Read Ebaibuli 1961 1 Ikabakan 22 Bible Online

1 Ikabakan 22 - Ebaibuli 1961 bible

1 Ikabakan 22

¹Kotuboros ikar iuni komamei ejie kidiŋ Suria ka Isirael.

² Kosodi kanen kokaru lokiwuniet, kobu Yekosapat ekabaka loka Yuda mama ejai ekabaka loka Isirael.

³ Kotema ekabaka loka Isirael ikekejaanakinak atiar, “ijenete yesi ebe erai Ramot-gilead lowok, oni da kipalarit, mam kidemuni ŋes kakan naka ekabaka loka Suria?”

⁴ Kotema ŋesi Yekosapat atiar, “Kiupar tope ijo keoŋ ejie Ramot-gilead?” Kotema Yekosapat ekabaka loka Isirael atiar, “Arai eoŋ kwape iraar ijo, ikatuŋa kwape ikonituŋa, ikabalasin kwape ikonibalasin.”

⁵Kotema Yekosapat ekabaka loka Isirael atiar, “Keŋaiŋait, kiŋit kakirot naka EJAKAIT lolo.”

⁶ Kosodi ekabaka loka Isirael atukonokin inabin, kwape ituŋa akwat aoŋon, kotema kes atiar, “Alosi kereka eoŋ aitiji Ramotgilead, arai bo kenye?” Kotemasi kesi atiar, “Kolot; naarai kijaik EJAKAIT ŋes akan naka ekabaka.”

⁷ Konye kotema Yekosapat atiar, “Emamei bobo da enabi ece loka EJAKAIT, keŋitata ŋes?”

⁸ Kotema ekabaka loka Isirael Yekosapat atiar, “Eriŋa ejai etuŋanan ediopet lokipedori aiŋitunia EJAKAIT, Mikaia okoku loka Imila: konye asac eoŋ ŋes; naarai mam kadwaranakini eoŋ nukajokak, dimarai ca nupekaronok.” Kotema Yekosapat atiar, “Kinyek ekabaka einer kwaŋin.”

⁹Kosodi ekabaka loka Isirael anyaraun ekapolokiton, kotema atiar, “Kisunyite koom Mikaia okoku loka Imila.”

¹⁰Kiboikin ekabaka loka Isirael ka Yekosapat ekabaka loka Yuda, ŋinituŋanan oicoloŋoke, konapitos inapenekec, kaibois naelal neelomarere orute loka Samaria; kodwarata inabin kere kakonyenekec.

¹¹Kotatau Sedekia okoku loka Kenaana amumwara nuka asua, kotema atiar, “Inera EJAKAIT kwanata ebe, ‘Iremio nu Isurian, aitodol naedaunotor kesi.’ ”

¹² Kodwarata inabin kere kwaŋin ebe, “Kolot Ramotgilead, kisirereŋio: naarai ijaikini EJAKAIT ŋes akan naka ekabaka.”

¹³Kosodi ekiyakia loabu kolot anyaraun Mikaia kotema ŋes atiar, “Koany, ejokuka akiro nuka inabin kaituk adiopet mama ejai ekabaka: keŋaiŋait, koputokinos akirotokon kwape kakirot naka ediopet kakesi, kiner nuejok.”

¹⁴ Kotema Mikaia atiar, “Kwape ejaria EJAKAIT, nukalimokini EJAKAIT eoŋ, ŋupeŋun eneri.”

¹⁵Kedolu ŋesi mama ejai ekabaka, kotema ekabaka ŋes atiar, “Mikaia, kilosi kereka isio Ramot-gilead ejie, arai bo kenyeis?” Koboŋok ŋes ebe, “Koloto, kisirereŋio; ijaikini EJAKAIT ŋes akan naka ekabaka.”

¹⁶Kotema ekabaka ŋes atiar, “Irwan imwaasi ai kesiyapo jo ebe sirikiilimok eoŋ adiokirot, dimarai nukabeit kokiror loka EJAKAIT.”

¹⁷ Kotema atiar, “Abu kaany Isirael kere isiarakina koroŋan, kwape amerekekin nuemameete ekecokon: kotema EJAKAIT atiar, ‘Emameete nu ejakait; koboŋosi kesi ŋinituŋanan oreke inapakina.’ ”

¹⁸Kotema ekabaka loka Isirael Yekosapat atiar, “Mam abu kalimok jo ebe mam kadwaranakini eoŋ nukajokak dimarai ca nupekaronok?”

¹⁹ Kotema atiar, “Aso kiira akirot naka EJAKAIT: abu kaany EJAKAIT iboie koicoloŋoke, kobwoi da ajore kere naka akuj kakanike nakoteten ka nakokediany da.

²⁰Kotema EJAKAIT atiar, ‘Iŋai iŋalaari Akab, tetere elosi aibirokin Ramot-Gilead?’ Kotema ediopet kopone kalo, ece da kopone ece.

²¹Kolom do emoyo, kobwo kakonyen nuka EJAKAIT, kotema atiar, ‘Eŋalaari eoŋ ŋes.’

²² Kotema EJAKAIT ŋes atiar, ‘Kinyo?’ Kotema atiar, ‘Alomari, araun emoyo lokaiŋal kaituke nuka inabinoke kere.’ Kotema ŋesi atiar, ‘Iŋalaari ijo ŋes, ido ipedori: koloma, kiswama kwaŋin.’

²³ Aso do koany, ebwaik EJAKAIT emoyo lokeŋalan aituke nuka inabinokon lu kere; kinerak EJAKAIT jo aronis.”

²⁴ Kosodi Sedekia okoku loka Kenaana aikunyakin, kibap Mikaia eitinyo, kotema atiar, “Kikwaikini ai emoyo loka EJAKAIT enyouni kamakaŋ einer kajo?”

²⁵ Kotema Mikaia atiar, “Koany, ianyuni kapaaran kaŋin, nailomaria agola nakotoma aiŋop.”

²⁶Kotema ekabaka loka Isirael atiar, “Kikamutu Mikaia, kinyakakis ŋes Amon ekayaiton loka ere, mama ejai Yoas da okoku loka ekabaka;

²⁷Kolimokis ebe, ‘Inera ekabaka kwanata ebe, “Kibwaikisi ekesa lo aidaris, kitanyamete ŋes inyamat luka aiticanitoi, kakipi nuka aiticanitoi, aitodol neabunio eoŋ kainapakin.”’ ”

²⁸ Kotema Mikaia atiar, “Arai teni iboŋu Ijo kainapakin, mam EJAKAIT inerit kamakaŋ.” Kotema atiar, “Kiirasi yesi ituŋa, yes kere.”

²⁹Koloto do ekabaka loka Isirael ka Yekosapat ekabaka loka Yuda Ramotgilead.

³⁰ Kotema ekabaka loka Isirael Yekosapat atiar, “Etegelikini eoŋ bon, alosi ojie; konye konap ijo inapenekon.” Kitegelikin ekabaka loka Isirael bon, kolot ojie.

³¹Abu ekabaka loka Suria kicorakinite ikapolokitok luka agalinike akaisauni ka luuni ebe, “Sirikijioto kaludidik karaida kalukapolok, dimarai kito ekabaka loka Isirael bon.”

³² Kosodi kanen, keanyut ikapolokitok agalin Yekosapat, kobalas ebe, “Abeit ŋes ekabaka loka Isirael.” Korioto aitiji ŋes; kodelo Yekosapat.

³³Kosodi kanen, keanyut ikapolokitok agalin ebe mere ŋes ekabaka loka Isirael koboŋut karukitor ŋes.

³⁴ Kiket ediotuŋanan akabwake komam elosikinit, kogum ekabaka loka Isirael neiriamitotor inapeneke lukasua: kanuka ŋun kotema ekereŋean agalike atiar, “Kibelok akanikon, kodaka eoŋ kajore; naarai kemusuŋi noi.”

³⁵Kosisior ejie kapaaran kaŋin: kigaŋitete ekabaka kagalike aitiji Isurian, kotwana do eboŋ; koleleete aokot kamusuŋut ogali.

³⁶Kojau eworo anatar ajore kere napelomari akoloŋ ebe, “Ŋinituŋanan oreke, ka ŋinituŋanan obukec.”

³⁷Kotwana do ekabaka, koyaunai Samaria; kidaikinai ekabaka Samaria.

³⁸ Kilota agali katapar naka Samaria; komeoto iŋokwo aokotoke; (kiloŋenenete adotia kanen;) kwape ajaar akirot naka EJAKAIT naabu kolim.

³⁹ Aswamisio ace nuka Akab, ka kere nuabu kiswama, ka etogo loabu koduk, mam kereka iwadikatai oitabo loka aisiitonokin nuka ikabakan luka Isirael?

⁴⁰Kojotoor Akab kalukapapaake; kirum Akasia okokuke aiboisike.

⁴¹ Kogeu Yekosapat okoku loka Asa airum Yuda kokaru lokiwoŋonet loka Akab ekabaka loka Isirael.

⁴²Korai Yekosapat loka ikar akaisauni ka lukany egeuni ŋesi airum; kirumak ikar akaisaarei ka lukany koYerusalem. Ekiror loka totoke ŋes Asuba akoku naka Sili.

⁴³ Kolosenenei ŋesi korot kere loka Asa papake; mam abu kopaa, kiswama nuejok kakonye nuka EJAKAIT: konye mam aponi kolemarai aiboisio nuiceleleete; koriŋa da ituŋa ainanakinete asuban, kisupuruunete lueuru maa kaiboisio nuiceleleete.

⁴⁴ Kopuco Yekosapat kekabaka loka Isirael.

⁴⁵Aswamisio ace nuka Yekosapat, ka akegogoŋ naetodiarit, kwape ajior da, mam kereka iwadikatai oitabo loka aisiitonokin nuka ikabakan luka Yuda?

⁴⁶ Abu kireŋea kakwap luedeunos luka luitepete ikiliok, luedeunos kapaarasia nuka Asa papake.

⁴⁷ Amamei ekabaka koEdom: ekegaŋan kerai ekabaka.

⁴⁸ Kiswamau Yekosapat ameerin nuka Tarusis alosit Opir adumun esabu: konye mam apotu koloto; naarai kobilas ameerin koEsion-geber.

⁴⁹Kosodi Akasia okoku loka Akab atemari Yekosapat atiar, “Kisiik ikakejaanakinak aupar kikonikejaanakinak kameerin.” Konye koŋer Yekosapat.

⁵⁰ Kojotoor Yekosapat kalukapapaake, aponi kidaikinai nepepe kalukapapaake ore loka Daudi papaake: kirum Yekoram okokuke aiboisike.

⁵¹Kogeu Akasia okoku loka Akab airum Isirael koSamaria kokaru lokitomonet kakanykaarei loka Yekosapat ekabaka loka Yuda, kirumak Isirael ikar iarei.

⁵² Kiswama nueroko kakonyen nuka EJAKAIT, kolosenenei korot loka papake, korot loka totoke, korot da loka Yeroboam okoku loka Nebat, loetidiakaria Isirael.

⁵³ Abu kijaanak Baal, komaenenei ŋes, kitunyunyurik EJAKAIT, Edeke loka Isirael, kwape ajaatar kere nuabu papake kiswama.