Read Ebaibuli 1961 2 Samuel 17 Bible Online

2 Samuel 17 - Ebaibuli 1961 bible

2 Samuel 17

¹Bobo da kotema Akitopel Abisalom atiar, “Kisiikinai kaseu ituŋa ilukumin itomon kaluarei, anyouni eoŋ arukitori Daudi akuare na:

² Adolokini ŋes kepas, kitegito da akaninike, etukuriani ŋes: ekerete do ituŋa kere luejaas kaŋes; kenomi do ekabaka bon:

³ Enyakuni ituŋa kere mamakon: kwape ebonunia aberu ore mama ejai okilenike. Imoot ijo aijar naka ediopetuŋanan bon: inapakinos do ituŋa kere.”

⁴Kitojok noi Abisalom akirot ŋin, ka imakio kere luka Isirael.

⁵Kosodi Abisalom atemar atiar, “Konyarakinai cani Kusai Earikit, kapuputu nuenera ŋesi da.”

⁶Kebu Kusai mama ejai Abisalom, kotema Abisalom ŋes atiar, “Ener Akitopel kwaŋin: kiswamai kereka kwape eneria ŋesi? Arai mere kwaŋin, kiner ijo.”

⁷Kotema Kusai Abisalom atiar, “Akiro nuener Akitopel apak kana mam ejokuka.”

⁸ Bobo da kotema Kusai atiar, “Ijeni ijo papakon ka ituŋake, ebe eraas lukagogoŋok, enyunyurasi kotauonokec, kwape adubu naedemaritai ludidikike kais: erai papakon ekajiot, mam eperete kituŋa.

⁹Koany, eŋopit ŋesi kwape kwana kaipany, arai kaibois ace: kosodi kanen, naegeuniata ice kakesi aibiror, ŋin yenepupi ŋun etemari ebe, ‘Ejai earit otuŋa luetupito Abisalom.’

¹⁰Ŋol da loetitiŋ, loesubit etauke bala etau loka eŋatuny, ipirisiar piris; naarai ejeni Isirael kere ebe egogoŋ papakon, ka ŋul da luejaas kaŋes eraas ituŋa lukatitiniok.

¹¹ Konye eoŋ kabala jo ebe kotukokin Isirael kere mama ijai, anyoun koDan kiton Beerseba, kwape asine naejai kariri naka aŋolol kaipues: kolot ijo da elopet ojie.

¹²Kwaŋin kidolokini oni ŋes kaibois neetakanunia, kidoikini ŋes kwape edoioto akopyo kwap: mam kinyeini kaŋes ka ituŋa kere luejaas kaŋes karaida idiopet.

¹³Bobo da, arai keloma ore, ŋes konyet eyauniata Isirael kere aunoi ore ŋol, kiriari ŋes ocor, aitodol naemameunia alicait adiopet kaŋina.”

¹⁴ Kotema Abisalom ka ituŋa kere luka Isirael atiar, “Ainerun naka Kusai Earikit eteleka ainerun naka Akitopel.” Naarai etemoki EJAKAIT aitapalun ainerun naejok naka Akitopel, tetere eyauni EJAKAIT aronis mama ejai Abisalom.

¹⁵Kosodi Kusai atemar Sadok ka Abiatar isasedotin atiar, “Kotema Akitopel kwana kwana mama ejai Abisalom ka imakio luka Isirael: kasodi eoŋ da atemar kwana kwana.

¹⁶Aso do kijuka atipet, kolimokis Daudi ebe, ‘Sirikiper kakuare kana kaneedokarere amodiŋ, konye kotuboros cut; kinyek ekabaka ailikorio, ka ituŋa kere luejaas kaŋes.’ ”

¹⁷ Kiboioto Yonatan ka Akimaas En-rogel; kolosenenei akejaanakinan alimonokin kes; koloto kesi kolimokis ekabaka Daudi: naarai mam akotos ituŋa aanyun kes elomarete ore.

¹⁸ Konye koany esapat kes, kolimok Abisalom: kiwonyasi kesi kere iarei, kopotu Bakurim togo loka etuŋanan lokejai atan alaroke; kijesaros toma.

¹⁹ Kolem aberu arapetait kopesik da aituk naka atan, koloik akima nuieomom kujuke; mam akirot abu kojenun.

²⁰ Kopotu ikejaanakinak luka Abisalom mama ejai aberu togo; kotemasi atiar, “Alu bo Akimaas ka Yonatan?” Kotema aberu kes atiar, “Atuboros kaguurut naka akipi.” Kemoata kes, mam apotu kodumutu, koboŋosi Yerusalem.

²¹Kosodi kanen, kedaut alosit, kodokut kesi katan, koloto kolimokis ekabaka Daudi; kotemasi kesi Daudi atiar, “Konyoutu, kiwonyasi kotuboros kakipi: naarai eneru Akitopel kwana aluikin yes.”

²²Kosodi Daudi anyoun, ka ituŋa kere luajaas kaŋes, kotuboros koYorodan: kiwala akwap emamei ediopet kakesi loabu kokurwok atubor Yorodan.

²³ Keanyu Akitopel ebe mam ainerunike atupitai, kopetanak lupetan asigiriake, konyou, kolot obukec, oreke, kitemonok eketogo, komiedakin; kotwana, konukai kates naka papake.

²⁴ Kosodi Daudi abunore Makanaim. Kotubor Abisalom ko Yorodan, ŋes ka ituŋa kere luka Isirael.

²⁵Kodakak Abisalom Amasa ayait ajore aibois naka Yoab. Kerai Amasa okoku loka etuŋanan, ekekiror Itira loka Isirael, loalomari mama ejai Abigail akoku naka Nakas, inac naka Seruia totoke ka Yoab.

²⁶Kidukuroto Isirael ka Abisalom akwap naka Gilead.

²⁷ Kosodi kanen, kebu Daudi Makanaim, apotu Sobi okoku loka Nakas loka Raba loka idwe luka Amon, ka Makir okoku loka Amiel loka Lo-debar, ka Barisilai Egileadit loka Rogelim.

²⁸ Koyaut iitadan, ka abesenin, ka amoti nuka elupe, ka akima, ka esairi, ka akiria, ka imumwa luikaworitai, ka imare, ka epone ece loegelara loka alos, ka ekirididi loikaworitai.

²⁹ Ka esik, ka akinyet, ka amerekekin, ka ikamoŋon luka akile lucokito luka aituk, tetere enyamete Daudi ka ituŋa luajaas kaŋes, naarai abalas ebe, “Eriebi eteŋei ituŋa, ilworuna ejakit akur kamodiŋ.”