Read Ebaibuli 1961 1 Ikabakan 21 Bible Online

1 Ikabakan 21 - Ebaibuli 1961 bible

1 Ikabakan 21

¹ Kosodi kanen kokau kaŋun, kejai Nabos Eyesereelit emanikor loka emusabibu lokejai Yesereel, keapia ketogo loti loka Akab ekabaka loka Samaria.

² Kosodi Akab kobala Nabos ebe, “Ae emanikorikon loka emusabibu koraun lokaŋ araun emanikor loka edia, naarai eapie kekatogo; kainakini eoŋ jo emanikor ece loka emusabibu loitelekarit ajokis: arai bo itojokit, kainakini apesan kwape ejaar eketiai.”

³ Kobala Nabos Akab ebe, “Madi EJAKAIT, eoŋ ainakin jo airumet naka lukapapaaka.”

⁴Kobu Akab togoke ekadakinit ido konyunyura kanuka akirot nakelimokini Nabos Eyesereelit ŋes: naarai enera atiar, “Mam kainakini jo airumet naka lukapapaaka.” Korior kaperisike, kimwaŋa akekonyen, koŋer ainyam.

⁵Konye kobu aberuke Yesebel mama ejai, kobala ŋes ebe, “Inyo bo etakadiki ekonitau kwaŋin, tape iŋeri ainyam?”

⁶Kobala ŋes ebe, “Naarai ener kaNabos Eyesereelit, kalimok ŋes ebe, ‘Ae ekonimanikor loka emusabibu kagwel kapesan; arai bo isiyalamikinit kesiec kecemanikor’: kaboŋok ebe, ‘Mam kainakini ekamanikor loka emusabibu.’ ”

⁷ Kobala ŋes aberuke Yesebel ebe, “Mere kereka jo iyait ajakanut naka Isirael? Konyou, konyam inyamat, kolakar ekonitau: kainakini eoŋ jo emanikor loka emusabibu loka Nabos Eyesereelit.”

⁸Kwaŋin kiwadik ŋes ibaluan kokiror loka Akab, kipucak kes akeipucet, kijuka ibaluan mama ejaas imakio ka ikapolok lukejaas oreke, lukiboiete kaNabos.

⁹Kiwadik obaluan kinera atiar, “Kolimos ailuŋ, kibwaikis Nabos akonyen nuka ituŋa:

¹⁰ Kisibwaata ituŋa iarei, idwe luka Belial kakonyeneke, kitorona ŋes, kobalas ebe, ‘Ibu koŋerok Edeke ka ekabaka da.’ Koyaŋaasi konyet, kibiribiroto kamor, kotwana.”

¹¹Kosodete ituŋa lukorekeŋ, imakio ka ikapolok lukiboiete korekeŋ, kiswamata kwape kicorakinia Yesebel, kwape kiwadikatere obaluan luejukakini ŋesi kes.

¹² Kolimos ailuŋ, kibwaikis Nabos akonyen nuka ituŋa.

¹³ Kopotu ituŋa iarei, idwe luka Belial, kiboikinos akonyeneke: kitorona odwe luka Belial Nabos kakonyen nuka ituŋa, atiar, “Abu Nabos koŋerok Edeke ka ekabaka da.” Kitolomasi ŋes kiŋa naka ere, kibiribiroto kamor, kotwana.

¹⁴Kiyakiasi neejai Yesebel atiar, “Ebiribirii Nabos kamor, atwana.”

¹⁵Kosodi kanen, kiira Yesebel ebe ebiribirii Nabos kamor, atwana da, kolimok Yesebel Akab atiar, “Konyou, kirum emanikor loka emusabibu loka Nabos loagirit ainakin jo agwel kapesan: naarai mam Nabos eroko ejari, konye atwana.”

¹⁶Kosodi kanen, kiira Akeb ebe atwana Nabos, konyou Akab kijesar omanikor loka emusabibu loka Nabos Eyesereelit airum.

¹⁷ Kobu akirot naka EJAKAIT mama ejai Eliya Etisibit, atiar,

¹⁸ “Konyou kijesar airiamun ka Akab ekabaka loka Isirael, loiboie koSamaria: koany, ejai omanikor loka emusabibu loka Nabos Eyesereelit airum.

¹⁹ Ido kolimok ŋes atiar, ‘Inera EJAKAIT kwanata ebe, “Iar, irum da?” ’ Kolimok da atiar, ‘Inera EJAKAIT kwanata ebe, “Aibois nakemeoto iŋokwo aokot nuka Nabos, emeete da kwaŋin iŋokwo akoniwokot, nupekon.” ’ ”

²⁰ Kotema Akab Eliya atiar, “Kiany ijo eoŋ, ijo lokasurupika?” Koboŋok atiar, “Kaany; naarai igwelari bon aswam nueroko kakonyen nuka EJAKAIT.

²¹ Koany, ayauni nukaronok mama ijai, ido kapiar jo cut, adaun da kama ejai Akab ŋinikoku yenisapat, ka ŋin yeneenen, ka yenimam eenen koIsirael.

²² Ido etuluori ekonikek aputoor loka Yeroboam okoku loka Nebat, ka aputoor ekek loka Baasa okoku loka Akiya, kanuka aitunyunyurikin nakitunyunyurikini, aitidiakanar Isirael.

²³ Ido kiner EJAKAIT nuka Yesebel da atiar, ‘Enyamakinete iŋokwo Yesebel arwatat naka Yesereel.’

²⁴ Yenika Akab yenetwanikini ore enyamenenete iŋokwo; ido ŋin yenetwanikini ais enyamenenete akweny nuka apak.”

²⁵ (Konye emamei yeneputos ka Akab lokegwelar elopet aswam nueroko kakonyen nuka EJAKAIT lokitapaari aberuke Yesebel.

²⁶ Kiswamaenenei noi nuketal katuparit aputosia, kwape ejaatar kere nukiswamaenenete Imorain, lukireneari kolo EJAKAIT kakonyen nuka idwe luka Isirael.)

²⁷ Kosodi kanen, kiira Akab akiro ŋun, kocilicil ikenapen, konap ipukoi, koluŋ, koper kopukoi, kolot etwanit akuan.

²⁸Kobu akirot naka EJAKAIT mama ejai Eliya Etisibit, kobala ebe,

²⁹ “Iany ijo Akab kwape etasonikinor kakonyeneka? Naarai etasonikin kakonyeneka, mam ayauni aronis ŋin kapaarasiake: konye kapaarasia nuka okokuke ŋes ayaunia aronis ŋin okekike.”