Read Ebaibuli 1961 2 Samuel 5 Bible Online

2 Samuel 5 - Ebaibuli 1961 bible

2 Samuel 5

¹ Kosodete atekerin kere nuka Isirael aponare mama ejai Daudi Keburon, kotemasi atiar, “Koany, kirai isio akoitikon ka akiriŋikon.

² Kapakio nuatuboros nakeraar Saul ekabakawok, ibu ijo kitoloma kitolom da Isirael: abu EJAKAIT kotema jo atiar, ‘Itanyamenenei ijo ikatuŋa Isirael, iraun ijo ekapolon koIsirael.’ ”

³ Kwaŋin kopotu imakio kere luka Isirael mama ejai ekabaka Keburon; kitutuk ekabaka Daudi kakes koKeburon kakonyen nuka EJAKAIT: kinyonyoikis Daudi akinyet araun ekabaka koIsirael.

⁴ Kerai Daudi loka ikar akaisauni naageunia airum, kirumak ikar akaisaoŋon.

⁵Kirum Yuda koKeburon ikar ikanykaarei ka ilapio ikanykape: kirum Isirael kere ka Yuda koYerusalem ikar akaisauni ka luuni.

⁶ Kolot ekabaka ka ituŋake Yerusalem aitiji Iyebusin, ikulepek akwap: luapotu kolimokis Daudi ebe, “Mam ilomuni ne dimarai kilema ijo imudukiok ka iŋwalasik.” Koomito ebe, “Mam Daudi epedori alomun ne,”

⁷Konye kirum Daudi ere loabwaitai kagogoŋ loka Sion; ŋes ere loka Daudi.

⁸ Kotema Daudi kapaaran kaŋin ebe, “Ŋolituŋanan loedanyi Iyebusin, kodoka neeleleete akip, kodany iŋwalasik ka imudukiok lualait etau loka Daudi.” Ŋes etemariata ebe, “Mam imudukiok ka iŋwalasik epedorete alomar togo.”

⁹ Kiboikin Daudi ore loebwaitai kagogoŋ, komaik ŋes ere loka Daudi. Koduk Daudi airimor anyoun koMilo kotoma da.

¹⁰Kiyatanakin Daudi apoloor; naarai ajai EJAKAIT, Edeke loka ajoresio, kaŋes.

¹¹ Kijuka Kiram ekabaka loka Turo ikiyakia mama ejai Daudi, ka ikito luka eres, ka ikekeok, ka ikadukok kamor; kodukokis Daudi etogo.

¹² Kojen Daudi ebe abu EJAKAIT kiticat ŋes araun ekabaka koIsirael, abu da kitopoloo ajakanutuke kanuka iketuŋa Isirael.

¹³ Komany Daudi aeebusian ka aŋor ace koYerusalem, kedau anyoun koKeburon: kourikinai Daudi icedwe lusap ka lupesur.

¹⁴Lu kes ikiroria luka ŋul kaluaponi kourikinai ŋes koYerusalem; Samua, ka Sobab, ka Natan, ka Solomon.

¹⁵Ka Ibar, ka Elisua, ka Nepeg, ka Yapia;

¹⁶ka Elisama ka Eliada, ka Elipelet.

¹⁷ Kepuput Ipilisitian ebe enyonyoikis Daudi akinyet araun ekabaka koIsirael, koloto Ipilisitian kere amoot Daudi; kopup Daudi, kijesar ore loabwaitai.

¹⁸ Apotu Ipilisitian kisiarakinos kaditot naka Repaim.

¹⁹ Kiŋit Daudi EJAKAIT ebe, “Alosi kereka eoŋ aitiji Ipilisitian? Kijaikini ijo kes akanika?” Kotema EJAKAIT Daudi atiar, “Kolot, naarai abeit ejaikini Ipilisitian akanikon.”

²⁰ Kobu Daudi Baal-perasim, kodany Daudi kes kanen; kotema atiar, “Acil EJAKAIT lukasurupoka kakonyeneka, kwape eciliata akip.” Ŋes amaikinere aibois ŋin Baal-perasim.

²¹Kinyeis aputosiakec kanen, koyaŋaasi Daudi ka ituŋake.

²²Kopotu bobo Ipilisitian, kisiarakinos aditot naka Repaim.

²³Nakiŋisia Daudi EJAKAIT, kotema atiar, “Mam ilosi: kirimo kaukec, kobunoki kes kaneejaas ikito luka baka.

²⁴Ejaun kwanata ebe, Kipup ijo eporoto loka lueraeete alosit kokuju kikito luka baka, kosodi konyet anyoun: naarai kapak kaŋipe kaŋin ŋes alomaria EJAKAIT kakonyenekon aidany ajore naka Ipilisitian.”

²⁵Kiswama Daudi kwaŋin, kwape ecorakinia EJAKAIT; kodany Ipilisitian anyoun koGeba kiton neidolio Geser.