Read Ebaibuli 1961 2 Samuel 13 Bible Online

2 Samuel 13 - Ebaibuli 1961 bible

2 Samuel 13

¹ Kosodi kanen, kokau kaŋun, ajai Abisalom okoku loka Daudi inacike naetemelel, ekekiror Tamar; komina Aminon okoku loka Daudi ŋes.

²Kokadak Aminon kwaŋin abu kodekakin kanuka inacike Tamar; naarai arai ŋesi abekot; kotionik Aminon aiswamakin ŋes akirot.

³ Konye ajai Aminon epaperoke, ekekiror Yonadab, okoku loka Simea onace loka Daudi: kopiriana Yonadab noi.

⁴ Kotema ŋes atiar, “Wu okoku loka ekabaka, kanukinyo isenyitor ijo ŋinipaaran? Mam jo ilimokini eoŋ?” Kotema Aminon ŋes atiar, “Amina eoŋ Tamar, inaci naka onaceka Abisalom.”

⁵Kotema Yonadab ŋes atiar, “Koper kaperitikon, kijoseik bala ideka: kebu papakon aanyun jo kotema ŋes atiar, ‘Keŋaiŋait, kisiik inacika Tamar abunore, kainak eoŋ atap kanyam, kitemok inyamat kakonyeneka, tetere aanyuni, kanyam kakanike.’ ”

⁶ Koper do Aminon kijoseik bala edek: kebu ekabaka aanyun ŋes, kotema Aminon ekabaka atiar, “Keŋaiŋait, kisiik Tamar inacika abunore, aipoikin eoŋ imugatin iarei kakonyeneka, tetere anyami kakanike.”

⁷Kosodi Daudi aijukar ore neejai Tamar ebe, “Kolot togo loka onacekon Aminon, kipoik ŋes inyamat.”

⁸Kwaŋin kolot Tamar togo loka onaceke Aminon; koper ŋesi, Kotem aluŋuren kinyon, kiswama imugatin kakonyeneke, kope imugatin.

⁹ Kolem aiwowas kobukok kes akonyeneke; konye koŋer ŋesi ainyam. Kotema Aminon atiar, “Kolomasi ituŋa kere kiŋa.” Koloma ŋinituŋanan kaneejai.

¹⁰Kotema Aminon Tamar atiar, “Koyau inyamat agola, tetere anyami kakanikon.” Koyaŋa Tamar imugatin luabu ŋesi kopeite, koyau kes agola neajai Aminon onaceke.

¹¹ Naesukunyunia kes mama ejai ainyam, kikam ŋes, kotema atiar, “Bia kaperoto keoŋ, inacika.”

¹² Koboŋok ŋesi ebe, “Mam, onaceka, sirikiitinaik eoŋ; naarai mam akirot ŋin ibus aswam koIsirael: sirikiswama nuka abaŋaanut ŋun.

¹³ Eoŋ da, aibo ayaŋaari ileicika? Ijo da, iraun kwape ediopet kalubaniok koIsirael. Aso, keŋaiŋait, kilip ekabaka; naarai mam ŋes eneri aikor eoŋ mamakon.”

¹⁴ Konye koŋer ŋesi apupun ekeporoto: konye kanuagogonor, kitiŋaik ŋes, kiteper ŋes.

¹⁵Kosodi Aminon aila ŋes kaila kanaepol noi; naarai aila naalait ŋesi kodeparite amin naabu komina ŋes, Kotema Aminon ŋes atiar, “Konyou, kolot.”

¹⁶Kotema ŋin ŋes ebe, “Mere kwaŋin, naarai aronis na naepol aireŋear eoŋ erono noi adeparit ŋin naibu kiswamak eoŋ.” Konye koŋer apupun ŋes.

¹⁷Kosodi aiworoun ekekejaanakinan loejaanakini ŋes, kotema atiar, “Kitoloma aberu na kaneajai, koenik ekek kokauke.”

¹⁸ Anapit ŋin anapito naka ejese loegelegela: naarai atapitos adwe nuka ekabaka nuaraas abekon anapit inapen luka epone kaŋol. Kosodi ekekejaanakinan aitolomun ŋes kiŋa, koenik ekek kokauke.

¹⁹ Kipurak Tamar ekurwon akouke, kocilicil akenapito naka ejese kaloegelegela naanapit ŋesi: kibwok akanike, kolot, kiluluei elosi.

²⁰Kobala Abisalom onaceke ŋes atiar, “Ajai Aminon onacekon kajo? Konye do kililiŋ inacika: ŋes onacekon; sirikibwaik akirot na otau.” Kosalak Tamar esilikinit kotogo loka onaceke Abisalom.

²¹Konye nakepupu ekabaka Daudi akiro ŋun kere, konyunyurikin noi.

²² Mam Abisalom abu kiner nuejok karaida nueroko mama ejai Aminon: naarai alait Abisalom Aminon, naarai abu kitiŋaik inacike Tamar.

²³ Kosodi kanen ketuboros ikar iarei, ajaas Abisalom ikatubok ajul nuka amerekekin koBaal-kasor, loedunyas ka Epuraim: konyarau Abisalom odwe kere luka ekabaka.

²⁴Kobu Abisalom mama ejai ekabaka, kotema atiar, “Koany, ejaas ekejaanakinanikon ikarubok ajul nuka amerekekin; keŋaiŋait, kouparos ekabaka kikejaanakinakake ka ekejaanakinanikon.”

²⁵Kotema ekabaka Abisalom atiar, “Mam, okokuka, mam kilosi kere, kenyeis alaŋirikin jo.” Kimaima noi: konye koŋer alosit, konye kilipak ŋes arereŋ.

²⁶Kosodi Abisalom atemar atiar, “Keŋaiŋait, arai mam, kisiik onaceka Aminon alosit kasio.” Kotema ekabaka ŋes atiar, “Kanukinyo elosio ŋesi kajo?”

²⁷Konye kimaima Abisalom noi, kisiik Aminon ka odwe kere luka ekabaka alosit kaŋes.

²⁸ Kicorak Abisalom ikekejaanakinak ebe, “Aso kocoito naelakaror etau loka Aminon kanuka ebino; ido nakalimokinia yes ebe, ‘Kinomata Aminon,’ koara ŋes, sirikikuriakaros.”

²⁹Kiswamakis ikejaanakinak luka Abisalom Aminon kwape kicorakinia Abisalom. Kosodete odwe kere luka ekabaka anyoun, kibwanen ŋolituŋanan enyubuke, kokerata.

³⁰Kosodi kanen, napelosete, kobu eemut mama ejai Daudi ebe, “Aar Abisalom odwe kere luka ekabaka, mam ediopet kakesi ideuna.”

³¹ Kosodi ekabaka anyoun, kocilicil akenapito koper kokwap; kobwaata ikekejaanakinak kere kocilieilito inapenekec.

³²Koboŋok Yonadab, okoku loka Simea onace loka Daudi ebe, “Kinyek ejakaitika aomit ebe aarata ikatumunak kere odwe luka ekabaka; naarai Aminon bon etwanit; naarai apeleikinit Abisalom ŋin ameun kapaaran kaya naetinaikinia ŋesi inacike Tamar.

³³ Aso do kinyek ejakaitika ekabaka aibwaikin akirot ŋin otauke, aomit ebe atwakata odwe kere luka ekabaka: naarai Aminon bon etwanit.”

³⁴Konye koker Abisalom. Abu ekatumunan loabeit aidar kiteluo akekonyen kosesen, ido koany, eponito ituŋa luipu korot lokosiep loka eukot kokauke.

³⁵Kotema Yonadab ekabaka atiar, “Koany, eponito odwe luka ekabaka: kwape abalar ekejaanakinanikon, ikote nepenen.”

³⁶Kosodi kanen, kedau ŋesi einer, koany, eponito odwe luka ekabaka, kodelosi, komonyata: komony ekabaka da noi ka ikekejaanakinak kere.

³⁷ Konye koker Abisalom, kolot mama ejai Talumai okoku loka Amikur, ekabaka loka Gesur, Kitururwenenei Daudi kanuka okokuke ŋinipaaran.

³⁸ Koker Abisalom, kolot Gesur, kiboi kanen ikar iuni.

³⁹ Kimuite etau loka ekabaka Daudi alosit mama ejai Abisalom: naarai epudunio kanuka Aminon, naarai atwana.