem apaaran ŋin ka apaaran nace da.

¹³ Kenyarau Daudi ŋes, konyam komat kakonyeneke; kitemer ŋes; koloma eboŋ aper aperitike nepepe kikejaanakinak luka ejakaitike, konye mam abu kolot togoke.

¹⁴ Kosodi kanen tupuruc kiwadik Daudi ebalua mama ejai Yoab, kijuka kakan naka Uria.

¹⁵ Kiwadikate ŋes toma obalua ebe, “Kibwaikis Uria kiŋaren neededeniar ejie, kosodete yesi ajalakin ŋes, tetere inomio, kotwana.”

¹⁶Kosodi kanen, kirere Yoab ere, kibwaik ŋesi Uria aibois naajeni ŋesi ebe ajaas ituŋa luatitiŋ.

¹⁷Kolomut ituŋa lukore, kojioto kaYoab: kibiroros ituŋa ice luka ikejaanakinak luka Daudi; kotwana da Uria Ekitit.

¹⁸Kosodi Yoab aijukar alimokin Daudi akiro kere nuka ejie;

¹⁹Kicor ekiyakia ebe, “Kidau ijo alimokin ekabaka akiro kere nuka ejie.

²⁰Arai enyunyura ekabaka, etemari ŋesi jo atiar, ‘Kanukinyo ilosioto yesi eiduny ka ere aitiji? Mam ipotu kojenut ebe epedorete kesi aigum yes ejaas arwatat?

²¹ Iŋai bo enomi Abimelek okoku loka Yerubeset? Mam aberu abu kocakak ŋes atapen karwatat tetere etwanikini Tebes? Kanukinyo ilosioto yesi eiduny karwatat?’ Ŋes konyet itemaria ebe, ‘Atwana da Uria Ekitit ekejaanakinanikon.’ ”

²²Kolot do ekiyakia, kobu kolimok Daudi kere nuejukaritor Yoab ŋes.

²³Kotema ekiyakia Daudi atiar, “Kitelekasi ituŋa sio, kolomakis sio kokiŋa ais, kajioto isio kakes kiton alomaret naka erute.

²⁴Kogumata ikagumak ikonikejaanakinak ejaas arwatat; kotwakata ice kokejaanakinak luka ekabaka, kotwana da Uria Ekitit ekonikejaanakinan.”

²⁵Kosodi Daudi atemar ekiyakia atiar, “Ilimokini do Yoab kwanata ebe, ‘Kinyek akirot ŋin aitakadikin jo, naarai ejwenyari ekileŋ yen ka ii da: kitogogoŋ ekonijie asurokin ere, kotiyaik da’: kisidik ijo ŋes.”

²⁶Kepupu aberu naka Uria ebe atwana Uria okilenike, kokuudian okilenike.

²⁷ Kedaun asuban, kijuka Daudi koyaŋa ŋes togoke, koraun akeberu, kourik ŋes ikoku yenisapat. Konye kitakadik EJAKAIT akirot naeswamai Daudi.