Read Ebaibuli 1961 2 Samuel 14 Bible Online

2 Samuel 14 - Ebaibuli 1961 bible

2 Samuel 14

¹Kojen Yoab okoku loka Seruia ebe imuit etau loka ekabaka Abisalom.

² Kijuka Yoab Tekoa, koomai kaŋina aberu naaeo, kotema ŋes atiar, “Keŋaiŋait, kijoseik bala irai naibworo, konap anapito naka aibworo, keŋaiŋait, sirikinyonyoik akinyet, konye koraun kwape aberu naedaunit apak naepol ibworo yenikatwan;

³ Koloma mama ejai ekabaka, kiner kaŋes kopone kalo.” Kolimok Yoab ŋes nuenera.

⁴ Nakinerar aberu naka Tekoa kekabaka, kibirokin kwap ebuburia, kisuded, kotema atiar, “Kiŋarakinai, wu ekabaka.”

⁵ Kotema ekabaka ŋes atiar, “Inyo bo itururwoo ijo?” Koboŋok ebe, “Abeit arai eoŋ apuserut, atwana okilenika.

⁶Ajaas akejaanakinanikon odwe iarei, kojioto kesi kais, komamei yenadieki kes, konye kinom ediopet loce, koar ŋes.

⁷ Ido koany, anyoiki ekek kere aluikin akejaanakinanikon, kobalas ebe, ‘Kijaik ŋol loenomi onaceke, tetere kiari ŋes kanuka aijar naka onaceke loaari ŋesi,’ komudiasi ekeruman da: kwaŋin kitudenoto atotoleteka naedeuna, komam ideikinete okilenika ekiror karaida yenedeuna kakwap.”

⁸Kotema ekabaka aberu atiar, “Kolot togokon, ecorakini eoŋ nukon.”

⁹ Kotema aberu naka Tekoa ekabaka atiar, “Ejakaitika, wu ekabaka, kabeikis eoŋ ka ekek loka papaka numam adolit: komameun ekabaka ka eicoloŋoke akirot.”

¹⁰Kotema ekabaka atiar, “Ŋol lokilimokini jo akirot kere, koyau ŋes mama ajai, komam bobo ŋes kitirori jo.”

¹¹ Kosodi ŋin atemar atiar, “Keŋaiŋait, kiitu ekabaka EJAKAIT Ekonideke, kinye ekenyaŋan aokot amudiar bobo, kinyeis amudiar okokuka.” Kotema atiar, “Kwape ejaria EJAKAIT, mam edouni kwap etimat ediopet loka okokukon.”

¹²Kosodi aberu atemar atiar, “Keŋaiŋait, kisiik akejaanakinanikon einer akirot mama ejai ejakaitika ekabaka.” Kotema atiar, “Kolim.”

¹³ Kotema aberu atiar, “Kanukinyo inerunia akirot ŋin aluikin ituŋa luka Edeke? Naarai kanuka einer akirot ŋin esubit ekabaka bala loegwaunit akirot, naarai mam ekabaka itobonunit ore lokeŋ loerenearitai.

¹⁴ Naarai kibusakinit atwanare, kisubit bala akipi nuebukoros kwap numam epedorete bobo atukonokin; mam Edeke da elemari aijar, konye eomoomoi eipone, kinyek ekakeran araun loerenearitai cut kamakeŋ.

¹⁵Aso do abu eoŋ einer akirot na mama ejai ekajakait ekabaka, naarai ketukurianata ituŋa eoŋ; abala akejaanakinanikon ebe, ‘Enera kwana kekabaka; motoko itodoli ekabaka nuelipit akejaanakinanike.

¹⁶Naarai epupuni ekabaka, ayuun akejaanakinanike kakan naka etuŋanan loekoto amudiar eoŋ ka okokuka anyoun kairumet naka Edeke.’

¹⁷ Kosodi akejaanakinanikon atemar atiar, ‘Keŋaiŋait, koraun akirot naka ejakaitika ekabaka naelakara’: naarai esubit ejakaitika ekabaka bala emalaika loka Edeke, apupun nuejok ka nueroko: kojai EJAKAIT Ekonideke kajo.”

¹⁸Kosodi ekabaka aboŋokin aberu ebe, “Keŋaiŋait sirikimunonik naakoto aiŋit jo.” Kotema aberu atiar, “Kiner ekajakait ekabaka.”

¹⁹Kotema ekabaka atiar, “Ejai akan naka Yoab kajo kakiro nu kere?” Koboŋok aberu atiar, “Kwape ejaria ekonitau, ejakaitika ekabaka, emamei yenepedori aibelokin teten arai kediany kaŋun kere nuener ejakaitika ekabaka: naarai ekejaanakinanikon Yoab ŋes abu kecorak eoŋ, abu ŋesi kalimok akiro ŋun kere nuener akejaanakinanikon:

²⁰ Abu Yoab ekejaanakinanikon kiswama akirot ŋin aijulakin akirot: eco ejakaitika, kwape ejaar acoa naka emalaika loka Edeke, aijen akiro kere nuejaas kakwap.”

²¹Kotema ekabaka Yoab atiar, “Koany, eswama eoŋ ŋun: aso kolot, kinyak esapat Abisalom.”

²²Kibirokin Yoab kwap ebuburia, kisuded, kilipak ekabaka arereŋ: kotema Yoab atiar, “Ejeni lolo ekejaanakinanikon ebe adum eoŋ asianut kakonyenekon, ekajakait, wu ekabaka, naarai etodol ekabaka nuelipit ekejaanakinanike.”

²³ Konyou Yoab kolot Gesur, koyau Abisalom Yerusalem.

²⁴ Kotema ekabaka atiar, “Kopaa ŋesi togoke, konye kinyek aanyun akonyeneka.” Kopaa Abisalom togoke, komam eanyunit akonyen nuka ekabaka.

²⁵ Amamei koIsirael yeneturitoi kwape Abisalom kanuka atemeleleke: ageun kotau loka akejeke kiton osiaduk loka akouke amamei ŋes akemer.

²⁶ Nakebarenio ŋesi akouke, (abu kobarenenei kanetakinet naka ŋolikaru: naarai alanirikinito ŋes itimake, ŋes abarenenio:) kitem alaŋiru naka itima luka akouke isekelin akwat aarei kwape ejaar emisani loka ekabaka.

²⁷ Aponi kourikinai Abisalom idwe iuni lusap ka ikoku idiopet yenipese, ekekiror Tamar: arai ŋin aberu naetemelel.

²⁸Kiboie Abisalom koYerusalem ikar iarei, mam abu koany akonyen nuka ekabaka.

²⁹Kosodi Abisalom anyaraun Yoab aijukar ŋes mama ejai ekabaka; konye koŋer abunore mama ejai: konyarau ŋes bobo nakiareit, konye koŋer Yoab abunore.

³⁰ Kanuka ŋun kotema ŋesi ikekejaanakinak atiar, “Koany, emanikor loka Yoab idunyas kalokan, ejaas ŋes kesairi kaŋina: koloto kicweikis kakim.” Kosodete ikejaanakinak luka Abisalom aicweikin emanikor kakim.

³¹Kosodi Yoab anyoun, kobu mama ejai Abisalom togoke, kotema ŋes atiar, “Kanukinyo eeweikiniata ikonikejaanakinak emanikorika kakim?”

³² Koboŋok Abisalom ebe, “Koany, abu kanyarau jo ebe, ‘Kobia, keyakia jo mama ejai ekabaka aiŋit ŋes ebe, “Kanukinyo abunio eoŋ koGesur? Tiejok kamakaŋ karai karina eoŋ ajai ŋina.” Aso do kisiikinai eoŋ kaany akonyen nuka ekabaka; arai ejaas numam adolit kotomakaŋ, kaar ŋesi eoŋ.’ ”

³³ Kobu Yoab mama ejai ekabaka, kolimok ŋes: kedau anyaraun Abisalom, kobu ŋesi mama ejai ekabaka kokukum kokwap kakonyen nuka ekabaka: konu ekabaka Abisalom.