Read Ebaibuli 1961 1 Ikabakan 19 Bible Online

1 Ikabakan 19 - Ebaibuli 1961 bible

1 Ikabakan 19

¹ Kolimok Akab Yesebel kere nueswama Eliya, ido kwape aaria inabin kekileŋ.

² Kosodi Yesebel aijukar ekiyakia neejai Eliya ebe, “Keswamakis idekesio eoŋ kwaŋin, ka adepar da, arai mam moi esawa kwape kalo eoŋ etusubit akoniijar bala aijar naka ediopet kakesi.”

³Kepupu ŋun, konyou, kolot kanuka akeijar, kobu Beer-seba, loerai loka Yuda, kitasal ekekejaanakinan kaŋina.

⁴ Konye ŋes elopet kolot alosit naka adiopepaaran amodiŋ, kobu, kiboikin otolim loka erotem: kilipakin bon atwanare; kobala ebe, “Edolit; wu EJAKAIT, kolema akaijar; naarai mam eoŋ ajokuna adepar lukapapaaka.”

⁵ Koper kojotoor kotolim loka erotem; ido koany, kotiro emalaika ŋes, kotema ŋes atiar, “Konyou, konyam.”

⁶Koŋolia, ido koany, kejai emugati loapeitoi katotol eiduny kakouke, ka atany naka akipi, Konyam komat, kopere bobo.

⁷Kobu emalaika loka EJAKAIT irwan nakiareit, kotiro ŋes, kotema atiar, “Konyou, konyam, naarai elwana noi akonilosit.”

⁸ Konyou konyam komat, kolot kagogoŋ naka inyamat kaŋul apaarasia akaisaoŋon ka akuaresia akaisaoŋon kiton Koreb, moru loka Edeke.

⁹ Kodol abua, kopere nen; ido koany, kobu akirot naka EJAKAIT neejai ŋesi, kotema ŋes atiar, “Eliya, inyo bo iswamai ijo kane?”

¹⁰ Kotema atiar, “Kerumit noi ekokote kanuka EJAKAIT, Edeke loka ajoresio; naarai ajalata idwe luka Isirael aitutuketekon, atiyaikis itemwanakon, aarata inabinokon kekileŋ: eoŋ, eoŋ bon asal; emoete da akaijar amudiar.”

¹¹ Kotema atiar, “Kolom, kobwo komoru loka EJAKAIT.” Ido koany, kotubor EJAKAIT, kodi ekwam loepol loegogoŋ iroŋan, kobwaŋabwaŋ atiiban kakonyen nuka EJAKAIT: konye komamei EJAKAIT kokwam: akaulo kekwam amaran naka akwap; konye komamei EJAKAIT kamaran naka akwap.

¹² Akaulo kamaran naka akwap akim; konye komamei EJAKAIT kakim: akaulo naka akim eporoto loedit loeyamakina.

¹³ Kosodi, kiira Eliya, kimuko akekou kegoeke, koloma, kobwo neelomarere abua, Ido koany, kobu eporoto mama ejai ŋesi ebe, “Eliya, inyo bo iswamai ijo kane?”

¹⁴Kotema atiar, “Kerumit noi ekokote kanuka EJAKAIT, Edeke loka ajoresio; naarai ajalata idwe luka Isirael aitutuketekon, atiyaikis itemwanakon, aarata inabinokon kekileŋ; eoŋ, eoŋ bon asal; emoete da akaijar amudiar.”

¹⁵ Kotema EJAKAIT ŋes atiar, “Kolot, koboŋo korotokon kiton amodiŋ naka Damasiko: kidol, kinyonyoik Kasael akinyet araun ekabaka loka Suria:

¹⁶ Kinyonyoik da Yeku okoku loka Nimisi akinyet araun ekabaka loka Isirael: kinyoinyoik Elisa okoku loka Sapat loka Abel-mekola akinyet araun enabi aiboisikon.

¹⁷ Kosodi kanen, ŋol loekui ekileŋ loka Kasael eari Yeku: ŋol da loekui ekileŋ loka Yeku eari Elisa.

¹⁸ Konye edeuni eoŋ ilukumin ikanykaarei koIsirael, akuŋin kere numam ekukonokina Baal, ka ŋiniituk kere namam enuit ŋes.”

¹⁹Aso abu ŋesi konyou kanen, kodum Elisa okoku loka Sapat, ekoriei, kejaas ajookon atomon ka nuarei kiŋarenike, kejai ŋesi ka nakitomonet kaarei: kitor Eliya neejai ŋesi, kocakak ŋes ekegoe.

²⁰Kinyek imoŋin, koker atupit Eliya, kotema atiar, “Keŋaiŋait, kisiikinai kanu papaka ka totoka, kasodi konyet eoŋ atupun jo.” Kotema ŋes atiar, “Koboŋo; naarai inyo bo keswamak eoŋ jo?”

²¹ Koboŋo katupit ŋes, koyaŋa imoŋin luka ajookot, koar kes, kipo akecekiriŋ kakito nuka imoŋin, koinak ituŋa, konyamata, Kosodi ŋesi anyoun, kotupa Eliya, kijaanak ŋes.