Read Ebaibuli 1961 2 Samuel 4 Bible Online

2 Samuel 4 - Ebaibuli 1961 bible

2 Samuel 4

¹Kepupu Is-boset okoku loka Saul ebe atwaniki Abiner Keburon, kokalanyakata akaninike, kiyaloŋoŋoto luka Isirael kere.

² Ajaas Is-boset okoku loka Saul ituŋa iarei luapolokinito irioŋeta: ekiror loka ediopet Baana, ekiror loka ece Rekab, odwe luka Rimon Ebeerotit, loka idwe luka Benyamin: (naarai imarakinitai Beerot da araun loka Benyamin:

³ Kokerata Ibeerotin Gitaim, apotu kiboiororoto kanen kiton lolo.)

⁴ Kejai Yonatan okoku loka Saul okoku loanwalito akejeke kere. Kerai loka ikar ikany kedolut akiro nuka Saul ka Yonatan koYesereel, kodak akasaanike ŋes kokerearia: kosodi kanen, kisunyak ŋin akerit, kibiror ikoku, koraun eŋwalas, Ekekiror Mepiboset.

⁵Koloto odwe luka Rimon Ebeerotit, Rekab ka Baana, kodolut togo loka Is-boset kapak naamwaniar akoloŋ, kapak naeyenunia ŋesi paaran.

⁶ Apiesi aberu naedari ekek loka etogo akima, kiluranar, kojotoi; koceda iinacan Rekab ka Baana kaiyeiyea kolomasi togo.

⁷ Kelomasi togo koperi Is-boset koitadake kagolake naperot, kinomata ŋes, koarata, kojepasi akouke, koyaŋaasi akouke, kitoroto orot loka Araba akuare kere.

⁸ Koyaut akou naka Is-boset mama ejai Daudi Keburon, kotemasi ekabaka atiar, “Koany akou naka Is-boset okoku loka Saul lokasurupikon, loakoto aijarakon; enyanaki EJAKAIT ekajakait ekabaka kanuka Saul ka aurike lolo.”

⁹ Koboŋok Daudi Rekab ka Baana onaceke, odwe luka Rimon Ebeerorit, ebe, “Kwape ejaria EJAKAIT, loalakuni aijaraka kocan kere.

¹⁰ Nakalimokinia kolo etuŋanan eoŋ ebe, ‘Koany, atwana Saul,’ koomite ebe kainunit akiro nukajokak, kekam ŋes, kaara ŋes koSikilag, ŋes eropitike loabu kainak ŋes kanuka akiroke.

¹¹ Nakeariata ituŋa lukarokok etuŋanan loedolit kotogoke koitadake, mam eyatakini noi aitepesen aokotoke kakanikus, alemari yes kakwap?”

¹² Kicorak Daudi ikatumunakake, koarata kes, kotubonosi akaninikec, ka akejenekec, kikajakis kes eiduny katapar koKeburon. Konye koyaŋaasi akou naka Is-boset, kidaikis ates naka Abiner Keburon.