Read Ebaibuli 1961 2 Samuel 20 Bible Online

2 Samuel 20 - Ebaibuli 1961 bible

2 Samuel 20

¹ Kojaun kanen etuŋanan loka Belial, ekekiror Seba, okoku loka Bikiri, Ebenyamit: kokut ŋesi arupepe, kotema atiar, “Emamei oni akorakinet kama kaDaudi, ido emamei oni airumet kotoma okoku loka Yese: koboŋo ŋinituŋanan owemake, wu Isirael.”

² Konyout ituŋa luka Isirael kere katupit Daudi, kotupakis Seba okoku loka Bikiri: konye kiketakinos ituŋa luka Yuda ekabakakec, anyoun koYorodan kiton Yerusalem.

³ Kobu Daudi togoke Yerusalem; koyaŋa ekabaka aŋor atomon abusianake, nuetasalit ŋesi aidar etogo, kibwaik kes togo loidarere, kokoranak kes inyamat, konye mam abu koloma mamakec. Kogolokinoi kes kiton apaaran naka atwanarekec, iboiete koipuscrune.

⁴Kosodi ekabaka atemar Amasa atiar, “Konyarakinai ituŋa luka Yuda kotoma apaarasia auni, ijo da kojaun ne.”

⁵Aso kolot Amasa anyaraun ituŋa luka Yuda: konye kitumor adepar apak naaseikinitai ŋes.

⁶ Kotema Daudi Abisai atiar, “Kwana kiswamakini Seba okoku loka Bikiri oni aronis adepar naeswamakini Abisalom oni: koyaŋa ijo ikejaanakinak luka ejakaitikon korukitor ŋes, kinyek ŋesi adumun ireria luebwaitai, aiku kamawok.”

⁷ Kolomasi ituŋa luka Yoab ka Ikeretin ka Ipeletin ka ituŋa kere lukirigin atupit ŋes; kolomasi koYerusalem, arukoria Seba okoku loka Bikiri.

⁸Kedoloto kesi amoru naapol naajai Gibeon, kobu Amasa airiamakin kakes. Kiridak Yoab inapen luka ejie luanapit ŋesi, kejai arokoba naaenikinitai aŋabetekeŋ kekileŋ lokejai toma akuraruke; napelosi ŋesi kodoi.

⁹ Kotema Yoab Amasa atiar, “Ejok, onaceka?” Kitiŋ Yoab Amasa kopenekike kakekan nakoteten ainu ŋes.

¹⁰Konye mam Amasa abu kopodo ekileŋ lokejai akan naka Yoab: kicumia ŋes akoik, kobukoros amoetekake kwap, mam abu kirucak; kotwana. Apotu Yoab ka Abisai onaceke korukioto Seba okoku loka Bikiri.

¹¹Kobwo ediopet kokatumunak luka Yoab koapias kaŋes, kotema atiar, “Ŋol loekoto Yoab, ka ŋol da loerai loka Daudi, kotupa Yoab.”

¹²Koper Amasa kimodumodun kaokotoke kokidiŋ orot. Keanyu etuŋanan ebe abwout ituŋa kere, kodaka Amasa alemar korot aibwaikin ais, kiswapak anapito, keanyu ŋesi ebe apotu kere luetorito nen kobwout.

¹³Kelemari ŋes korot, kiyatakis Ituŋa kere atupar Yoab, arukitor Seba okoku loka Bikiri.

¹⁴ Kitor ŋesi atekerin kere nuka Isirael kiton Abel, ka Bet-maaka, ka Iberin kere: kotukonokinos kesi da kibwapito ŋes.

¹⁵ Kopotu kirigautu ŋes ka Abel loka Bet-maaka, kitutuoto etut eiduny ka ere koriakas karwatat: apotu ituŋa kere lukejaas kaYoab kitakitakete arwatat atiyaikin.

¹⁶Kosodi aberu nakacoa aiworo kore ebe, “Kopuputu, kopuputu; keŋaiŋait, kolimokis Yoab ebe, ‘Kikuny, kenerakinos kajo.’ ”

¹⁷Kikunyak ŋes; kotema aberu atiar, “Ijo ŋes Yoab?” Koboŋok ebe, “Eoŋ lo.” Kosodi ŋin atemar ŋes atiar, “Kopup akiro nuka akejaanakinanikon.” Koboŋok ŋesi ebe, “Apupi.”

¹⁸Kinera ŋesi ebe, “Etapit apeŋo atemar ebe, ‘Abeit iŋisete kesi akiro ka Abel’: kwaŋin kitananete kesi akiro.

¹⁹ Ajai eoŋ owai kaŋul luinapakina ka lumunon koIsirael: imoot ijo amudiar ere loerai toto koIsirael: kanukinyo ikotor ijo ailikor airumet naka EJAKAIT?”

²⁰Koboŋok Yoab ebe, “Madi akuj, madi akuj, eoŋ ailikor arai amudiar.

²¹Mam akiro ikote nen: abu etuŋanan loka akwap nakiukon naka Epuraim, ekekiror Seba okoku loka Bikiri, kikeu akekan asurokin ekabaka, ŋes Daudi: kijaik ŋes bon, eoŋ da anyouni kore.” Kotema aberu Yoab atiar, “Koany, eeakunio nat akekou mama ijai karwatat.”

²² Kosodi aberu alosit kacoake mama ejaas ituŋa kere. Kojepasi akou naka Seba okoku loka Bikiri, kocakakis Yoab. Kokut ŋesi arupepe, kisiarakinos anyoun kore, ŋinituŋanan owemake. Koboŋo Yoab Yerusalem mama ejai ekabaka.

²³ Koyaite Yoab ajore kere naka Isirael: koyaite Benaia okoku loka Yekoiada Ikeretin ka Ipeletin:

²⁴ Kitelem Adoram esolo; korai Yekosapat okoku loka Akilud ekesiitonokinan.

²⁵ Korai Sebua ekalani; koraas Sadok ka Abiatar isasedotin:

²⁶ Korai da ha Eyairit esasedoti kama ka Daudi.