Read Ebaibuli 1961 2 Samuel 2 Bible Online

2 Samuel 2 - Ebaibuli 1961 bible

2 Samuel 2

¹ Kosodi kanen akaulo kaŋun, kiŋit Daudi EJAKAIT ebe, “Abwosi eoŋ mama ejai ediopet koreria luka Yuda?” Kotema EJAKAIT ŋes atiar, “Kobwot.” Kotema Daudi atiar, “Abwosi bo ai?” Kotema atiar, “Keburon.”

²Kwaŋin kobwot Daudi, ka akeŋor aarei da, Akinoam Ayesereelit, ka Abigail aberu kolo naka Nabal, Akaramelit.

³ Kitwobot Daudi ituŋa luajaas kaŋes, ŋinituŋanan ka ekaleke: kiboikinos oreria luka Keburon.

⁴ Kopotu ituŋa luka Yuda, kinyonyoikis Daudi akinyet araun ekabaka loka ekek loka Yuda kanen. Kolimokis Daudi ebe, “Ituŋa luka Yabes-gilead kes luanukete Saul.”

⁵ Kijuka Daudi ikiyakia mama ejaas ituŋa luka Yabes-gilead, kobala kes ebe, “Kisirereŋit yes EJAKAIT, naarai itodikis ejakaitikus, ŋes Saul, asianut na, inukata ŋes.

⁶ Kitodik kwana EJAKAIT yes asianut ka abeit: eoŋ da aropi yes asianut ŋin, naarai iswamata akirot ŋin.

⁷Aso do kogogoŋoto akaninikus, kotitiŋioto: naarai atwana Saul ekusijakait, bobo da abu ekek loka Yuda kenyonyoik eoŋ akinyet araun ekabakakec.”

⁸ Abu Abiner okoku loka Ner ekapolon loka ajore naka Saul koyaŋa Isboset okoku loka Saul, kitodoka ŋes Makanaim;

⁹Kituluo ŋes ekabaka loka Gilead, ka Iasurin, ka Yesereel, ka Epuraim, ka Benyamin, ka Isirael kere,

¹⁰(Kerai Is-boset okoku loka Saul loka ikar akaisaoŋon naageunia airum Isirael, kirumak ikar iarei.) Konye kotup ekek loka Yuda Daudi.

¹¹Apak naaraar Daudi ekabaka koKeburon irumit ekek loka Yuda emwaasi ikar ikanykaarei ka ilapio ikanykape.

¹² Koloma Abiner okoku loka Ner, ka ibulesin luka Is-boset okoku loka Saul, anyoun koMakanaim kolot Gibeon.

¹³ Koloma Yoab okoku loka Seruia ka ikejaanakinak luka Daudi, kiriamunos kakes eiduny katapar naka Gibeon; kiboikinos, lu epuai katapar, kwi da epuai katapar.

¹⁴ Kotema Abiner Yoab atiar, “Keŋaiŋait, konyout ikatumunak abolia kakonyenewok.” Kotema Yoab atiar, “Aso konyoutu.”

¹⁵Konyout kodokasi imaritai; itomon ka luarei kanuka Benyamin, ka Is-boset okoku loka Saul, ka itomon ka luarei luka ikejaanakinak luka Daudi.

¹⁶Kitiŋ ŋinituŋanan akou naka aupake, kicum kekilenike osiep loka aupake; kibiroros nepepe: kanuka ŋun ŋes amaikinere aibois ŋin Kelakat-kasurim, [1] naejai Gibeon.

¹⁷ Kosisior ejie kapaaran kaŋin; kipikoroi Abiner ka ituŋa luka Isirael kakonyen nuka ikejaanakinak luka Daudi.

¹⁸ Ajaas kanen odwe iuni luka Seruia, Yoab ka Abisai, ka Asakel: ketirono Asakel akerit kwape kamori.

¹⁹Korukitor Asakel Abiner; mam abu kibelokin teten arai kediany kotoma alositeke naatupitor Abiner.

²⁰Kosodi Abiner anoliar kauke, kotema atiar, “Ŋes ijo, Asakel?” Koboŋok ebe, “Eoŋ ca lo.”

²¹ Kotema Abiner ŋes atiar, “Kibelokin ijo teten arai kediany, kikam ediopet kokatumunak, kolem lujiisike.” Konye koŋer Asakel aibelokin katupit ŋes.

²²Kotema bobo Abiner Asakel ebe, “Kibelokin kinyek atupit eoŋ: kanukinyo kebirokinia jo kwap? Ekonakini ai aseseni onacekon Yoab?”

²³ Konye koŋer aibelokin: tape Abiner icumi ŋes akoik ekaukau kakwara, kipelun akwara kokauke; kibirokin nen, kotwanik aibois ŋin: kosodi kanen, luadolunete kere aibois naebirokin Asakel kotwanite, kobwout.

²⁴ Konye apotu Yoab ka Abisai korukioto Abiner: koloma akoloŋ nakedolioto kesi oukot loka Ama, loitei Gia korot loka amodiŋ naka Gibeon.

²⁵Kotukonokinos idwe luka Benyamin neajai Abiner, koraut erioŋet ediopet, kobwaata kokuju keukot.

²⁶ Kosodi Abiner aiworo Yoab ebe, “Edanyi kereka ekileŋ ikar kere? Mam jo ijeni ebe awasiake ŋes adwaris? Aso do kitodoli ai eriŋa icorakinia ituŋa aboŋor katupakin iinacanakec?”

²⁷ Kotema Yoab atiar, “Kwape ejaria Edeke, kemam jo einer, abeit tikeloto ituŋa tupuruc, komam ŋinituŋanan atupit onaceke.”

²⁸Kokut Yoab arupepe, kobwoutu ituŋa kere, komam bobo erukitotor Isirael, karaida aitiji kes bobo.

²⁹ Kotuboros Abiner ka ituŋake Araba, koloto akuare kia; kodokasi Yorodan, kotuboros Bituron kere, kodoloto Makanaim.

³⁰Koboŋo Yoab katupit Abiner: kedau atukonokin ituŋa kere, komameut ituŋa itomon ka lukanykaoŋon ka Asakel kokejaanakinak luka Daudi.

³¹Konye apotu ikejaanakinak luka Daudi kodanyata luka Benyamin, ka ituŋa luka Abiner, tape etwakete ituŋa akwat auni ka akaisakanykape.

³² Kodakasi Asakal, kidaikis ŋes ates naka papake, naajai Bet-lekem, Kolot Yoab ka ituŋake akuare kia, kocila kide kojaas kesi Keburon.